مولانا طارق جمیل کا ہم شکل ہوبہو ان جیسا، مولانا بھی حیران

کہتے ہیں دنیا میں ہر کسی کا کوئی نا کوئی ہم شکل ہوتا ہے، آج تک یہ بات محض افسانوی لگتی تھی لیکن اب اس بات پر حقیقت کا گمان ہوتا ہے کیونکہ اب پاکستان کے معروف مذہبی اسکالر مولانا طارق جمیل کا ہم شکل بھی منظر عام پر آگیا ہے۔ یہ ہم شکل ان سے اس قدر مشابہت رکھتا ہے کہ اسے دیکھ کر خود مولانا طارق جمیل بھی حیران رہ گئے۔ انٹرنیٹ پر مولانا طارق جمیل کی اپنے ہم شکل سے ملاقات کی ویڈیو تیزی سے وائرل ہو رہی ہے۔

سماجی رابطے کی ویب سائٹ ٹوئٹر پر ایک مختصر سی ویڈیو خوب وائرل ہو رہی ہے جس میں مولانا طارق جمیل کو اپنے ہم شکل کے روبرو کھڑے دیکھا جاسکتا ہے۔ اپنے ہم شکل کو دیکھتے ہوئے مولانا طارق جمیل کافی حیران نظر آرہے ہیں جبکہ اُن کا ہم شکل اس دوران صرف مسکرا رہا ہے۔

ویڈیو کے علاوہ انٹرنیٹ پر وائرل ہونے والی ان کی تصویروں کو دیکھ کر پہلی نظر میں کوئی بھی نہیں پہچان سکتا کہ ان دونوں میں سے اصل مولانا طارق جمیل کون ہے؟ کیونکہ مشابہہ شخص ہو بہو اُن جیسا ہی لگ رہا ہے۔ ہم شکل کا ناک، چہرے کا نقشہ، آنکھیں اور داڑھی بالکل ایک جیسی ہیں یہی نہیں مولانا طارق جمیل  کے ہم شکل نے ڈریسنگ بھی ان کے جیسی کر رکھی ہے جسے دیکھ کر مولانا خود بھی حیرانی کے ساتھ خوش مزاجی کا اظہار کر تے دیکھے جا سکتے ہیں۔

مولانا اور ہم شکل کی اس ملاقات کے موقع پر دیگر افراد بھی موجود ہیں جو خدا کی اس قدرت کو دیکھ کر مسکرا رہے ہیں۔

مزید پڑھیں: وینا ملک جھوٹی ہے، مولانا طارق جمیل کو بھی دھوکا دیا، سابقہ شوہر کا الزام

ویڈیو میں مولانا طارق جمیل کے پاس کھڑے ایک شخص کی جانب سے یہ بتایا جارہا ہے کہ ابھی کچھ دیر قبل ہی لوگ مولانا طارق جمیل کے شک میں اُن کے ہم شکل سے مصافحہ کر کے گئے ہیں جبکہ ایک ہوٹل پر چائے پینے کے دوران مولانا طارق جمیل کے مشابہہ شخص کو چائے مانگنے پر ساتھ میں پراٹھا بھی پیش کی گیا۔

مولانا طارق جمیل عہدِ حاضر کے بہت بڑے عالمِ دین ، مبلغ اور خطیب ہیں۔ اللہ نے اِن کو بہت سی صلاحیتوں سے نوازا ہے۔ وہ جب تقریر کرتے ہیں تو سماں باندھ دیتے ہیں، ایسی فصاحت اور بلاغت سے گفتگو کرتے ہیں کہ بندہ مبہوت ہو جاتا ہے۔ کچھ عرصہ قبل جب انہوں نے اپنے نام سے کپڑوں کا ایک برانڈ ’ایم ٹی جے‘ لانچ کیاتو انہیں تنقید کا نشانہ بنایا گیا۔ تاہم انہوں نے کپڑوں کا برانڈ متعارف کرانے کی وضاحت دیتے ہوئے کہا تھا کہ وہ یہ برانڈ اپنے مدرسوں کو چلانے کے لیے لانچ کر رہے ہیں۔ اپنے وضاحتی پیغام میں ان کا یہ بھی کہنا تھا کہ وہ یہ برانڈ کسی کاروباری نیت یا کسی کے مقابلے میں لانچ نہیں کررہے بلکہ مدارس کو پاؤں پر کھڑا کرنے کے لئے ایسا کیا جا رہا ہے۔

یاد رہے کہ ان کے کپڑوں کے برانڈ کے پہلے آؤٹ لیٹ کا بہت شاندار افتتاح کراچی میں ہوا تھا جس میں معروف شخصیات نے بھی شرکت کی تھی۔