حبس اور شدید گرمی،ایسے میں پسینے کی بُو سے کیسے نجات پائیں؟

موسم گرما میں ہر گزرتے دن کے ساتھ درجہ حرارت میں اضافے کا ہی امکان ہے۔ گرمی اور حبس کا موسم ہے ایسے میں پسینہ آنا ایک قدرتی عمل ہے جو جسم کو ٹھنڈا رکھنے میں مدد دیتا ہے تاہم اکثر افراد میں یہ جسمانی بو کا باعث بنتا ہے۔ ویسے یہاں یی جاننا ضروری ہے کہ پسینہ میں کوئی بو نہیں ہوتی درحقیقت سطح پر موجود بیکٹریا کا رابطہ پسینے سے ہوتا ہے تو جسمانی بو پیدا ہوتی ہے۔ لہٰذا اگر اس موسم میں اگر آپ کو بہت زیادہ پسینہ آتا ہے یا آپ کو اس کی بُو کے مسئلے کا سامنا رہتا ہے تو اس سے نجات اب بہت آسان ہے اور یہ آسان طریقے یہاں بتائے جارہے ہیں۔

بیکنگ سوڈا

بیکنگ سوڈا جسمانی بُو کی روک تھام میں مدد دیتا ہے، بیکنگ سوڈا اور پانی کا پیسٹ بنائیں اور اسے مختلف حصوں جیسے بغلوں، پیروں اور ہاتھوں پر لگانا بو پیدا کرنے والے بیکٹریا کے خلاف مزاحمت کرتا ہے۔

عرق ِگلاب

عرق گلاب ناگوار بدبو کو دور کرنے کا سب سے پُرانا اور قدیمی نسخہ ہے عرق گلاب کو نہانے کے پانی میں شامل کرنا پسینے سے پیدا ہونے والی بو کو دور کرتا ہے۔ یہ قدرتی طور پر ٹھنڈک پہنچانے میں مددگار اور فطرت کا پرفیوم ہے۔

پھٹکری

جسم کی بدبو کو دور کرنے میں پھٹکری بھی کار آمد ثابت ہوتی ہے ۔ایک چائے کے چمچ پھٹکری کا نہانے کے پانی میں اضافہ بھی اس حوالے سے مدد دیتا ہے، اس میں پودینے کے چند پتوں کو بھی پیس کر شامل کریں۔

لیموں

ایسڈک اجزاء سے بھرپور لیموں میں بے شمار خواص اور فوائد موجود ہوتے ہیں یہ بیکٹیریاز کو فوراً ختم کرنے کی صلاحیت رکھتا ہے پسینے کی بد بو سے بچنے کے لیے  پانی میں چند قطرے لیموں کا عرق ڈال کر نہانے سے پسینے کی بدبو ختم ہو جائے گی۔

ٹی ٹری آئل

اس آئل کے 2 قطرے اس تیل کو 2 کھانے کے چمچ پانی یا عرق گلاب میں شامل کریں اور اسے روئی کی مدد سے بغلوں پر لگالیں۔

روز میری

یہ اینٹی بیکٹیریل جڑی بوٹی کہلاتی ہے۔ روزمیری تیل کو براہ راست اپلائی کرنے سے ناخوشگوار مہک سے فوری نجات ملتی ہے۔

کلون

نہانے کے پانی میں کلون کا اضافہ کرنا بھی اس حوالے سے مددگار ثابت ہوسکتا ہے۔ نہانے کے آخر میں کلون کی کچھ مقدار پانی میں ملائیں اور جسم پر ڈال لیں ۔ یہ عمل بُو دور کرنے کیساتھ جسم کو ٹھنڈک بھی پہنچاتا ہے۔

مزید پڑھیں: ریت کے طوفان کیوں آتے ہیں؟ سعودی عرب، عراق، کویت، ایران اس کی لپیٹ میں کیوں ہیں؟

بے بی پاؤڈر

بے بی پاؤڈر چونکہ بچوں کے لیے تیار کیا جاتا ہے اس لیے اس میں اہم اور خالص اجزاء شامل کیے جاتے ہیں۔ اس لیے یہ پسینے کی بدبو کو لمبے عرصہ تک ختم بھی کرسکتا ہے۔

صندل پاؤڈر

یہ پاؤڈر اپنی قدرتی دلفریب خوشبو کی بدولت کافی پسند کیا جاتا ہے۔اس پاؤڈر کو پانی کے ساتھ ملا کر پیسٹ تیار کرلیں اور اسے انڈرآرم میں لگائیں اور خشک ہونے تک چھوڑ دیں پھر صاف پانی سے دھولیں۔ اس کے علاوہ سفید سرکہ میں صندل کا پاؤڈر یا تیل شامل کرکے بھی استعمال کیا جاسکتا ہے۔