سخت گرمی، دھوپ اور پسینہ۔۔۔ جلد کی حفاظت کیسے کریں ؟

گرمیوں کا موسم انسانی جلد کے لئے نقصان دہ ثابت ہوتاہے ۔ گرمی کی حدت سے بار بار پسینہ آنے کی وجہ سے جلد چکنی ہو جاتی ہے جو چہرے پر کیل مہاسے، دانوں اور داغ دھبوں کا بھی سبب بنتی ہے ۔ایسے میں سوال یہ اٹھتا ہے کہ اس شدید گرمی میں اپنی جلد کا خیال کیسے رکھا جائے؟ ہم اپنی جِلد کی نوعیت کے حساب سے اس کا خیال رکھ سکتے ہیں مثلاً:

آئلی اسکن : گرمی میں آئلی اسکن والوں کی جلد سے زیادہ روغن کا اخراج ہوتا ہے اس لئے گرمیوں میں ہیوی کریم، لوشن اور روزانہ میک اپ کا استعمال آپ کی جِلد کو نقصان پہنچا سکتا ہے لہٰذا اگر ان چیزوں کے استعمال سے گریز کیا جائے تو بہتر ہوگا، اس کے علاوہ دن میں دو سے تین مرتبہ کسی اچھے میڈیکیٹڈ فیس واش سے چہرہ دھونا چاہیئے تاکہ مسام میں پسینہ اور آئل جذب نہ ہو جو بعد میں دانوں کا سبب بنے۔

خشک جلد: کچھ لوگوں کی جلد خشک ہوتی ہے اورگرمی کی حدت کے سبب ان کی جلد پر دھبے ہوجاتے ہیں، لہٰذا خشک جلد والوں کو اس موسم میں لائٹ موئسچرائزر یا واٹر بیس موئسچرائزر کا استعمال کرنا چاہیے تاکہ وہ جو جلد از جلد جذب ہوجائے اور جلد کو گرمی کی شدت سے بچاسکے۔

حساس جلد: جبکہ حساس جلد والوں کے چہرے پر کیل مہاسے ، دانے بہت جلد نکل آتے ہیں اس لئے ان کو گرمی میں کریموں اور لوشن کا استعمال بالکل ترک کردینا چاہیے اور دن میں دوبارہ کسی اچھے فیس واش سے چہرہ دھونا چاہیے۔

ہماری اسکن چاہے آئلی ہو، خشک یا حساس موسم گرما میں اس کی حفاظت کرنا اور زیادہ ضروری ہوجاتا ہے کیونکہ تیز دھوپ اور شدید گرمی پڑنے کی وجہ سے جلد سے پسینے کا اخراج زیادہ ہوتا ہے جس سے ہماری جلد بے رونق ہوجاتی ہے لہٰذا اس کے لئے یہ ضروری نہیں ہے کہ ہم اپنی جلد پر مہنگی کریمزاور فیس واش ہی استعمال کریں بلکہ روزمرہ روٹین میں بھی ذراسی توجہ دیکر ہم اپنی جلد تروتازہ رکھ سکتے ہیں۔

جلد کی حفاظت کیلئے کارآمد ٹپس
اپنی جلد کو مناسب نمی فراہم کرنے کے لیے روزانہ کم از کم آٹھ گلاس پانی ضرور پئیں۔ یاد رکھیں کہ آپ کے چہرے کو شگفتہ اورشاداب رکھنے کے لئے پانی سے بہتر کوئی ٹانک نہیں اس لیے وافر مقدار میں پانی کا استعمال کرنا چاہیے۔

گرمیوں میں جلد کی اچھی صحت کے لیے دھوپ، اسٹیم یا گرم پانی سے غسل کرنا بھی مضر ہے لہٰذا ان سے بھی حتیٰ الامکان بچنے کی کوشش کریں۔

نہانے کے بعد موئسچرائزنگ لوشن استعمال کریں۔ موائسچرائز کو دن کے وقت کم جب کہ رات کو سوتے وقت زیادہ استعمال کریں۔

اگر آپ کی جلد حساس ہے تو بہتر یہی ہے کہ ان کاسمیٹکس پروڈکٹ کا استعمال کریں جو آپ کی جلد کی حساسیت کے عین مطابق ہیں، اس سلسلے میں آپ اپنے اسکن کیئر اسپیشلسٹ سے رجوع کریں۔

گرمی میں جلد کو تروتازہ رکھنے کیلئے ٹماٹر کا استعمال بھی مفید ثابت ہوتا ہے ایک ٹماٹر کو دو ٹکڑوں میں کاٹ لیں اور اپنے چہرے پر 10 سے 15 منٹ کے لئے رگڑیں،یہ ہماری جلد سے اضافی تیل کو ختم کرکے قدرتی چمک دیتاہے۔

ہفتے میں ایک بار اپنے چہرے اور گردن کی جلد کا فیشل ضرور کریں۔

ہمیشہ ایس پی ایف کے ساتھ فاؤنڈیشن استعمال کریں تاکہ جلد دھوپ کے مضر اثرات سے محفوظ رہے۔

باہر نکلنے سے پہلے سن اسکرین کو اپنی گردن، ہاتھوں اور جلد کی ہر اس جگہ پر لگائیں جہاں دھوپ پڑ سکتی ہے۔

اچھی اسکن کے لیے پھلوں اور دودھ کو اپنی خوراک میں ضرور شامل رکھیں۔