گجرات : بہادر طالبہ نے دست درازی اور پرس چھینے والے ملزم کو پکڑوا دیا

ملک میں چوری و ڈکیتی کی وارداتوں میں مسلسل اضافہ دیکھنے میں آرہا ہے جس کے سبب یہ جرائم پیشہ عناصر تقریباً ہر علاقے کے لئے خطرہ بنتے جارہے ہیں۔ حد تو یہ ہے عوام کا گھروں موبائل فون ، نقدی وغیرہ لیکر نکلنا محال ہوتا جا رہا ہے۔ ان وارداتوں کی روک تھام کے لئے ضروری ہے کہ پولیس فوری کارروائی کرے اور ان ملزمان کو حراست میں لے تاکہ ان وارداتوں کی روک تھام ممکن ہوسکے۔

پولیس کی بروقت کارروائی کا ایسا ہی ایک واقعہ حالیہ دنوں میں گجرات میں پیش آیا جس میں پولیس نے ملزم کو طالبہ سے دست درازی اور پرس چھیننے والے ملزم کو چند گھنٹوں میں گرفتار کرلیا۔

ترجمان پنجاب پولیس کے مطابق جلالپور جٹاں کے علاقہ میں کالج سے واپس آتے ہوئے طالبہ سے نامعلوم موٹر سائیکل سوار ملزم نے دست درازی کی اور پرس چھیننے کی کوشش کی۔ طالبہ نے ہوشیاری کا مظاہرہ کرتے ہوئے ملزم کو روکنے کی کوشش کی اور اسے موٹر سائیکل سے گرادیا مگر ملزم موقع سے فرار ہوگیا۔

طالبہ کی جانب سے فوری طور پر اس واقعہ کی اطلاع پولیس کو دی۔ اطلاع ملتے ہی پولیس موقع پر پہنچی، علاقہ کی ناکہ بندی کرکے چند گھنٹوں میں ملزم کو ٹریس کرکے گرفتارکر لیا۔ ترجمان پنجاب پولیس کے مطابق ملزم کو قرار واقعی سزا دلوائی جائے گی۔

خیال رہے کہ گزشتہ دنوں راولپنڈی کے علاقے ڈھوک چودھریاں عزیز آباد میں خاتون سے پرس چھین کر فرار ہونے والے ملزم کو بھی پولیس نے گرفتار کرکے واردات کے دوران استعمال ہونے والی موٹر سائیکل اور خاتون سے چھینا گیا پرس برآمد کرلیا تھا۔ راولپنڈی کے تھانہ ریس کورس کی حدود میں سنیچنگ کی اس واردات کے دوران خاتون منہ کے بل زمین پر گر کر زخمی ہوگئی تھیں ۔اس واقعے کی سی سی ٹی وی فوٹیج میں موٹر سائیکل سوار ملزم نے راستے سے گزرتی خاتون کا پرس چھیننا، پرس چھیننے کے دوران خاتون زمین پر جاگری اور خاتون کا موبائل فون اور دیگر اشیا بھی زمین پر بکھر گئیں جبکہ موٹر سائیکل سوار پرس چھین کر فرار ہوگیا تھا۔

ایف آئی آر میں لڑکی کے بھائی نے موقف اپنایا تھا کہ میری بہن ٹیچنگ کے لئے اسکول جارہی تھی کہ راستے میں موٹر سائیکل سوار نے بیگ چھیننے کی کوشش کی ، ملزم بیگ چھین کر بھاگ گیا جس میں شناختی کارڈ، 2ہزار روپے اور ضروری کاغذات تھے۔ تاہم ، جب اس واقعے کی ویڈیو کلپ ٹوئٹر پر وائرل ہوئی تو صارفین کا کہنا تھا کہ ایسے ملزموں کو سخت سزا دینی چاہیے تاکہ وہ راہ چلتے خواتین کو ہراساں نہ کرسکیں۔

علاوہ ازیں ، شہر قائد میں بھی چوری اور لوٹ مار کے کئی واقعات منظر عام پر آچکے ہیں۔ گزشتہ دنوں بھی ایک سی سی ٹی وی فوٹیج میں نارتھ ناظم آباد کے علاقے میں گھر کے باہر موٹر سائیکل پر ایک مرد اور عورت نے فیملی کو لوٹ لیا تھا۔ یہ فیملی شاپنگ کرنے کے بعد گھر لوٹی تھی اور شاپنگ بیگز گاڑی سے نکال کر گھر میں لیکر جارہی تھی کہ اچانک نامعلوم مرد اور عورت عقب سے آئے اور پستول دیکھا کر فیملی سے شاپنگ بیگز، نقدی اور دیگر قیمتی سامان لوٹ لیا تھا۔