شادی ایک بہترین سیکھنے کا عمل ہے ،ایک سے زیادہ شادی کریں

معروف اداکار فیروز خان پاکستانی ٹیلی ویژن انڈسٹری کے ایک جانے مانے اور باصلاحیت اداکار ہیں جو وہ اپنی شاندار اداکاری کی بدولت مداحوں میں بے حد مشہور ہیں۔ ڈرامہ سیریل خانی، عشقیہ اور خدا اور محبت تھری ان کے سب سے زیادہ متاثر کن پراجیکٹس ہیں۔

حال ہی میں فیروز خان نے نجی ٹی وی کے شو میں بطور مہمان خصوصی شرکت کی جس میں میزبان احسن خان نے ان سے شادی کے متعلق سوال کیا تو فیروز خان نےاس سوال کے جواب میں اہم مشورہ دے ڈالا۔

“ٹائم آؤٹ ود احسن خان” شو میں شرکت کے دوران فیرزو خان سے میزبان احسن خان نے پوچھا کہ فیروز خان تو ابھی بچہ تھا اور بہت جلد شادی کرلی کیا یہ بات سچ ہے؟ فیروز خان نے اس بات کی نفی کرتے ہوئے کہا کہ نہیں مجھے تو مزید جلدی شادی کرنی چاہیے تھی۔ انہوں نے کہا کہ شادی ایک بہترین سیکھنے کا عمل ہے، شادی ایک نہیں بلکہ جیسے ہمارے نبی صلؔی اللہ علیہ وآلٖہ وسلؔم نے زیادہ کی ہیں ویسے ہی ہمیں بھی زیادہ کرنی چاہئیں۔

البتہ سوشل میڈیا صارفین فیروز خان کے ایک سے زائد شادیوں کے مشورے پر خوش دکھائی نہیں دیتے اور اپنے خیالات کا اظہار کرتے ہوئے شادی سے متعلق اداکار کی سوچ پر تنقید کر رہے ہیں۔

خیال رہے کہ اداکار فیروز خان کی شادی سیدہ علیزے فاطمہ سے 2018 میں ہوئی تھی اور ان دونوں کا ایک بیٹا ہے۔ فیروز خان اور اہلیہ علیزے کے درمیان گزشتہ سال علیحدگی کی خبریں بھی گردش کرتی رہیں، سوشل میڈیا پر وائرل ہونے والی دونوں کی علیحدگی کی خبروں میں دعویٰ کیا گیا تھا کہ دونوں میں ذاتی رنجش کے باعث کچھ عرصہ قبل ہی علیحدگی ہوگئی تھی۔

علیزے سلطان اور فیروز خان کے درمیان علیحدگی و طلاق کی خبروں پر متعدد سوشل میڈیا پیجز نے فیروز خان کو مینشن بھی کیا تھا لیکن اس کے باوجود انہوں نے ایسی خبروں پر فوری طور پر کوئی ردعمل نہیں دیا تھا ، جب کہ علیزے سلطان سے بھی لوگوں نے کمنٹس میں علیحدگی و طلاق پر سوالات کیے تھے مگر انہوں نے کوئی جواب نہیں دیا۔

اسی دوران فیروز خان نے اہلیہ سیدہ علیزے فاطمہ اور ان کی فیملی کو انسٹاگرام پر ان فالو کردیا تھا جب کہ علیزے کی والدہ نے بھی اپنے داماد فیروز خان سے متعلق تمام پوسٹ ڈیلیٹ کردی تھیں۔ پھر اس کے بعد اداکار کی اہلیہ نے اپنا غیر فعال انسٹاگرام اکاؤنٹ فعال کیا جس میں صرف چار تصویروں کے علاوہ تمام تصویریں ڈیلیٹ کردی گئی تھیں۔ اگرچہ فیروز خان نے شادی کے دو سال بعد گزشتہ برس مارچ میں شوبز سے کنارہ کشی کا اعلان کیا تھا اور پھر ان کی طلاق کی خبریں وائرل ہوئیں تھیں۔ لیکن اب وہ دوبارہ ڈرامہ انڈسٹری میں قدم رکھ چکے ہیں اور جیو ٹی وی پر نشر ہونے والا ان کا ڈرامہ خدا اور محبت سیزن تھری کافی مقبول بھی ہوا ہے۔