کھجور کھانے کے حیرت انگیز فوائد کیا ہیں؟

ماہِ رمضان میں کھجور کے بغیر افطار کا تصور ممکن نہیں ، یہ صحت کو بہت زیادہ فوائد پہنچانے والا پھل ہے جسے لازمی کھانا چاہیے۔ اس میں فائبر، پوٹاشیم، کاپر، مینگنیز، میگنیشم اور وٹامن بی سکس جیسے اجزا شامل ہیں جو کہ فوری توانائی کا ایک بہت بڑا ذریعہ ہیں اور متعدد طبی فوائد کا باعث بھی بنتے ہیں۔ یہ پھل چھ ہزار قبل مسیح سے کاشت کیا جارہا ہے اور اسے کھانا سنت نبوی صلی اللہ علیہ و آلہ وسلم بھی ہے۔اس کی چند مقبول اقسام میں عجوہ، برہی، خلص، خضری، مجدولہ، نبوت، سیف، سقی اور سکری شامل ہیں۔

کھجور کی افادیت کی مدنظر رکھتے ہوئے اس کو پورا سال استعمال کیا جاسکتا ہے چاہے وہ تازہ پھل کی شکل میں ہو یا پھر خشک یا ڈرائی شکل میں ، دونوں ہی شکلوں میں یہ پھل صحت کے لیے مفید ثابت ہوتا ہے۔ الغرض اس میں لاتعداد برکتیں اور بے شمار بیماریوں کا علاج ہے۔ مگر کیا آپ کو معلوم ہے کہ افطار کے علاوہ عام دنوں میں بھی کھجور کھانا صحت کے لیے کتنا فائدہ مند ہے؟اگر نہیں تو چلیں ہم بتاتے ہیں؛

کھجوریں ریشہ کا ایک پاور ہاؤس ہیں جو نظامِ ہاضمہ کو بہتر بنانے اور قبض جیسے مسائل کو ختم کرنے میں معاون ثابت ہوتا ہے۔

کھجور آئرن حاصل کرنے کا بھرپور ذریعہ ہے، جسم میں خون کی کمی اور خون کے بہاؤ کو روکنے کے لیے آئرن کی مقدار ضروری ہے۔

کھجور کھانے کی عادت ہاضمے کو تحفظ فراہم کرتی ہے اور معدے میں نقصان دہ بیکٹریا کی مقدار کم کرتی ہے جن کا آنتوں میں پھیلنے کا خطرہ ہوتا ہے۔ ایک تحقیق میں دریافت کیا کہ جو لوگ کھجوروں کو کھانے کے عادی ہوتے ہیں ان کے معدے میں فائدہ مند بیکٹریا کی نشوونما ہوتی ہے جو آنتوں میں کینسر زدہ خلیات کو پھیلنے سے بچاتا ہے۔

یہ پوٹائیشیم کا بہت بڑا ذریعہ ہے اور بلڈ پریشر کے مریضوں کے لیے فائدہ مند ہے۔کھجور جسم میں خراب کولیسٹرول (ایل ڈی ایل) کی سطح کو کم کرسکتی ہے۔ اس سے شریانوں اور دل کی بیماریوں میں رکاوٹ کے خطرات کم ہوجاتے ہیں۔

کھجور کا باقاعدہ استعمال ہڈیوں کے لئے فائدہ مند ثابت ہوسکتا ہے کیونکہ اس میں کیلشیئم، میگنیشم اور زنک کے ساتھ فاسفورس جیسے منرلز موجود ہیں، جس سے ہڈیوں کی صھت کو بہتر بنانے اور ہڈیوں کے امراض کی روک تھام میں مدد مل سکتی ہے۔

کھجور کھانا جسمانی وزن میں کمی لانے میں بھی مدد دیتا ہے، ان میں موجود فائبر پیٹ کو زیادہ دیر تک بھرے رکھتا ہے جبکہ بلڈ گلوکوز کو بڑھنے سےروکتا ہے۔کھجوروں میں موجود اینٹی آکسائیڈنٹس جسم سے زہریلے مواد کو خارج کرکے ہاضمہ تیز کرتے ہیں جس سے میٹابولزم تیز ہوتا ہے۔

مزید پڑھیں: کیا آپ پپیتا کھانے کے فوائد اور نقصانات جانتے ہیں؟

صبح کے وقت کھجوریں کھانے سے تھکاوٹ سے نجات ملتی ہے اور جلد نِکھرتی ہے جبکہ ایکنی جیسے مسائل سے بھی چھٹکارا حاصل ہوتا ہے۔

کھجور دماغی افعال بہتر بنانے کے لیے بھی فائدے مند ہے اور یہ ذہن کو تیز بناتی ہے۔ دن میں صرف دو کھجوریں ذہنی نشوونما کے لیے بہترین غذا ثابت ہوسکتی ہیں۔