فہد مصطفیٰ کی “ارطغرل“پر تنقید،سینیٹر فیصل جاوید حمایت میں کود پڑے

تحریک انصاف کے سینیٹر فیصل جاوید خان نے ترک اداکار انگین آلتان (ارطغرل غازی) کے پاکستان آنے پر اداکار فہد مصطفیٰ کی تنقید پر برہمی کا اظہار کیا اور ترک اداکار کی حمایت میں بولتے ہوئے فہد مصطفیٰ کو ترک ڈراموں سے سیکھنے کا مشورہ دے دیا۔

پاکستانی معروف میزبان و اداکار فہد مصطفیٰ نے حال ہی میں ایک انٹرویو کے دوران ترک اداکار اینگن التان المعروف “ارطغرل غازی “کی پاکستان آمدپر پھٹ پڑے اور ان کی آمد سے متعلق کہا کہ وہ آیا اور پیسے لے کر چلا گیا لیکن ہم ہمیشہ یہیں رہیں گے۔ دوران انٹرویو ترک اداکاروں پر تنقید کرتے ہوئے انہوں نے کہا تھا کہ ارطغرل آئے، شیر کے ساتھ بیٹھے، پیسے لیے اور چلے گئے۔ اس انٹرویو میں انہوں نے انڈسٹری میں اپنے ڈراموں کا سرحد پار اور دنیا بھر کے میڈیا سے موازنہ کیا۔

پاکستانی فلم “نامعلوم افراد” میں ایکٹینگ کے جوہر دیکھانے والے فہد مصطفیٰ نے دوران انٹرویو پاکستانی ڈراموں پر قوم کی تنقید سے متعلق بھی اپنے خیالات کا اظہار کیا۔ پاکستانی اداکار نے کہا تھا کہ جو چیز چل رہی ہے اسے چلنے دینا چاہئیے کیونکہ ہم ترک نہیں ہیں، بھارتی نہیں ہیں آخر میں ہم پاکستانی ہیں۔

فہد مصطفیٰ کا کہنا تھا کہ پاکستانیوں کے لیے اصل فنکار ہمایوں سعید ہے اور میں ہوں، آپ اس کا اعتراف کریں یا نہیں، ہم یہاں تھے اور مستقبل میں بھی یہی ہوں گے۔

فہد مصطفیٰ کے اس مذکورہ بیان پر پی ٹی آئی کے سینیٹر فیصل جاوید خان چپ نہ رہ سکے اور سماجی رابطے کی ویب سائٹ ٹوئٹر پر کیے گئے ٹوئٹ میں انہوں نے کہا کہ انگین التان ان بہترین اداکاروں میں سے ایک ہیں جنہیں ہم ٹی وی پر دیکھ رہے ہیں اور دیریلیش ارطغرل نے انہیں دنیا بھر میں بہت زیادہ شہرت دلائی۔انہوں نے مزید کہا کہ “ارطغرل غازی”جیسی عظیم پروڈکشن سے بہت کچھ سیکھا جاسکتا ہے، آپ بھی ہدایت کاری پر توجہ دیں۔

پی ٹی آئی کے سینیٹر نے ساتھ ہی یہ بھی کہا کہ ترک اداکاروں کا پاکستان آنا کوئی خطرہ نہیں بلکہ موقع ہے۔

خیال رہے کہ ترکی کے ڈرامے “ارطغرل غازی“ کو پاکستان ٹیلی وژن (پی ٹی وی) پر اردو ترجمہ کے ساتھ نشر کیا جا رہا ہےجس نے پاکستانی عوام میں مقبولیت کے نئے ریکارڈز بنائے۔ پاکستانی شوبز شخصیات نے بھی اس ڈرامے کو پسند کیا لیکن کچھ شخصیات جن میں شان شاہد، یاسر حسین ، ایمن منیب اور منال خان شامل ہیں نے اس ڈرامے کو پی ٹی وی پر نشر کرنے کی مخالفت کی۔ جب کہ لیجنڈ اداکارہ ریما خان نے پی ٹی وی سے مطالبہ کیا کہ وہ اس کو نشر کرنے پر پابندی لگائے۔

تاہم عوام میں اس ڈرامے کی مقبولیت کے دیکھتے ہوئے پاکستانی انٹرٹینمنٹ انڈسٹری کو تنقید کا سامنا کرنا پڑ رہا ہے کہ آج کا پاکستانی ڈرامہ شادی بیاہ، طلاق م، مرد کی بے وفائی، عورت کی آزادی جیسے چند موضوعات تک محدود ہوکر رہ گیا ہے اور یہاں تاریخی اور اسلامی فتوحات پر مبنی ڈرامے نہیں بنائے جا رہے۔