بہروز سبز واری کا سرِعام محبت کا اظہار کرنیوالوں سے متعلق اہم انکشاف

آج کل اداکاروں خصوصاً نئے شادی شدہ جوڑوں میں اپنی محبت کے اظہار کی نجی تصویریں سوشل میڈیا پر پوسٹ کرنا ٹرینڈ بنتا جارہا ہے، اس ٹرینڈ کی شروعات کس نے کی اس بارے میں تو مصدقہ طور پر کچھ نہیں کہا جاسکتا مگر اب زیادہ تر شوبز شخصیات اس ٹرینڈ میں شامل ہونے کی جستجو کرتی نظر آتی ہیں۔ بعض اوقات ان جوڑوں کی نجی نوعیت کی یہ تصویریں دیکھ کر ایسا محسوس ہوتا ہے کہ جوڑے کی جانب سے یہ تصویریں محض اس لئے شیئر کی جارہی ہیں کہ ان کے ‘ایکس’ یہ دیکھ لیں کہ وہ اپنی زندگی میں بہت خوش وخرم ہیں۔

بعض شوبز شخصیات ایسی بھی ہیں جو اس ٹرینڈ کا بھرپور فائدہ اٹھاتے ہوئے اپنے فلوورز بڑھانے کی تگ ودو میں مصروف ہیں۔اگرچہ وجوہات جو بھی ہوں مگر پاکستانی شوبز انڈسٹری کے سینئر اداکار بہروز سبز واری نے نئی نسل کی ان حرکات پر تنقید کرتے ہوئے ان جوڑیوں کے متعلق اہم انکشاف کرکے سب کو حیران کردیا ہے۔

حال ہی میں بہروز سبزواری نے آغا علی اور حنا الطاف کے پروگرام ‘دی کپل شو’ میں اپنی اہلیہ سفینا بہروز کے ساتھ شرکت کی۔ میزبان نے ان کی ازدواجی زندگی کی تعریف کی اور کہا کہ آپ کا اپنی اہلیہ کے ساتھ ایک خوبصورت تعلق ہے، اس کی کیا وجہ ہے؟ جواب میں بہروز سبزواری نے کہا کہ ہم عوام کے سامنے جھگڑا نہیں کرتے جس پر ان کے ہمراہ شو کے میزبانوں نے بھی قہقہ لگادیا۔

بہروز سبزواری نے کہا کہ میں نے کئی جوڑوں کو عوام کے سامنے ایک دوسرے سے محبت کا اظہار کرتے دیکھا ہے، جو لوگ عوامی سطح پر اظہارِ محبت کے دوران جذباتی ہوجاتے ہیں وہ جعلی لگتے ہیں۔ اداکار نے کہا کہ عوام کے سامنے اتنی زیادہ محبت کا مظاہرہ کرنا عجیب لگتا ہے۔

بہروز سبزواری نے کہا کہ میرا مشاہدہ ہے کہ جو جوڑے سرِعام محبت کا اظہار کرتے دکھائی دیتے ہیں ان کی ازدواجی زندگی بڑے مسائل کا شکار ہوتی ہے اور اُن کے گھروں میں لڑائی جھگڑے زیادہ ہوتے ہیں۔ بہروز سبز واری نے ایسے جوڑوں کو مخاطب کرتے ہوئے مزید کہا کہ میں ان سے کہنا چاہتا ہوں کہ وہ گھر میں اپنے تعلقات میں توازن پیدا کریں پھر انہیں عوام کے سامنے ایک دوسرے سے اظہار محبت کرنے کی ضرورت نہیں پڑے گی۔ اداکار نے ان تمام جوڑوں کو مشورہ دیتے ہوئے کہا کہ دل سے ایک دوسرے کو پیار کرو اور اپنے اندر برداشت رکھو، اگر ایسا کیا تو زندگی بہت اچھی گزرے گی۔

خیال رہے کہ بہروز سبزواری اس سے پہلے بھی سرِعام ایک دوسرے سے محبت کا اظہار کرنے والے نئے شادی شدہ جوڑوں پر تنقید کرچکے ہیں۔دیکھا جائے تو ان کے بیٹےاداکار شہروز سبزواری بھی اپنی دوسری اہلیہ اداکارہ و ماڈل صدف کنول کے ہمراہ سوشل میڈیا پر تصویریں کم ہی پوسٹ کرتے ہیں۔

یاد رہے کہ جب شہروز سبزواری نے اپنی پہلی بیوی اداکارہ و ماڈل سائرہ یوسف کو طلاق دیکر دوسری شادی کی تھی تو اس وقت انہیں شدید تنقید کا نشانہ بنایا گیا تھا تاہم اس وقت ان کے والد بہروز سبزواری کا سوشل میڈیا پر ایک انٹرویو کا ویڈیو کلپ کافی وائرل ہوا تھا جس میں سائرہ یوسف اور صدف کنول کے بارے میں گفتگو کرتے ہوئے کہا تھا کہ ان کی سابقہ بہو سائرہ یوسف اور موجودہ بہو صدف کنول دونوں ہی اُن کی بیٹیاں ہیں۔ ان کا کہنا تھا کہ سائرہ میری بیٹی ہے کیونکہ وہ میری پوتی کی والدہ ہے اور میں انہیں بہت سپورٹ کرتا ہوں جبکہ اب اللہ تعالیٰ نے مجھے صدف کے روپ میں ایک اور بیٹی بھی دے دی ہے۔ اداکار نے کہا کہ ہر کام میں بہتری ہوتی ہے، اگر اللہ تعالیٰ کو یہ منظور تھا تو اس میں ہماری بہتری ہوگی، اسی وجہ سے یہ سب ہوا۔