سعودی عرب نے 20 ممالک کے مسافروں کی آمد پر عارضی پابندی لگادی

حکومت سعودی عرب کا منگل کے روز ایک بڑا فیصلہ، 20 ممالک کے لوگوں کا سعودی عرب میں داخلہ معطل کردیا گیا۔ تاہم اس دوران سفارت کار، سعودی شہری، طبی عملے اور ان کے اہلخانہ کو اس فیصلے سے استثنی حاصل رہے گی۔ سرکاری خبررساں ادارے کے مطابق اس فیصلے سے کورونا وائرس کے پھیلاؤ کو روکنے میں مدد ملے گی۔

تفصیلات کے مطابق سعودی عرب کی جانب سے عائد کی گئی اس عارضی پابندی 3 فروری سے نافذ عمل ہوگی، جس کے تحت متحدہ عرب امارات، جرمنی، امریکہ، برطانیہ، جنوبی افریقہ، فرانس، اٹلی، آئرلینڈ، پرتگال، سوئیڈ، مصر، لبنان، ہندوستان اور پاکستان سے آنے والے افراد شامل ہونگے۔

اس ہی سلسلے میں سعودی عرب کے سفارتخانے نے وزارت خارجہ کو ایک خط بھی ارسال کیا ہے، جس میں ان میں دیگر ممالک سے آنے والے افراد بھی شامل ہیں جو سعودی عرب میں داخلے کی خواہش سے پہلے کے 14 روز کے دوران ان ممالک سے گزرے ہوں یا وہاں کا سفر کیا ہو۔ البتہ مملک سعودی وزارت صحت کھ متعین کردہ حفاظتی اقدامات کے تحت ان ممالک سے بلا کسی تعطل کے سپلائی چین اور شپنگ کی نقل و حرکت جاری رہے گی۔

سعودی حکومت کی طرف سے جاری کردہ خط میں مزید کہا گیا کہ اگر سعودی شہری، سفارتکار اور طبی ماہرین اپنے اہلِ خانہ کے ہمراہ مذکورہ ممالک سے آرہے ہوں یا 14 روز کے دوران یہاں سے گزرے ہوں تو انہیں آنے کی اجازت ہے البتہ انہیں سعودی وزارت صحت کے ایس او پیز اور حفاظتی اقدامات پر عمل درآمد کرنا ہوگا۔

واضح رہے سعودی سفارت خانہ کی جانب سے اس صورتحال کو پاکستانی وزرات خارجہ کے ساتھ تعلقات کی بحالیِ نو کو اولین ترجیح دینے کے بہترین موقع کے طور پر دیکھا جارہا ہے.

جبکہ اس سلسلے میں پاکستان انٹرنیشنل ائیرلائن (پی آئی اے) کی جانب سے منگل کو بتایا گیا ہے کہ سعودی حکومت کی طرف سے ایک بار پھر سے پاکستان کے مسافروں کی آمد پر 3 فروری کی صبح 9 بجے سے داخلے پر دوبارہ پابندی عائد کردی گئی ہے، جس کے باعث اب کوئی بھی مسافر پاکستان سے سعودی عرب سفر نہیں کرسکے گا۔

یاد رہے گزشتہ برس حکومت سعودی عرب کی جانب سے کورونا وائرس کے خطرے کے پیش نظر عمرے پر پابندی عائد کردی گئی تھی، جس کے بعد گزشتہ برس فریضہ حج بھی سخت حفاظتی اقدامات کے تحت مختصر افراد کو اجازت دی گئی تھی، تاہم دنیا بھر کورونا وائرس کی بہتر ہوتی صورتحال کو دیکھتے ہوئے، حکومت سعودی عرب نے ایک بار پھر سے سخت ایس او پیز کے تحت دنیا بھر سے آنے والے زائرین کو عمرے کی اجازت دے دی گئی ہے۔ یہ سلسلہ مرحلہ وار شروع کیا گیا تھا۔