تعلیمی اداروں کو ایک بار پھر سے مرحلہ وار کھولنے کا فیصلہ

بین الصوبائی وزرائے تعلیم کانفرنس نے ملک بھر کے تعلیمی اداروں کو ایک بار پھر سے 18 جنوری سے طے شدہ ضابطہ کار (ایس او پیز) کے ساتھ کھولنے کا فیصلہ کرلیا گیا ہے۔ پہلے مرحلے میں یعنی 18 جنوری نویں، دسویں، گیارہویں اور بارہویں جماعتوں میں تعلیمی سلسلے کو پھر سے بحال کیا جائے گا۔

تفصیلات کے مطابق ملک بھر میں ایک بار سے تعلیمی سرگرمیوں کو بحال کرنے سے متعلق نیشنل کمانڈ اینڈ آپریشن سینٹر (این سی او سی) کا اجلاس ہوا، جس میں وفاقی اور صوبائی وزرائے تعلیم، معاون خصوصی برائے صحت نے شرکت کی، اجلاس کی سربراہی وفاقی وزیر تعلیم شفقت محمود نے کی، جہاں ملک بھر میں تعلیمی سرگرمیوں کو ایک بار پھر سے مرحلہ وار بحال کرنے پر اتفاق ہوا۔

اجلاس کے بعد وفاقی وزیر تعلیم شفت محمود نے اسلام آباد میں میڈیا سے گفتگو کرتے ہوئے بتایا کہ کورونا وائرس کی وباء کی باعث بند شدہ تمام تعلیمی اداروں میں ایک بار پھر سے تعلیمی سرگرمیوں کو بحال کرنے کا فیصلہ کیا گیا ہے، اس سلسلے میں تمام تعلیمی اداروں کو مرحلہ وار کھولا جائے گا، پہلے مرحلہ 18 جنوری سے شروع ہوگا، جس میں سب سے پہلے نویں، دسویں، گیارہویں اور بارہویں جماعتوں کے لئے تعلیمی سرگرمی آغاز کیا جائے گا جبکہ پہلی جماعت سے آٹھویں جماعت تک کی تعلیمی سرگرمیاں یکم فروری سے شروع ہوں گی۔

میڈیا سے گفتگو کرتے ہوئے وفاقی وزیر تعلیم شفقت محمود نے مزید بتایا کہ ہائر ایجوکیشن یعنی جامعات میں بھی تعلیمی سرگرمیاں یکم فروری سے شروع کی جائیں گی۔ جبکہ امتحانات کے حوالے وفاقی وزیر کا کہنا تھا کہ تعلیمی ادارے بند ہونے سے تعلیم کا بےحد نقصان ہوا ہے، طلباء میں سیکھنے کی صلاحیت میں واضح اثر پڑھا ہے تاہم اس بار کسی بھی بچے کو امتحان کے بغیر پاس نہیں کیا جائے گا۔

وفاقی وزیر تعلیم شفقت محمود کے مطابق اگلے ہفتے این سی او سی کے اجلاس میں تمام صورتحال پر ایک بار سے پھر سے غور کیا جائے گا. جن شہروں میں انفیکشن کا ریٹ زیادہ ہوگا وہاں پر غور کیا جائے گا کہ تعلیمی اداروں کو کھولا جائے کہ نہیں، کیونکہ چھوٹی کلاسز کو کھولنے سے قبل انفیکشن کا تناسب دیکھنا ضروری ہوگا، مکمن ہے جن شہروں میں انفیکشن ریٹ زیادہ ہو، وہاں چھوٹی کلاسز نہ کھولی جائیں البتہ جہاں کم ہوگا وہاں کھول دی جائیں گی۔

کورونا وائرس کے اعداد وشمار پر بات کرتے ہوئے وفاقی وزیر شفقت محمود نے بتایا کہ جب چند ماہ قبل ستمبر کے مہینے سے تعلیمی اداروں کو کھولنے کا فیصلہ کیا گیا تھا، اس وقت کورونا وائرس کی مثبت شرح 1.9 کے قریب تھی، لیکن جب 26 نومبر کو تعلیمی اداروں کو ایک بار پھر سے بند کرنے کا فیصلہ کیا گیا تو کورونا وائرس کی مثبت شرح 7.14 تک جاپہنچی تھی جوکہ اب کم ہوکر 6.10 تک آ پہنچی ہے۔

یاد رہے تقریباً 4 ماہ کے بعد ایک بار پھر سے ملک بھر میں معطل شدہ تعلیمی اداروں کو ایس او پیز کے ساتھ کھولنے کا فیصلہ کرلیا گیا ہے، کورونا وائرس کے خطرے کے پیش نظر گزشتہ برس فروری میں تعلیمی ادارے بند کئے گئے تھے، جسے ستمبر میں دوبارہ کھولا گیا تھا تاہم بڑھتے ہوئے کیسز کو دیکھتے ہوئے انہیں دوبارہ بند کردیا گیا تھا۔