شہباز تاثیر کی معروف ماڈل نیہا راجپوت سے دوسری شادی

سابق گورنر پنجاب سلمان تاثیر کے بیٹے اور معروف بزنس مین شہباز تاثیر کی مقبول ترین ماڈل نیہا راجپوت سے شادی کی خبروں کی تصدیق ہوگئی ہے کیونکہ جوڑے کی مایوں کی تقریب کی تصاویر منظر عام پر آگئیں ہیں۔

گزشتہ چند ماہ سے ماڈل نیہا راجپوت اور شہباز تاثیر کے درمیان تعلقات تھے اور رواں برس مئی میں دونوں کو میڈیا کے سامنے بھی کئی بار ملتے دیکھا گیا۔ اسی وقت سے ہی ان کی شادی کی چہ مگوئیاں شروع ہوگئیں تھیں، اب ان تصاویر کو دیکھ کر اندازہ لگایا جاسکتا ہے کہ سوشل میڈیا پر پھیلی خبریں درست تھیں۔

شادی کے حوالے سے اس جوڑے نے اپنے سوشل میڈیا اکاؤنٹس پر کوئی اعلان نہیں کیا۔

ان کی وائرل ہونے والی تصویروں اور ویڈیوز میں نیہا راجپوت کو مایوں میں نارنجی شلوار قمیض اور شہباز تاثیر کو آف وائٹ کرتے شلوار میں ملبوس دیکھا جاسکتا ہے۔ جبکہ ان تصویروں میں دونوں ایک دوسرے کے ہمراہ خوش دیکھائی دے رہے ہیں۔

انسٹاگرام پر ماڈل کی جانب سے شیئر کی گئی ویڈیوز اور تصاویر میں ان کے ہمراہ ماڈل واداکارہ ابیر رضوی سمیت دیگر ماڈلز کو بھی دیکھا جاسکتا ہے جبکہ مایوں کی ویڈیو میں شہباز تاثیر بھی خوشگوارموڈ میں نظر آرہے ہیں نیز تقریبات میں دونوں کے اہل خانہ رقص بھی کر رہے ہیں۔

واضح رہے کہ شہباز تاثیر کی یہ دوسری شادی ہے اس سے قبل وہ 2010 میں معروف فیشن ڈیزائنر ماہین غنی کے ساتھ رشتۂ ازدواج میں منسلک ہوئے تھے لیکن اس جوڑے نے دسمبر 2019 میں راہیں جدا کرلی تھیں۔ اس جوڑے کی ایک بیٹی بھی ہے۔

تاہم علیحدگی کے بعد ماہین غنی کی طرف سے خاموشی رہی البتہ دسمبر 2020 میں شہباز تاثیر کی سابقہ اہلیہ اور ماہین غنی نے ماڈل نیہا پر الزام عائد کیا تھا کہ وہ ان کی ازدواجی زندگی کو خراب کر رہی ہیں۔انہوں نے ماڈل پر تنقید کرتے ہوئے کہا تھا کہ ماڈلز کا شادی شدہ مردوں سے شادی کا رحجان بڑھتا جا رہا ہے امید کرتی ہوں کہ اس میں تبدیلی آئے گی۔ مزید یہ بھی کہا کہ میری خوش قسمتی سے اب طلاق ہوگئی ہے اور خواہش ہے کہ وہ سکون اور سلامتی کے ساتھ رہیں۔

بعدازاں ، اس بات پر نیہا راجپوت نے کہا تھا کہ ان لوگوں کی طرف انگلی اٹھانا آسان ہے جو خاموش رہتے ہیں ، ہمیشہ کہانی کے دو پہلو ہوتے ہیں لیکن اگر کوئی خاموش ہے تو اس کا مقصد ہرگز یہ نہیں کہ وہ غلط ہے۔ ماڈل نیہا نے اپنے جواب میں یہ بھی کہا تھا کہ میں حیران ہوں کہ جب بھی کوئی چیز سامنے آتی ہے تو لوگوں کے ماڈل کو گھر تباہ کرنے کی وجہ قرار دینا بے حد آسان ہوتا ہے۔ انہوں نے اپنے جواب میں ماہین غنی کی سلامتی اور ان سے محبت کا بھی اظہار کیا تھا۔

خیال رہے کہ شہباز تاثیر کو 4 جنوری 2011 کو اسلام آباد میں اپنے والد کے قتل کے7 ماہ 22 دن بعد گلبرگ لاہور میں اپنے دفتر سے اغواء کرلیے گئے تھے۔ شہباز تاثیر چار سال 6 ماہ اور 12 دن (1652 دن) بعد مارچ 2016 میں بحفاظت گھر واپس لوٹ آئے تھے۔ تقریباً پانچ سال شہباز تاثیر کی غیر موجودگی میں ان کی سابقہ اہلیہ ماہین غنی ثابت قدم رہیں اور بہادری سے یہ وقت گزارا اور سوشل میڈیا کا سہارا لیتے ہوئے اپنے شوہر کی بحفاظت بازیابی کی دعاؤں کی التماس کیا کرتی تھیں اور ان کی بازیابی کے بعد 2017 میں اس جوڑے کے گھر بیٹی کی پیدائش بھی ہوئی تھی۔