عاصم اظہر کی میلبرن کرکٹ گراؤنڈ میں جمعے کی اذان، سوشل میڈیا پر وائرل ہوگئی

آئی سی سی ٹی 20 ورلڈ کپ کا آغاز آسٹریلیا میں ہوچکا ہے جہاں شائقین کرکٹ سمیت کئی شوبز ستارے بھی موجود ہیں۔ ٹی 20 ورلڈ کپ کے لیے پاکستانی نغمے ’کھیل دل میں ہے‘ کو میشا شفیع، عبداللہ صدیقی اور ایوا بی کے ساتھ پرفارم کرنے والے نوجوان گلوکار عاصم اظہر بھی آسٹریلیا میں موجود ہیں۔ گلوکار نے میلبرن کے کرکٹ گراؤنڈ میں جمعے کی اذان دے کر مداحوں کے دل جیت لیے ہیں۔

فوٹو اینڈ ویڈیو پلیٹ فارم انسٹاگرام پر وائرل ہونے والی ویڈیو میں عاصم اظہر کو آسٹریلیا کے شہر میلبرن میں جمعے کی اذان دیتے ہوئے دیکھا جاسکتا ہے۔

اس ویڈیو میں گلوکار سیاہ لباس میں ملبوس، ٹوپی پہنے جماعت کے سامنے نماز جمعہ کی اذان دیتے ہوئے نظر آرہے ہیں۔

گلوکار نے ویڈیو شئیر کرتے ہوئے کیپشن میں لکھا کہ سچ میں یہ جمعہ زندگی کا بہترین دن تھا جب مجھے آسٹریلیا کے شہر میلبرن میں بسنے والے مسلمانوں کے لیے اذان دینے کا موقع ملا۔
انہوں نے لکھا کہ اس لمحے کی ایک اور خوبصورت چیز یہ ہے کہ یہاں تمام مسلک کے مسلمان ایک ساتھ نماز ادا کرنے آئے ہوئے تھے۔ گلوکار نے مداحوں کے لیے کہا آپ لوگ فکر نہ کریں، ہم نے اتوار کو پاک بھارت ٹاکرے میں بارش نہ ہونے کی دعا مانگی ہے۔

ان کے اذان دینے کے عمل کو نہ صرف مداحوں نے بلکہ ساتھی فنکاروں نے بھی کافی پسند کیا اور اس ویڈیو کو اب تک تقریباً 1 ملین صارفین دیکھ چکے ہیں، جبکہ ڈھائی لاکھ صارفین نے اسے پسند کیا ہے۔گلوکار کی مذکورہ ویڈیو میلبرن کے کرکٹ گراؤنڈ میں اتوار کو پاکستان اور بھارت کے مابین ہونے والے پلے آف سے قبل سامنے آئی ہے۔

پاکستانی میوزک انڈسٹری کے نوجوان گلوکار عاصم اظہر کا نام کسی بھی تعارف کا محتاج نہیں، انہوں نے بہت جلدی اپنی گائیکی سے لوگوں کو اپنا گرویدہ بنالیا۔ ان کی آواز اس قدر مسحور کنُ ہے کہ ان کے چاہنے والوں میں ہر عمر کے افراد شامل ہیں جبکہ وہ نوجوانوں کی دلوں کی دھڑکن ہیں۔ ان کے گائیکی کے چرچے پاکستان کے علاوہ سرحد پار بھارت میں بھی ہیں جبکہ اسی پسندیدگی اور مقبولیت کے باعث ان کے گانے ‘تو جو نہ ملا’ نے یوٹیوب پر 10 کروڑ بار دیکھے جانے کا سنگ میل عبور کیا تھا اور اس گانے کی مشہور بھارتی ڈائریکٹر کرن جوہر کی جانب سے بھی تعریف کی گئی تھی۔ جبکہ ماہ ِمبارک میں انہوں نے اپنی خوبصورت آواز وانداز میں روح پرور کلام ‘قصیدہ بردہ شریف’ پیش کیا جو کہ مداحوں میں کافی مقبول ہوا۔

مزید پڑھیں: عالمی ریکارڈ ہولڈر زارا نعیم بھی گلوکار عاصم اظہر کی مداح نکلیں

یاد رہے کہ 2021 میں اداکارہ ہانیہ عامر سے دوستی اور پھر بریک اَپ کے بعد رواں برس گلوگار عاصم اظہر نے اپنی دیرینہ دوست اداکارہ میرب علی سے منگنی کی جس پر مداحوں نے ان کے لئے نیک تمناؤں کا اظہار کیا۔ عاصم اظہر کی منگیتر میرب علی ماڈلنگ کے علاوہ میگا کاسٹ فوجی ڈراما ’صنف آہن‘ یمنیٰ زیدی کی بہن کا کردار ادا کرچکی ہیں۔

علاوہ ازیں، عاصم اظہر باصلاحیت گلوکار ہونے کے ساتھ اچھے انسان بھی ہیں اور وہ اکثروبیشتر اپنے مداحوں کے مسائل اور مشکلات حل کرتے نظر آتے ہیں۔ گزشتہ سال بھی عاصم اظہر نے ایک مداح کی دادی کے علاج کے لئے مالی مدد کی تھی۔