سوشل میڈیا پر علامہ اقبال کا مجسمہ زیرِ بحث

علامہ اقبال عظیم شاعر اور مفکر ہیں جنہوں نے بانگِ درا، ضربِ کلیم، بالِ جبرل، زیور عجم، پیام مشرق، شکوہ، جوابِ شکوہ جیسے بہترین ادب کے ذریعے برصغیر کے مسلمانوں میں انقلابی روح پھونکی۔

پاکستان کو معرضِ وجود میں لانے کے لئے قائد اعظم کے ساتھ ساتھ ان کی خدمات قابل ستائش ہیں۔ لیکن آج کل سوشل میڈیا پر شاعرِ مشرق علامہ محمد اقبال کا ذکر ان کے فلسفیانہ شاعری کی وجہ سے نہیں بلکہ ان کے ایک مجسمے کی وائرل ہونے والی تصویر کی وجہ سے زبان زدعام وخاص ہے اور اس وقت پاکستان کے ٹوئٹر ٹرینڈ پینل پر علامہ اقبال سرفہرست ٹرینڈز میں موجود ہیں۔

مفکر پاکستان کا یہ مجسمہ لاہور کے گلشن اقبال پارک میں گزشتہ سال جشن آزادی کے موقع پر نصب کیا گیا تھا۔ اس مجسمے پر شدید تنقید کے ساتھ اس کا مذاق بھی اڑایا جارہا ہے، سوشل میڈیا صارفین کا کہنا ہے کہ مجسمہ علامہ اقبال کی شخصیت کی عکاسی کرنے میں بری طرح ناکام ہے۔

عوام کا مطالبہ ہے کہ شاعر مشرق کے اس مضحکہ خیز مجسمے کو بزدار حکومت توڑ ڈالے اور اسے نئے سرے سے بنایا جائے۔

عام عوام کے علاوہ نامور صحافی، سماجی و میڈیا شخصیات بھی اس مجسمے پر تبصرے کررہے ہیں۔

تاہم گلشنِ اقبال پارک انتظامیہ کے مطابق باغ کے مالیوں کو علامہ اقبال سے اتنی محبت تھی کہ انہوں نے اپنی مدد آپ کے تحت شاعرِ مشرق کا ایک مجسمہ بنا ڈالا۔ پارک انتظامیہ کا کہنا ہے کہ مالیوں کی حوصلہ افزائی کیلئے ہم نے یہ مجسمہ پارک میں نصب کردیا ہے جس کا مذاق نہیں اڑایا جانا چاہیئے۔

اس پر بھی سوشل میڈیا صارفین نے انتظامیہ کو آڑے ہاتھوں لیا اور کہا کہ مالیوں کا کام مجسمہ بنانا نہیں اور انہیں علامہ اقبال پر طبع آزمائی نہیں کرنی چاہیئے تھی۔

واضح رہے کہ یہ پہلا موقع نہیں کہ موجودہ حکومت کی جانب سے کسی قومی شخصیت کی عکاسی ایسے مضحکہ انداز سے کی گئی ہو بلکہ 2017 میں بھی پی ٹی آئی کے رہنماؤں کو سوشل میڈیا پر اس وقت تنقید کا سامنا کرنا پڑا تھا جب انہوں نے قائداعظم کے نام پر عجیب وغریب تصویر والا کیک کاٹا تھا۔

لاہور کے گلشنِ اقبال پارک میں نصب علامہ اقبال کا مجسمہ مالیوں کی تین ماہ کی انتھک محنت اور ان کی شاعر ِمشرق سے محبت وعقیدت کا اظہار ضرور ہے لیکن اس حقیقت سے انکار ممکن نہیں کہ یہ مجسمہ اقبال کی مفکرانہ شخصیت کی عکاسی بالکل نہیں کررہا، وہ کہتے ہیں نہ جس کا کام اسی کو ساجھے، ایک مجسمہ ساز ہی اپنی کاریگری سے کسی مجسمے کو حقیقت کا روپ دے سکتا ہے یہ کام ہر کسی کے بس کی بات نہیں!!