علیزے شاہ کو ‘رنگ گورا’ کرنے کا کمرشل کرنا مہنگا پڑگیا، صارفین کی شدید تنقید

بھولی سی صورت والی علیزے شاہ اپنی اداکاری سے زیادہ نت نئے تنازعات کی زد میں رہتی ہیں۔اس مرتبہ ایک کمرشل میں کام کرنا ان کے لئے پریشانی کا سبب بن گیا۔

تفصیلات کے مطابق معاملہ کچھ یوں ہوا ہے کہ علیزے شاہ رنگ گورا کرنے والی مشہور کریم ’فیس فریش’ کے کمرشل میں جلوہ گر ہوئی ہیں جس پر انہیں صارفین کی شدید تنقید کا سامنا ہے۔

اداکارہ نے حال ہی میں یہ کمرشل اپنے انسٹاگرام اکاؤنٹ پر شیئر کیا جو صارفین کو بالکل پسند نہیں آیا۔ لوگوں نے اس پوسٹ پر ‘واہیات‘، ‘جھوٹی’ اور ‘استغفر اللہ’ جیسے کمنٹ کرنے کے ساتھ جلے کٹے تبصرے بھی کئے اور اداکارہ کو شدید تنقید کا نشانہ بنایا۔

مذکورہ پوسٹ پر ایک صارف نے لکھا کہ ‘آپ فیئرنس کریم کو کیوں فروغ دے رہی ہیں؟ لوگوں کو اپنی جلد کے ساتھ مطمئن رہنے پر مائل کرنے کے بارے میں آپ کا کیا خیال ہے؟ ہم خوبصورتی کے ان طے شدہ معیارات سے کب جان چھڑائیں گے؟’ ایک صارف نے لکھا کہ ‘میرا خیال تھا کہ ہم گورا کمپلیکس سے جان چھڑاچکے ہیں’۔ایک اور صارف نے لکھا کہ ‘آپ کی جلد کو تباہ کرنے کے لئے ایک اور پروڈکٹ آگئی ہے’۔

ڈرامہ سیریل ‘عشق تماشا‘، ‘عہد وفا’، ‘میرا دل میرا دشمن‘ میں بہترین پرفارمنس پیش کرنے والی علیزے شاہ کی مقبولیت کا اندازہ اس بات سےلگایا جاسکتا ہے کہ انسٹاگرام پر ان کو 36 لاکھ 93 ہزار سے زائد لوگوں نے فالو کیا ہوا ہے، اداکارہ خود بھی سوشل میڈیا پر کافی متحرک رہتی ہیں اور گاہے بگاہے مداحوں کو اپنی مصروفیات سے آگاہ رکھتی ہیں۔

یاد رہے کہ گزشتہ برس علیزے شاہ کی برائیڈل ویک میں ریمپ پر گرنے کی ویڈیو سوشل میڈیا پر آتے ہی وائرل ہوگئی تھی، اس ویڈیو پر اداکارہ کے مداحوں نے تو ان کے ساتھ ہمدردی دیکھائی تھی تاہم ناقدین نے طنزیہ اور مزاحیہ تبصرے کئےتھے۔ بعد ازاں، علیزے نے اس واقعے کی وضاحت کرتے ہوئے انسٹاگرام پوسٹ میں بتایا تھا کہ ان کے اور شازیہ منظور کے درمیان کنفیوژن تھی، جس وجہ سے وہ گر پڑیں۔اداکارہ نے شازیہ منظور کی تعریف کرتے ہوئے لکھا تھا کہ اس واقعے کے بعد شازیہ منظور نے مجھے پیار سے اٹھایا اور میرا حوصلہ بڑھایا۔ علیزے شاہ اگرچہ باصلاحیت اداکارہ ہیں لیکن وہ اداکاری کے ساتھ ساتھ خبروں میں اِن رہنے کے گُر سے بھی بخوبی واقف ہیں، جبھی کبھی وہ اپنی سُریلی آواز کا جادو جگاتی ہیں تو کبھی اپنی لمبی زلفیں کٹواکر صارفین کی توجہ حاصل کرلیتی ہیں۔

علاوہ ازیں، گزشتہ دنوں علیزے شاہ کی ‘ہمشکل’ کی ویڈیوز کے سوشل میڈیا پر خوب ہی چرچے ہوئے۔انسٹاگرام پر علیزے کی ہمشکل رانیہ کی ایک ٹک ٹاک ویڈیو وائرل ہوئی جس میں انہیں انگلش گانے پر ڈانس موو کرتے دیکھا گیا۔ اس ویڈیو کو دیکھ کر سب حیران رہ گئےکیونکہ علیزے کی ہمشکل رانیہ کے نین نقوش ہی نہیں بلکہ ان کا ہیئر اسٹائل بھی علیزے سے کافی ملتا جلتا تھا۔