حالیہ دنوں میں بالی ووڈ کی نئی نویلی جوڑی عالیہ بھٹ اور رنبیرکپور کی جانب سے اپنے ہاں پہلے بچے کی آمد کی خوشخبری سنائی گئی تاہم اس خبر کے منظرعام پر آنے کے بعد میڈیا میں من گھڑت افواہیں بھی پھیلیں جس کے خلاف پاکستانی اداکارہ زارا نور عباس اور درفشاں سلیم نے اپنے خیالات کا اظہار کردیا۔
واضح رہے کہ عالیہ بھٹ کی جانب سے اپنے ہاں پہلے بچے کی آمد کی خوشخبری سے متعلق پوسٹ کے بعد جہاں ایک جانب مبارک باد کا نہ ختم ہونے والا سلسلہ شروع ہوا وہیں ان کا نام ٹوئٹر پر ٹاپ ٹرینڈ بن گیا۔ اس حوالے سے کچھ جھوٹی افواہیں بھی گردش کرنے لگی تھیں جن سے متعلق عالیہ بھٹ نے ردعمل دینا ضروری سمجھا۔
اداکارہ نے انسٹاگرام اسٹوریز میں شوبز ویب سائٹ ‘پنک ولا’ کی ایک پوسٹ شیئر کی جس میں یہ دعویٰ کیا گیا تھا کہ عالیہ بھٹ جولائی کے وسط میں ممبئی واپس آجائیں گی، رنبیر کپور اپنی بیوی کو گھر واپس لانے کے لیے برطانیہ جائیں گے اور عالیہ بھٹ شوٹ سے واپس آنے کے بعد آرام کریں گی۔
اس پوسٹ پر سخت ناراضی کا اظہار کرتے ہوئے عالیہ بھٹ نے لکھا تھا کہ ’کچھ لوگوں کے ذہنوں میں ہم اب بھی ایک پدرانہ معاشرے میں رہتے ہیں، کچھ بھی موخر نہیں ہوا ہے اور نہ ہی کسی کو مجھے لینے آنے کی ضرورت ہے، میں عورت ہوں، کوئی پارسل نہیں‘۔
انسٹاگرام پر عالیہ بھٹ کی اسٹوری کو ری پوسٹ کرتے ہوئے زارا نور عباس نے کہا کہ ’میں سمجھی کہ صرف پاکستانی ہی ایسا سوچتے ہیں، خاص طور پر جب برینڈ نے مجھے اس وجہ سے کام دینا ختم کردیا جب انہیں پتا چلا کہ میرے ہاں بچے کی پیدائش متوقع ہے، جب اداکارہ حاملہ ہو تو معاشرے کو یہ لگتا ہے یہ اب کسی کام کے قابل نہیں رہی‘۔انہوں نے مزید کہا کہ’خواتین ہر چیز اور کام میں ماہر ہوتی ہیں، وقت آگیا ہے کہ اپنا فیصلہ دوسروں پر تھوپنے والوں کو یہ بات سمجھ آجائے‘۔
عالیہ بھٹ کی پوسٹ پر پاکستانی اداکارہ زارا نور عباس نے کہا کہ ’ہمیں اپنی ممتا اور ہنر کا ثبوت کسی پدرشاہی کو دینے کی ضرورت نہیں ہے‘۔
جبکہ اس ہی حوالے سے اداکارہ درفشاں سلیم نے بھی عالیہ بھٹ کی انسٹاگرام اسٹوری کو شیئر کرتے ہوئے لکھا کہ ’ہم شادی کر سکتے ہیں، بچے پیدا کر سکتے ہیں اور اس کے باوجود غیرمعمولی کام کر سکتے ہیں۔ انہوں نے لکھا کہ ’شادی زندگی کا ایک حصہ ہے، رکاوٹ نہیں، لوگوں کو خواتین کو یہ بتانے کی ضرورت نہیں کہ ان کے پیشہ ورانہ اہداف اس کے ساتھ مطابقت نہیں رکھتے‘۔
خیال رہےکہ رنبیر کپور اور عالیہ بھٹ کی شادی کی تقریبات 13 اپریل کو ممبئی میں شروع ہوئی تھیں، جس میں دونوں کے قریبی دوست اور اہل خانہ سمیت کاروباری اور معروف شخصیات نے بھی شرکت کی تھی۔
0 Comments