قومی ہیرو میڈل نہ جیتنے پر آبدیدہ، ائیر پورٹ پر شاندار استقبال

ٹوکیو اولمپکس میں شاندار کارکردگی کا مظاہرہ کرنے والے پاکستانی ایتھلیٹ ارشد ندیم وطن واپس پہنچ گئے ۔صوبائی وزیر کھیل رائے تیمور بھٹی نے علامہ اقبال ائیر پورٹ پر ارشد ندیم کا استقبال کیا۔ انہیں پھولوں کے ہار پہنائے اور گلدستہ پیش کیا۔

صوبائی وزیر کھیل نے اپنی ٹوئٹ میں کہا کہ کھلاڑیوں کے لئے ایک ایسا ماحول فراہم کریں گے تاکہ وہ عالمی سطح پر ملک و قوم کا نام روشن کریں۔

قومی ہیرو ارشد ندیم ٹوکیو اولمپکس میں میڈل تو نا جیت سکے مگر انہوں نے نامساعد حالات کے باوجود بہترین کارکردگی سے پاکستانیوں کے دل جیت لیے ہیں ۔اس لئے ان کے استقبال کے لئے شہریوں کی بڑی تعداد بھی ائیرپورٹ  کے  باہر موجود تھی۔ جب ارشد ندیم ائیرپورٹ سے باہر آئے تو عوام کی جانب سے پاکستان زندہ باد، ارشد ندیم زندہ باد کے نعرے بھی لگائے گئے۔

ارشد ندیم میڈل نہ جیتنے پر آبدیدہ نظر آئے، اس موقع پر انہوں نے کہا کہ قوم کی دعاوں کے شکر گزار ہیں، اچھا رزلٹ دینے کی کوشش کی، مستقبل میں ملک کے لئے میڈل لانے کی کوشش کریں گے۔

لاہور سے اپنے آبائی علاقے میاں چنوں پہنچنے پر بھی ارشد ندیم کا شاندار استقبال کیا گیا۔ ڈھول کی تھاپ پر بھنگڑے ہوئے، ایتھلیٹ پر پھولوں کی پتیاں نچھاور کی گئیں۔ اس موقع پر ارشد ندیم اپنی والدہ سے ملتے ہی جذبات پر قابو نہ رکھ سکے اور ان کے قدموں میں گر پڑے جنہوں نے ان کی حوصلہ افرائی کرتے ہوئے کہا کہ تم ہیرو ہو ،اپنا سر فخر سے بلند رکھو۔

دریں اثنا، پاکستانی اولمپیئن ارشد ندیم نے اپنے ٹوئٹر اکاؤنٹ کے ذریعے اپنے مداحوں کے لیے ایک ویڈیو پیغام جاری کیا جس میں انہوں نے عوام کو اپنے نام پر پیسے لینے والے جعلی اکاؤنٹ کے بارے میں خبردار کیا۔

انہوں نے اپنی ٹوئٹ میں کہا کہ میں ارشد ندیم ہوں، آپ سب کو خبردار کرنا چاہتا ہوں کہ میرے نام پر دھوکا دہی کی سرگرمیاں کی جارہی ہیں۔ ویڈیو پیغام میں قومی ہیرو نے واضح کیا کہ انہوں نے کسی بھی ادارے یا شخص کو اپنے نام پر پیسے جمع کرنے کا اختیار نہیں دیا ہے ۔انہوں نے مداحوں سے اپیل کی کہ وہ ایسے لوگوں سے ہوشیار رہیں۔

واضح رہے کہ ٹوکیو اولمپکس میں جیولین تھرو کے مقابلے میں بھارتی نیرج چوپڑا نے گولڈ میڈل جیتا جبکہ پاکستان کے ارشد ندیم پانچویں پوزیشن پر رہے۔ دونوں ایتھلیٹس ہم عمر سہی، دونوں کا تعلق پڑوسی ملکوں سے سہی، لیکن دونوں کو ملنے والی سہولیات میں زمین آسمان کا فرق ہے۔ گولڈ میڈل جیتنے والے بھارتی نیرج چوپڑا نے جرمن کوچ کی خدمات حاصل کیں ساتھ ساتھ ان کے ساتھ ان کی جسمانی تربیت کے لئے بائیو مکینکس کے ماہر کی بھی خدمات بھی دستیاب تھیں۔

مزید پڑھیں: بیڈمنٹن اسٹار ماہ نور شہزاد نے پشتون کمیونٹی سے معافی کیوں مانگی؟

بھارتی میڈیا کے مطابق اولمپکس سے ایک سال قبل جیولین تھروور پر 1 کروڑ 61 لاکھ بھارتی روپے خرچ کئے گئے جو پاکستانی کرنسی میں ساڑھے 3 کروڑ سے بھی زائد ہے۔ اولمپکس سے قبل نیرج چوپڑا نے سوئیڈین میں ٹریننگ کی جبکہ 5 انٹرنیشنل ٹورنامنٹس میں بھی حصہ لیا، جس سے ان کے کھیل میں مزید نکھار پیدا ہوا۔ نیرج چوپڑا کے برعکس پاکستان کے ارشد ندیم اولمپکس سے قبل صرف ایک ایونٹ کھیل سکے، انہیں گزشتہ برس چین ٹریننگ کیلئے بھیجا گیا تھا لیکن کووڈ کی وجہ سے انہیں واپس آنا پڑا۔ اس سال انہیں مختصر مدت کےلئے ترکی ضرور بھیجا گیا، جہاں انہوں نے 2 ہفتے قازقستان کے کوچ کی زیر نگرانی ٹریننگ کی۔

خیال رہے کہ ارشد ندیم اولمپکس کی تاریخ میں پہلے پاکستانی ایتھلیٹ ہیں جنہوں نے اپنی کارکردگی کی بنیاد پر اولمپکس کے لیے براہ راست کوالیفائی کیا۔