سجل علی کی اداکاری کے چرچے، نامور بھارتی ہداتیکار نے بھی تعریف کرڈالی

پاکستانی ڈرامہ سیریل محبت جائے بھاڑ میں، ستم گر، میری لاڈلی، قددوسی صاحب کی بیوہ، گل رعنا،ننھی، سناٹا، چپ رہو، الف، خدا دیکھ رہا ہے سمیت بالی ووڈ کی فلم ’موم‘ میں سری دیوی کے مدمقابل بہترین اداکاری کرنیوالی اداکارہ سجل علی نے نہ صرف پاکستان بلکہ بھارت میں بھی اپنی شاندار پرفارمنس کی وجہ سے پزیرائی حاصل کی ہے، اداکارہ نے ہربار اپنی جاندار اداکاری سے ثابت کیا ہے کہ وہ کسی بھی کردار کو زندہ کرنے کی صلاحیت رکھتی ہیں۔

حال ہی میں سجل علی نے اپنے انٹرنیشنل کیریئر کا آغاز جمائما گولڈ اسمتھ کی فلم ’واٹس لو گاٹ ٹو ڈو ود اٹ‘ سے کیا ہے۔جس کی اسکریننگ سعودی عرب کے ریڈ سی انٹرنیشنل فلم فیسٹیول میں ہوئی۔

اس سلسلے میں اداکارہ نے فیسٹیول کے دوسرے ایڈیشن میں اپنے ہالی ووڈ پراجیکٹ کی دیگر کاسٹ کے ساتھ شرکت کی جس میں معروف بھارتی اداکارہ شبانہ اعظمی اور فلم کے ہدایت کار شیکھر کپور شامل تھے۔فیسٹیول کے دوران شیکھر کپور نے سجل علی کو پاکستان انڈسٹری کی شاندار اداکارہ قرار دیتے ہوئے فلم میں ان کی اداکاری کی خوب تعریف کی۔

سجل علی کی فیسٹیول میں شرکت کی تصاویر سوشل میڈیا پر وائرل ہیں جن میں اداکارہ کو فلم کی دیگر کاسٹ کے ساتھ دیکھا جاسکتا ہے۔اداکارہ کی وائرل تصاویر کو مداحوں کی جانب سے خوب پسند کیا جارہا ہے۔اس فیسٹیول کی افتتاحی تقریب میں ہندوستانی فلم انڈسٹری کے کئی بڑے نام موجود تھے، شاہ رخ خان، کاجول اور پریانکا چوپڑا نے بھی افتتاحی تقریب میں شرکت کی۔

دوسری جانب، بھارتی سوشل میڈیا صارفین بھی اداکارہ سجل علی کی اداکاری کے معترف ہوگئے ہیں اور ہر جگہ انہی کے چرچے ہیں۔یاد رہے کہ گزشتہ دنوں بھی معروف بھارتی ماڈل سونم باجوہ نے برطانوی نشریاتی ادارے کو انٹرویو دیتے ہوئے سجل علی کی تعریفوں کے پل باندھے تھے۔جبکہ چند دنوں پہلے سجل علی نے بھی اس خواہش کا اظہار کیا تھا کہ پاکستان سے باہر اگرکسی اور ملک میں رہنا ہوتو وہ بھارت ہوسکتا ہے۔یہ بات انہوں نے یو اے ای میں فلم فیئر مڈل ایسٹ اچیورز نائٹ میں کہی، اداکارہ کا کہنا تھا کہ ایسی تقاریب میں ان تمام لوگوں سے ملنے کا موقع ملتا ہے جو ہمارے دل کے قریب ہیں۔ بالی ووڈ کے بہت سے اسٹارز سے دوستی ہے اوران سے رابطوں پر خوشی ہوتی ہے۔

مزید پڑھیں: سجل علی ویب سیریز میں ‘فاطمہ جناح’ کا کردار کرینگی

خیال رہے کہ سجل علی نے 2009 میں ڈرامہ سیریل ‘نادانیاں’ سے اداکاری کی دنیا میں قدم رکھا جس کے بعد وہ 2011 میں ‘محمود آباد کی ملاکائیں’ میں دکھائی دیں جس میں ان کے کام کو شائقین کی جانب سے بے حد سراہا گیا۔اپنے کیرئیر کے عروج پر سجل علی نے اداکار احد رضا میر سے شادی کی لیکن 2 سال کی شادی کے بعد اس جوڑے نے اپنی راہیں جدا کرلیں۔سپر اسٹارز کی یہ جوڑی ان جوڑیوں میں سے ایک تھی جسے مداح کافی پسند کرتے تھے تاہم سوشل میڈیا پر اس جوڑے کے بارے میں علیحدگی کی خبریں زیر گردش تھیں مگر ان دونوں کی جانب سے باضابطہ طور پر ان افواہوں کی تصدیق یا تردید نہیں کی گئی تھی تاہم رواں برس مارچ کے مہینے میں ان خبروں کی تصدیق ہوگئی اور دونوں کے درمیان طلاق ہوگئی۔