صنم چوہدری نے مذہبی زندگی کا آغاز کردیا

پاکستانی ڈرامہ انڈسٹری کی خوبصورت اداکارہ صنم چوہدری اپنی ڈرامہ سیریل آسمانوں پر لکھا ، شیزا ، میرے مہربان ، اور عشق ہماری گلیوں میں کے علاوہ بہت سی دیگر ڈرامہ سیریلز میں شاندار پرفارمنس دے چکی ہیں۔ اب ان کی طرف سے یہ اہم اعلان کیا گیا ہے کہ وہ مذہبی زندگی کا آغاز کر رہی ہیں ۔ مداحوں کو یہ خبر انہوں نے اپنی سالگرہ سے ایک دن پہلے انسٹاگرام پر دی۔

صنم چویدری نے نومبر 2019 میں خاموشی کے ساتھ اپنے دوست سومی چوہان سے شادی کرلی تھی ،ان کے شوہر امریکی شہر نیویارک میں مقیم ہیں اور گلوکاری کے ساتھ ساتھ میوزک کمپوزر بھی ہیں جب کہ گزشتہ سال اکتوبر میں اس جوڑے کے گھر پہلے بیٹے کی ولادت بھی ہوئی ہے۔

شادی کے بعد سے صنم چوہدری اسکرین سے غائب ہیں لیکن وہ سوشل میڈیا پر کافی ایکٹیو رہتی ہیں اور اپنی تصویریں اور ویڈیوز پوسٹ کرتی رہتی ہیں۔ انہوں نے اپنے روحانی سفر کا آغاز کرنے کی اطلاع بھی مداحوں سے انسٹاگرام پر شیئر کی ہے۔ اداکارہ کی جانب سے یہ اعلان اپنی سالگرہ سے ایک دن پہلے کیا گیا ہے۔ اس حوالے سے ایک ویڈیو بھی پوسٹ کی جس میں ان کے اہل خانہ نے خوشدلی سے ان کا فیصلہ قبول کیا اور انہیں پھولوں اور کیک سے سرپرائز دیا۔ ویڈیو کے کیپشن میں صنم نے لکھا کہ “میرے خاندان نے اللہ کی طرف رجوع کرنے پر اس طرح میرا استقبال کیا۔”

واضح رہے کہ کچھ دن قبل اداکار ہ نے سورہ الاحزاب کی ایک آیت بھی شیئر کی تھی جس میں مسلمان عورتوں کو پردے کی تلقین کی گئی ہے۔ اس حوالے سے اداکارہ نے لکھا کہ مجھے قرآن سیکھنے سے اپنا جواب ملا.. اور میں پورے دل سے اللہ کی طرف رجوع کرتی ہوں اللہ تیرا شکر۔”

صنم چوہدری نے مذہبی سفر کی شروعات کی خبر سوشل میڈیا پر تو کر دی ہے تاہم ابھی تک انہوں نے شوبز چھوڑنے کا اعلان نہیں کیا ہے۔ البتہ انہوں نے اپنے انسٹاگرام اکاؤنٹ سے تمام تصویریں ہٹادیں ہیں اور صرف اپنے نکاح کی تقریب کی چند تصاویر چھوڑی ہیں۔ اس کے علاوہ انسٹاگرام پر ان کا بائیو بھی تبدیل ہوکر “ایک مسلمان ، ایک ماں اور اسلام سیکھنا” ہوگیا ہے۔

مزید پڑھیں: کیا اداکارہ حمیمہ ملک بھی شوبز کو خیرآباد کرنے کا ارادہ رکھتی ہیں؟

اداکاری اور اسکرین سے دور ہونے کے باوجود صنم چوہدری سوشل میڈیا پر اپنے مداحوں سے رابطے میں رہتی ہیں ۔ حال ہی میں ان کے ایک مداح نے ان کے بارے میں نامناسب کمنٹ کیا جو اسے مہنگا پڑ گیا اور ان کے شوہر نے مداح کو کرارا جواب دیدیا۔ ہوا کچھ یوں کہ اداکارہ کی جانب سے سوشل میڈیا پر لینسز پہنے تصاویر شیئر کی گئی تو جہاں مداحوں نے لینسز میں ان کی خوبصورتی کی تعریف کی وہیں ناقدین نے اداکارہ کو تنقید کا نشانہ بنایا، کسی نے اداکارہ کو ہارر فلم میں آنے کا مشورہ دیا تو کسی نے کہا کہ یہ لینس ان پر نہیں جچ رہے۔ فرحان نامی اکاؤنٹ نے تو حد ہی کردی اور صنم کی تصاویر پر تبصرہ کرتے ہوئے کہا کہ “چڑیل” کی طرح دِکھائی دے رہی ہیں۔

صارف کے اس نامناسب کمنٹ سے سومی چوہان سیخ پا ہوگئے اورانہوں نے فوری ردعمل دیتے ہوئے صارف کا منہ بند کروا دیا۔ انہوں نے صارف کو جواباً کہا “تو چڑیل، تم نے اپنی شناخت چھپانے کیلئے ماہرہ خان کی تصویر اپنی پروفائل پر لگائی ہوئی ہے۔”

یاد رہے کہ یہ کوئی پہلا موقع نہیں جب صنم چوہدری کو صارفین کی جانب سے تنقید کا سامنا کرنا پڑا ہو، اس سے قبل بھی کئی افراد اداکارہ کے لئے نامناسب تبصرے کرچکے ہیں۔