اسکواش پلیئر زہاب خان کا نام گنیز بک میں شامل

پاکستانی اسکواش پلیئر زہاب کمال خان کھیل کے ساتھ ساتھ اپنی دراز زلفوں کی وجہ سے بھی شہرت رکھتی ہیں اور انہیں معروف کریکٹر “رپینزل ” سے تشبیہ دی جاتی ہے۔

بلاشبہ فیشن اور بناؤ سنگھار میں بھی لمبی گھنی زلفوں کو حسن کی علامت سمجھا جاتا ہے اور ہر خاتون کی خواہش ہوتی ہے کہ اس کے بال لمبے ہوں لیکن زہاب کمال خان اس لئے اپنے بال لمبے کررہی تھیں کہ وہ گینز بک آف ورلڈ میں اپنا نام درج کرواکر پاکستان کا نام بلند کرسکیں۔ اپنے اس مقصد میں اب وہ کامیاب ہوگئی ہیں اور انہوں نے منفرد عالمی ریکارڈ بناکر ایک انوکھی مثال قائم کی ہے۔

میڈیا رپورٹ کے مطابق امریکا کی ریاست ورجینیا میں مقیم 30 سالہ پاکستانی اسکواش پلیئر زہاب کمال خان نے اپنے 6 فٹ 3 انچ لمبے بال عطیہ کرکے ورلڈ ریکارڈ قائم کرلیا۔

جبکہ اس سے قبل وہ اپنے لمبے بالوں میں گیارہ سو ہیئرکلپس لگانے کا ریکارڈ بھی قائم کرچکی ہیں جس کی بنیاد پر ان کا نام گنیز بک آف ورلڈ ریکارڈ میں شامل کیے جانے کا یہ دوسرا موقع ہے۔

مزید پڑھیں: کم عمر مارشل آرٹس فاطمہ نسیم نے پھر نئی تاریخ رقم کردی

زہاب کمال خان نے اپنے بال بچوں کیلئے وگ تیار کرنے والے فلاحی ادارے کو عطیہ کیے ہیں۔ بالوں کی کٹنگ کے دوران گنیز بک آف ورلڈ ریکارڈ کی ٹیم نگرانی کیلئے موجود تھی۔ انہوں نے اپنے آفیشل انسٹا پیج پر بال کٹوانے کے بعد انہیں ہاتھ میں پکڑ کر تصویر پوسٹ کی جس کا کیپشن لکھا کہ ‘ کسی فرد واحد کی جانب سے سب سے لمبے بالوں کا عطیہ’، یہ ورلڈ ریکارڈ بنانے پر زہاب کمال خان کا کہنا تھا کہ ‘میں اپنے چھوٹے بالوں کو دیکھ کر خوشی وگھبراہٹ کی ملی جلی کیفیت کا شکار ہوں لیکن میں اپنے لمبے بالوں کی کمی محسوس کروں گی۔’اسکواش پلیئر کے مطابق انہوں نے بال عطیہ کرنے سے پہلے گنیز  ورلڈ ریکارڈ  انتظامیہ سے گفتگو کی کیوں کہ اس سے قبل اتنے لمبے بال کسی فرد کی جانب سے بال عطیہ نہیں کیے گئے تھے۔

واضح رہے کہ اسکواش پلیئر نے اپنے والد کی تجویز پر عالمی ریکارڈ قائم کرنے کی غرض سے 13 برس کی عمر سے اپنے بال نہیں کٹوائے تھے، اب انہوں نے 17 سال بعد پہلی مرتبہ اپنے بال کٹوائے ہیں تاکہ بال عطیہ کرسکیں اسکواش پلیئر کو انفرادی اعتبار سے سب سے زیادہ بال عطیہ کرنے کا اعزاز بھی حاصل ہوگیا ہے۔

مزید پڑھیں: ام کلثوم اور زہرا عبداللہ پاکستان اسکواش کے دو ابھرتے ہوئے ستارے

علاوہ ازیں ، سوشل میڈیا پر بھی زہاب کمال خان کے بال کٹوانے کی ویڈیو تیزی سے وائرل ہو رہی ہے جس میں انہیں پہلے لمبے اور  پھر چھوٹے بالوں میں دیکھا جاسکتا ہے۔

خیال رہے کہ پاکستانی اسکواش پلیئر زہاب کمال خان نے 15 سال کی عمر سے اسکواش کھیلنے کا آغاز کیا جبکہ وہ 2018 میں سندھ اسکوش چیمپئن شپ جیتنے کا اعزاز بھی رکھتی ہیں۔