کیا چھٹی کے دن دیر سے اٹھنے کا کوئی فائدہ ہے؟

بیشتر افراد چھٹی کے دن زیادہ وقت تک سونا پسند کرتے ہیں اور سائنسدانوں نے اس عادت کے حیران کن فائدے دریافت کیے ہیں۔

Sleeping More On Weekends

دیر تک سونے سے ڈپریشن میں کمی

ایک حالیہ تحقیق کے مطابق ہفتہ وار چھٹی کے دن زیادہ دیر تک سونے والے افراد میں ڈپریشن جیسے مرض کا خطرہ نمایاں حد تک گھٹ جاتا ہے۔

یہ دلچسپ دعویٰ چین میں ہونے والی ایک تحقیق میں سامنے آیا۔

سینٹرل ساؤتھ یونیورسٹی کی تحقیق میں لگ بھگ 8 ہزار افراد کے ڈیٹا کی جانچ پڑتال کی گئی۔

تحقیق کے نتائج سے معلوم ہوا کہ 50 فیصد کے قریب افراد ہفتہ وار چھٹی کے موقع پر معمول سے زیادہ وقت تک سونے کے عادی ہوتے ہیں۔

جو افراد چھٹی کے دن ایک یا 2 گھنٹے زیادہ سوتے ہیں، ان میں ڈپریشن کی علامات سے متاثر ہونے کا خطرہ 46 فیصد تک کم ہو جاتا ہے۔

محققین نے بتایا کہ عام دنوں میں 6 گھنٹے سے کم وقت تک سونے والے افراد میں ڈپریشن کا خطرہ بڑھتا ہے، مگر ہفتہ وار تعطیل کے موقع پر زیادہ وقت تک سونے سے انہیں اس مسئلے سے بچنے میں مدد ملتی ہے۔

انہوں نے کہا کہ چھٹی کے دن 2 گھنٹے کی اضافی نیند دماغ کے لیے مفید ثابت ہوتی ہے اور ڈپریشن سے بچنے میں مدد ملتی ہے۔

:یہ بھی پڑھیں

کیا صرف 15 منٹ میں آپ کی صحت بہتر ہو سکتی ہے؟

دیر تک سونے سے ہارٹ اٹیک کا خطرہ کم

تحقیق میں بتایا گیا کہ اگر آپ عام دنوں میں نیند پوری نہیں کر پاتے مگر ہفتہ وار چھٹی کے موقع پر زیادہ سوتے ہیں تو امراض قلب بشمول ہارٹ اٹیک اور فالج کا خطرہ 20 فیصد تک گھٹ جاتا ہے۔

اس تحقیق میں لگ بھگ 91 ہزار افراد کے ڈیٹا کی جانچ پڑتال کی گئی۔

یوکے بائیو بینک سے حاصل کیے گئے ڈیٹا میں یہ دیکھا گیا تھا کہ لوگوں کی نیند اور امراض قلب کے درمیان کیا تعلق موجود ہے، خاص طور پر ہفتہ وار چھٹی کے موقع پر زیادہ دیر تک سونے سے صحت پر کیا اثرات مرتب ہوتے ہیں۔

ان افراد کو نیند کے دورانیے کے مطابق 4 گروپس میں تقسیم کیا گیا۔

ان میں سے 19 ہزار 8 سو سے زائد افراد کو نیند کی کمی کا شکار قرار دیا گیا جبکہ باقی ایسے تھے جو کبھی کبھار ناکافی وقت تک سوتے تھے، مگر انہیں نیند کی کمی کا شکار نہیں کہا جاسکتا تھا۔

ان افراد میں دل کی مختلف بیماریوں کے ڈیٹا کو بھی دیکھا گیا اور پھر ان سب کی صحت پر 14 سال تک نظر رکھی گئی۔

نتائج سے ثابت ہوا کہ ہفتہ وار چھٹی کے موقع پر زیادہ وقت سونے والے افراد میں امراض قلب کا خطرہ 19 فیصد تک گھٹ جاتا ہے۔

محققین نے بتایا کہ نتائج سے عندیہ ملتا ہے کہ نیند کی کمی موجودہ عہد میں کافی عام ہوچکی ہے مگر آپ چھٹی کے موقع پر زیادہ وقت تک سو کر امراض قلب کے خطرے کو کم کرسکتے ہیں۔