عید قرباں پر غذائیت سے بھرپور کلیجی کا ناشتہ

عیدالاضحی ہمیں قربانی کا درس دیتی ہے۔ اللہ کی راہ میں قربانی کی فضیلت کے ساتھ ذبح ہونے والے جانور کا گوشت بھی غذائیت کے اعتبار سے اہمیت کا حامل ہے۔ اس کی اہمیت کا اندازہ اس بات سے لگائیں کہ قربانی کا گوشت چاہے وہ بکرے، گائے یا اونٹ کا ہو روزمرہ استعمال ہونے والے گوشت سے زیادہ صحت مند ہوتا ہے اور اس کی لذت بھی مختلف ہوتی ہے۔

قربانی کے گوشت کی بات کریں اور “کلیجی“ کا ذکر نہ ہو تو ایسا ممکن نہیں۔ عید قرباں پر جانور کی قربانی کے بعد خاتون خانہ کا سب سے پہلا کام اہل ِخانہ کیلئے گرما گرم کلیجی تیار کرنا ہوتا ہےکیونکہ کلیجی کے بغیر عیدالاضحیٰ کا دسترخوان نامکمل ہے۔ قربانی کے جانور کی کلیجی غذائی لحاظ سے بھی کھانا نہایت فائدے مند ہے کیونکہ اس میں وافر مقدار میں آئرن پایا جاتا ہے اس لئے یہ خون کی کمی کو دور کرتی ہے اور پٹھوں کی مضبوطی کیلئے مفید ہے۔

قربانی کےجانور کے گوشت سے تیار کردہ سب سے تیز ڈش عموماً کلیجی مصالحہ ہے جو ذائقے دار ہونے کے ساتھ غذائیت سے بھرپور بھی ہے۔ اس عید پر آپ ہماری بتائی ہوئی اس ترکیب کے ساتھ کلیجی بنائیں اور اہل خانہ سے داد سمیٹیں۔

اجزاء:
700 گرام بکرے/ گائےکی کلیجی ۔تیل (2 چمچ) -گرم مصالحہ (2 تیز پتا، کچھ کالی مرچیں ، 2 الائچی ، 2 یا 3 چھوٹی دار چینی)- پیاز (ایک کپ ، باریک کٹی ہوئی) – ہلدی (1/2 چمچ ) – زیرہ پاؤڈر(1 چمچ)۔ ہری مرچ (کھانا پکانے کے لئے 2 ، تھوڑی سی گارنش کرنے کے لئے) – ادرک ، لہسن کا پیسٹ (ایک چمچ) – ٹماٹر (ایک بڑے سائز کا ،کٹا ہوا) – دہی (ایک کپ) ۔نمک حسب ِذائقہ

ترکیب:
پین میں تیل ڈال کر گرم کریں۔ جب تیل گرم ہوجائے تو اس میں ثابت گرم مصالحہ ڈالیں اور بھونیں۔ اب کٹے ہوئے پیاز شامل کریں اور اس کو گولڈن براؤن ہونے دیں پھر اس میں ادرک لہسن کا پیسٹ ڈال کر دوبارہ بھونیں۔

اس کےبعد ٹماٹر ، ہری مرچ ، دھنیا ، ہلدی ، زیرہ پاؤڈر ڈال کر تین سے چار منٹ بھونیں۔

تھوڑا سا پانی شامل کریں اور جب تک تیل الگ نہ ہوجائے تب تک پکائیں۔

اس حوالے سے مزید جانئے: کون سے ایسے کھانے ہیں جو دوبارہ گرم کرنے پر زہریکے ہوسکتے ہیں

اب نمک ڈال دیں اور کلیجی کوپکنے دیں۔

اب کلیجی میں دہی ڈالیں اوراسے چھ یا سات منٹ تک پکنے دیں۔

اب آپ گرم مصالحہ، تازہ ہرادھنیا اور آدھےلیموں کا رس ڈال کر چولہا بند کردیں۔

مزیدار کلیجی آپ کے عید ناشتے کے مینو کا لطف دوبالا کرنے کیلئے تیار ہے۔