وینا ملک جھوٹی ہے، مولانا طارق جمیل کو بھی دھوکہ دیا، سابقہ شوہر کا الزام

اداکارہ وینا ملک کے سابقہ شوہر اسد بشیر خٹک نے اپنی سابق اہلیہ کو بچوں کو دبئی سے پاکستان اسمگل کرنے اور بدنام کرنے کے الزامات کے تحت 50 کروڑ روپے ہرجانےکا نوٹس بھجوایا اور اب انہوں نے حالیہ انٹرویو میں انکشاف کیا ہے کہ اداکارہ وینا ملک جھوٹی ہیں اور انہوں نے مولانا طارق جمیل کو بھی دھوکہ دیا۔

واضح رہے کہ وینا ملک کے سابق شوہر نے گزشتہ دنوں سماجی رابطے کی ویب سائٹ پر جاری سلسلہ وار ٹوئٹس میں اپنی سابق اہلیہ پر الزامات لگائے ہیں، اپنی ایک ٹوئٹ میں اسد بشیر خٹک نے وینا ملک پر الزام لگایا ہے کہ انہوں نے غیر قانونی طور پر ان کے بچوں کو پاکستان اسمگل کیا ہے۔ انہوں نے اپنی ٹوئٹ میں لکھا کہ بہت سوچا لیکن اب صبر کا پیمانہ لبریز ہوچکا ہے، میری خاموشی کو بزدلی سمجھا گیا، مجھے اُمید ہے کہ ایک باپ کو انصاف ملے گا کیونکہ اللہ کے ہاں دیر ہے اندھیر نہیں۔ مزید کہا کہ انہوں نے بچوں کی خاطر ہر چیز برداشت کی، لیکن اب وقت آ گیا ہے کہ ان کی سابق اہلیہ کی اصلیت سب کے سامنے لائی جائے۔

اس مذکورہ نوٹس میں پاکستانی اداکارہ وینا ملک کو معافی مانگنے اور تنازعہ کو خوش اسلوبی سے حل کرنے یا عدالتی کارروائی کا سامنا کرنے کے لئے 10 دن کی مہلت دی گئی ہے۔

ٹوئٹرپر اپنے بچوں کی دستاویزات شیئر کرتے ہوئے، اسد بشیر خٹک نے پاکستان کی وزارت داخلہ اور ایف آئی اے اور دیگر ایجنسیوں سے بھی درخواست کی کہ وہ وینا ملک کے خلاف فوری کارروائی کریں۔

اس کے علاوہ ، انہوں نےیہ بھی بتایاکہ ان کے دونوں بچے امریکی شہری ہیں۔ وینا ملک نے نہ صرف ان کے ساتھ دھوکہ کیا بلکہ بچوں کو پاکستان لانے میں دبئی کی حکومت کو بھی دھوکہ دیا ہے۔

اس حوالے سے حال ہی ہونے والے ایک انٹرویو میں اسد بشیر خٹک نے یہ انکشاف کیا ہے کہ اداکارہ وینا ملک “ڈرامہ کوئین ہیں“ اور انہوں نے انہیں طلاق کے وقت بھی اغواءکرلیا تھا اور اس واقعے کے بارے میں مولانا طارق جمیل اور ان کے ایک دوست بھی گواہ ہیں کہ انہیں گن پوائنٹ پر ایک مکان میں رکھا گیا تھا۔

اس انٹرویو کے دوران میزبان وینا ملک کے سابقہ شوہر اسد بشیر خٹک سے پوچھتے ہیں کہ ان کا رشتہ کہاں خراب ہوا، جس پر وہ جواب دیتے ہیں کہ “ یہ عورت شروع سے ہی خراب تھی اور میں اس سے شادی کے ٹھیک دو ماہ بعد اس کو طلاق دینا چاہتا تھا۔ اس نے لندن میں مجھ پر فزیکل اٹیک بھی کیا اور اس وقت میں نے مولانا طارق جمیل کو فون کیا اور ان سے کہا کہ میرے لئے اس عورت کے ساتھ رہنا ممکن نہیں یہ ایک پاگل عورت ہے۔”

مزید انکشاف کرتے ہوئے انہوں نے بتایا کہ مولانا طارق جمیل نے مجھ سے کہا کہ، “اسد، آپ نے شوبز کی عورت سے شادی کی ہے اسے کچھ وقت دو تاکہ وہ سیدھے راستے پر آجائے، اللہ آپ کو صبر کا اجر دے گا۔ “مولانا طارق جمیل نے یہاں تک کہا کہ “آپ نے اس سے شادی کرکے دنیا میں جنت کمالی ہے کیونکہ کسی کے پاس اتنا جگرا نہیں کہ اس جیسی عورت سے شادی کرے”۔

اپنی طلاق کے بارے میں بات کرتے ہوئے وہ کہتے ہیں کہ وینا ملک نے بتائے بغیر ان سے طلاق لے لی اور اس دوران بیوی ہونے کا دیکھاوا کرتی رہیں ، پھر انہیں امریکہ بھیج دیا گیا، اور جب وہ واپس آئے تو وینا ملک پہلے ہی طلاق کے کاغذات جمع کراو چکی تھیں۔

انٹرویو میں انہوں نےمزیدکہا کہ ، “مولانا طارق جمیل اس کے گواہ ہیں اور اس کے ساتھ دو دیگر افراد بشمول بلبلے ڈرامے کےاداکار نبیل ظفر بھی۔ اس کے علاوہ جب ہمارے درمیان مصالحت ہوئی تب بھی وینا ملک نے نہ صرف مجھے بلکہ مولانا طارق جمیل اور پورے پاکستان کو دھوکہ دیا کیونکہ وینا ملک نے طلاق کے جو کاغذات جمع کروائے تھے وہ کبھی واپس ہی نہیں لئے اور اس سارے معاملے کے دوران وہ مسلسل جھوٹ بولتی رہی۔”

ان تہلکہ خیز انکشافات سے قبل ،اسد بشیر خٹک نے ٹوئٹر پر اپنی سابق اہلیہ کی ایک مبینہ آڈیو بھی شیئر کی تھی، جس میں وینا ملک نے انہیں مبینہ طور پر گالیاں دینے سمیت دھمکیاں بھی دی تھیں۔ تاہم اس بات کی آزادانہ تحقیق نہیں ہوسکی تھی کہ مذکورہ آڈیو وینا ملک کی ہی ہے یا وہ ایڈٹ شدہ آڈیو ہے۔