آئمہ بیگ کنسرٹ کے دوران لڑکے کے نازیبا اشاروں پر برہم ہوگئیں

پاکستان کی معروف گلوکار آئمہ بیگ نے میوزک کنسرٹ کے دوران بدتمیزی کرنے والے کو سبق سکھا دیا۔ یہ ناخوشگوار واقعہ لاہور میں نجی کالج کے میوزک کنسرٹ کے دوران پیش آیا۔

اس کنسرٹ میں گلوکارہ کی پرفارمنس دیکھنے کے لئے بھاری تعداد میں لڑکے اور لڑکیوں نے شرکت کی۔ کنسرٹ کے شرکاء ان کے گانوں کو انجوائے کر رہے تھے کہ یکدم آئمہ بیگ برہم ہوگئیں۔ گلوکارہ کی یہ برہمی دراصل ایک لڑکے پر تھی جو کنسرٹ کے دوران ان کو نازیبا اشارے کر رہا تھا ۔ آئمہ بیگ کی جانب سے اس لڑکے کو جھاڑ پلانے کی یہ ویڈیو سوشل میڈیا پر وائرل ہوگئی۔

مذکورہ ویڈیوز میں آئمہ بیگ نامناسب اشارے کرنے والے لڑکے پر برہمی کا اظہار کرتے ہوئے دکھائی دے رہی ہیں۔انہوں نے اس لڑکے کو گندا کیڑا قرار دیا ان کا کہنا تھا کہ میں لاہوری ہوں اور ایسے اشاروں سے ڈرنے والی ہرگز نہیں ہوں۔ اس کے بعد کنسرٹ میں موجود افراد نے اس لڑکے کے خلاف نعرے بازی شروع کردی۔ جبکہ گلوکارہ کی مذکورہ ویڈیو سوشل میڈیا پر وائرل ہونے کے بعد ٹوئٹر اور انسٹاگرام پر آئمہ بیگ کا ہش ٹیگ ٹاپ ٹرینڈ بھی بن گیا۔

اس سے قبل بھی آئمہ بیگ کے کنسرٹ کی ایک ویڈیو وائرل ہوئی تھی جس میں اسٹیج کے قریب کھڑے اوباش لڑکے ان سے بد تمیزی سے پیش آرہے تھے ، ویڈیو میں آئمہ بیگ پیچھے ہٹتے ہوئے کہہ رہی ہیں کہ “دیکھو اگر بدتمیزی کروگے تو میں واپس چلی جاؤں گی”۔ آئمہ بیگ کو غصے میں دیکھ کر وہاں موجود شائقین ‘سوری سوری ‘کے نعرے لگانے لگتے ہیں۔ جس پر گلوکارہ کہتی ہیں کہ “میں آپ کے لیے آئی ہوں تو پرفارم کرکے جاؤں گی، کسی ایک کی وجہ سے جو سارے یہاں اچھے لوگ کنسرٹ انجوائے کرنے آئے ہوئے ہیں اُن کے ساتھ یہ برا ہوجائے گا۔”

شائقین کی تفریح کے لئے منعقد ہونے والے ان میوزیکل کنسرٹ میں اکثر اوقات ناخوشگوار واقعات رونما ہوجاتے ہیں جس سے ناصرف شائقین بلکہ گلوکاروں کو بھی پریشانی کا سامنا کرنا پڑتا ہے۔ ان کنسرٹ میں رش کی وجہ سے دھکم پیل و شور شرابہ ہونا تو عام سی بات ہے لیکن حالیہ کچھ واقعات میں یہ دیکھا گیا ہے کہ میوزک کنسرٹس کے دوران بعض شائقین اپنی حرکتوں سے باز نہیں آتے اور ناصرف خواتین بلکہ گلوکاروں کے ساتھ بھی بدتمیزی کرتے ہیں جس کی وجہ سے کنسرٹ ختم ہو جاتا ہے اور دوسرے لوگ بھی انجوائے کئے بغیر گھر واپس چلے جاتے ہیں۔

مزید پڑھیں: گلوکارہ آئمہ بیگ ایف بی آر کی ساڑھے آٹھ کروڑ کی نادہندہ نکلیں، نوٹس جاری

خیال رہے کہ سیاسی جلسوں میں خواتین کے ساتھ بدتمیزی کے واقعات کے بعداب میوزک کنسرٹس کے دوران شائقین کی جانب سے گلوکاروں کے ساتھ بھی بدتمیزی کے واقعات عام ہوچکے ہیں۔ اس حوالے سے گزشتہ دنوں عاصم اظہر کی بھی ایک ویڈیو سوشل میڈیا پر وائرل ہوئی جس میں گلوکار کنسرٹ کے دوران گانا روک کر چند نوجوانوں کو ڈانٹتے ہوئے نظر آئے۔ ویڈیو میں عاصم اظہر نے کہا کہ نیا سال منانے آئے ہو خوشی سے مناؤ ،اگر مجھے اب کوئی بھی فیملیز کے ساتھ بدتمیزی کرتا ہوا نظر آیا تو وہ سیدھا باہر جائے گا۔ گلوکارکے اس اقدام کو سوشل میڈیا پر بہت زیادہ سراہا گیا۔