ایس آئی یو ٹی  نے پاکستان کی پہلی میڈیکل ویب سیریز کے شاندار پریمیئر کا انعقاد کیا۔

سندھ انسٹیٹیوٹ آف یورولوجی اینڈ ٹرانسپلانٹیشن [ایس آئی یو ٹی] نے پاکستان کی پہلی ہیلتھ کیئر پر مبنی ویب سیریز “Precision Meets Purpose” کا شاندار پریمیئر نیوپلیکس سنیما کراچی میں کیا۔ یہ منفرد اور پُراثر سیریز حقیقی مریضوں کے سفر کو اجاگر کرتی ہے—وہ افراد جو ایس آئی یو ٹی میں انتہائی پیچیدہ اور خطرناک بیماریوں کے ساتھ پہنچتے ہیں اور جدید روبوٹک سرجریز کے ذریعے اپنی زندگیوں میں نمایاں تبدیلی لاتے ہیں۔

مزید یہ کہ، یہ ویب سیریز نہ صرف مریضوں کی اصل کہانیوں پر مبنی ہے بلکہ یہ ملک بھر میں صحت کے مساوی  سہولیات کے بارے میں  ایک اہم  قومی مکالمہ  کو بھی جنم دیتی ہے ۔ اس کا بنیادی مقصد اس پیغام کو مضبوطی سے اجاگر کرنا ہے کہ جدید، عالمی معیار کے علاج ہر ضرورت مند انسان تک بلا امتیازاور بالکل مفت اور عزت نفس کے ساتھ پہنچنے چاہئیں۔ یہی وہ بنیادی فلسفہ ہے جس پر  ایس آئی یو ٹی برسوں سے عمل پیرا ہے۔ اسی تسلسل میں ادارے کی  سائنسی جدت، جدید ٹیکنالوجی کے بروقت استعمال اور بہترین طبی خدمات کا سفر آج بھی اسی جذبہ کے ساتھ جاری و ساری  ہے، اور روبوٹک سرجری کے شعبے میں بھی  یہ ادارہ ملک کا ایک نمایاں ترین سینٹر آف ایکسیلینس بن چکا ہے۔

‎اس ڈاکیومنٹری میں ایس آئی یو ٹی کے بانی و ڈائریکٹر ڈاکٹر ادیب رضوی نے اظہار کرتے ہوئے کہا کہ سائنس جامد نہیں بلکہ متحرک ہے، اس لیےایس آئی یو ٹی کو ہمیشہ نئی سمتوں اور نئی ٹیکنالوجیز پر نظر رکھنی ہوتی ہے۔ اگر ہم عزم کے ساتھ آگے بڑھتے رہیں اور نئی سرحدوں کو دریافت کرتے رہیں تو ہم مسلسل سیکھتے رہیں گے۔ سہولیات کی فراہمی عوام اور ادارے کی مشترکہ ذمہ داری ہے، اور جتنا زیادہ تعاون ہوگا، ہم اتنا ہی آگے بڑھ سکیں گے۔

مزید برآں، ڈاکٹر عرفان رضوی چیئرمین ڈیپارٹمنٹ آف سرجری، ورجینیا ہاسپٹل سینٹر (امریکہ) اور اس سیریز کے ایگزیکٹو پروڈیوسرنے کہا کہ ایسی ٹیکنالوجی استعمال میں لانی چاہیے  جو مریضوں کے علاج میں معاون ثابت ہو اور بہتر نتائج دے سکے۔ اور سب سے اہم بات یہ ہے کہ جدید ترین علاج عام سرکاری اسپتالوں تک پہنچے، جہاں زیادہ تر آبادی علاج کے لیے آتی ہے، تاکہ سب کواس طرز کے یکساں مواقع مل سکیں۔

دریں اثنا، ایس آئی یو ٹی کے سربراہ برائے روبوٹک سرجری ڈاکٹر ریحان محسن نے بتایا کہ ایس آئی یو ٹی پاکستان میں روبوٹک سرجری کا علمبردار ہے اور اب تک 4,000 سے زائد روبوٹک آپریشن مختلف شعبوں میں انجام دے چکا ہے۔ انہوں نے مزید کہا کہ “روبوٹک سرجریز روایتی اوپن سرجریز کے مقابلے میں پیچیدگیوں کے خطرات کو نمایاں طور پر کم کرتی ہیں، یوں مریضوں کو زیادہ محفوظ اور مؤثر علاج فراہم کرتی ہیں۔

یہ ویب سیریز سائمہ سلیم کےخیال پر مبنی اور معروف فلم ساز جامی کی ہدایت کاری میں تیار کی گئی ہے، جو ملک میں میڈیکل اسٹوری ٹیلنگ کے ایک نئے اور اہم باب کا آغاز ہے۔ نیوپلیکس میں منعقدہ خصوصی پریمیئر میں ماہرینِ صحت، سپورٹرز اور ایس آئی یو ٹی  کے دوستوں نے شرکت کی۔

آخر میں، یہ بات بھی قابلِ ذکر ہے کہ پریمیئر کے بعد یہ ویب سیریز معتبر او ٹی ٹی پلیٹ فارمز اور بڑے تفریحی چینلز پر دستیاب ہوگی، تاکہ زیادہ سے زیادہ لوگ اس معلوماتی اور بامقصد مواد تک رسائی حاصل کر سکیں۔

یہ تقریب نہ صرف پاکستان میں طبی آگاہی کے فروغ کا ایک اہم سنگِ میل ہے بلکہ وہ جدید سرجیکل ٹیکنالوجیز کی تیز رفتار ترقی کو بھی نمایاں کرتی ہے جو مستقبل کے طبی نظام کی بنیاد بن رہی ہیں۔