اداکار عثمان مختار کی شادی کی تقریبات کا باقاعدہ آغاز

پاکستانی کے نامور اداکار عثمان مختار کی شادی کی تقریبات کا باقاعدہ آغاز ہو چکا ہے جس کی تصاویر سوشل میڈیا پر کافی تیزی سے وائرل ہو رہی ہیں۔ ڈرامہ سیریل ہم کہاں کے سچے تھے، انا، ثبات کے اداکار عثمان مختار کے حوالے سے پاکستان شوبز انڈسٹری میں یہ تاثر پایا جاتا ہے کہ جو اداکارہ ان کے ساتھ ڈرامے میں کام کر لے اُس کی شادی ہوجاتی ہے۔

چنانچہ متعدد اداکاراؤں کی شادیاں کروانے کے بعد اب عثمان مختارخود شادی کا لڈو کھانے کے لیے لائن میں لگ گئے ہیں۔ اداکار کی شادی کی تقریبات کا آغاز بدھ کے روز مایوں کی تقریب سے ہوا ، جس میں خاندان اور دوستوں نے شرکت کی۔

سوشل میڈیا ایپلیکیشن انسٹا گرام پر عثمان مختار کی اپنی اہلیہ زنیرا انعام خان کے ساتھ مہندی مایوں کے موقع پر بنائی گئی متعدد تصویریں اور ویڈیوز وائرل ہوئیں۔ جس میں دونوں کو ایک ساتھ خوشگوار موڈ میں دیکھا گیا۔ مایوں کے بعد جمعرات کی رات مہندی کا پروگرام ہوا، جس میں شوبز انڈسٹری کے کئی نامور چہروں نے شرکت کی اور تقریب کو چار چاند لگائے۔

شوبز انڈسٹری سے اداکاراحمد علی اکبر ،عثمان خالد بٹ ،گلوکار عزیر جسوال سمیت پروڈیوسر نینا کاشف ،اداکارہ حریم فاروق اور اداکارہ مریم نفیس نے اپنے شوہر کے ہمراہ شرکت کی۔

مہندی میں دلہن نے جامنی اور لال رنگ کا خوبصورت جوڑا پہنا جبکہ دولہا عثمان مختار نے بلیک شیروانی پہنی جو کہ اداکار فواد خان کی اہلیہ صدف فواد خان نے ڈیزائن کیا تھا۔

مہندی کے فنکشن میں دولہا کی خوشی دیدنی تھی اور انہوں نے اپنے قریبی دوستوں اداکاراحمد علی اکبر ، عثمان خالد بٹ ،گلوکار عزیر جسوال کے ساتھ ڈانس کیا۔

دلہن نے بھی خوشی میں نہال ہوکر اپنے دوستوں اور گھر والوں کے ساتھ ڈانس کیا اور اپنی مہندی کے فنکشن کو خوب انجوائے کیا۔

بظاہر سنجیدہ نظر آنیوالے دولہا عثمان مختار کی مہندی کے فنکشن میں ڈانس فلور پر مختلف گانوں پر پرفارمنس نے سبھی کو چونکا دیا۔ ان کے ڈانس کی ویڈیوز سوشل میڈیا پر خوب وائرل ہورہی ہیں اور مداح ان ویڈیوز کو کافی پسند کررہے ہیں۔

خیال رہے کہ رواں برس عثمان مختار نے انسٹاگرام پر اپنے نکاح کی تصاویر شیئر کرتے ہوئے مداحوں کو 31 مارچ کو رشتہ ازدواج میں منسلک ہونے سے متعلق بتایا تھا۔

اداکار نے اپنی طویل پوسٹ میں لکھا تھا کہ زنیرہ انعام خان تمہارا شکریہ، کہ تم نے مجھے زمین کا سب سے خوش قسمت شخص بنادیا مجھے ایک طویل عرصے کے دوران ایسی خوشی محسوس نہیں ہوئی، تم برے وقت میں میرے ساتھ کھڑی رہیں اورخوشی کے لمحوں کو بڑھایا۔

مزید پڑھیں: سارہ خان اور فلک شبیر کک شادی میں عثمان مختار کا کیا کردار؟

اداکار نے لکھا کہ تم میرے لیے چٹان اور سہارا بنی رہیں، میں ایک خوش قسمت انسان ہوں۔ انہوں نے اپنی پوسٹ میں دنیا بھر کو مخاطب کرتے ہوئے مزید لکھا کہ ڈیئر ورلڈ، میں نے آج چھوٹی سی تقریب میں سماجی فاصلوں کو برقرار رکھتے ہوئے شادی کی، ہماری شادی کی تقریب کا انعقاد 2 اپریل کو کیا گیا تھا لیکن یکم اپریل سے لگائے جانے والے لاک ڈاؤن کے باعث ہمیں شادی کی تقریب کا انعقاد پہلے ہی کرنا پڑا۔ اداکار نے اپنی پوسٹ میں مزید لکھا کہ ہم سب سے ٹیسٹ کروا لیا تھا اور تمام احتیاطی تدابیر کو فولو کیا، ہمیں آپ کی دعاؤں اور نیک تمناؤں کی ضرورت ہے۔