منال اور احسن کا نکاح ، ایمن کی آنکھیں اشک بار، تصاویر وائرل

پاکستان شوبز کی معروف اداکارہ منال خان اور اداکار احسن محسن اکرام نے نکاح کر کے نئی زندگی کا آغاز کردیا۔ جوڑے کی شادی کی تصاویر سوشل میڈیا پر وائرل ہوگئیں۔

جوڑے کی وائرل ہونے والی تصاویر اور ویڈیوز میں دیکھا جاسکتا ہے کہ اداکارہ منال خان سرخ رنگ کا عروسی لباس زیب تن کی ہوئی ہیـں جبکہ اداکار احسن محسن اکرام سیاہ رنگ کا لباس پہنے ہوئے ہیں۔ منال خان کا عروسی لباس انس ابرار نے ڈیزائن کیا تھا ، جس کے ساتھ انہوں نے علی جاویری جیولرز کے تیار کردہ زیورات پہنے۔ جبکہ احسن محسن اکرام نے اسمٰعیل فرید کا تیار کردہ سیاہ رنگ کا لباس پہنا تھا۔

اداکارہ ایمن خان بھی اپنی بہن کی شادی میں بہت خوبصورت نظر آئیں۔ انہوں نے نکاح کی تقریب کے لیے نارنجی اور سنہرے کام والا انتہائی خوبصورت جوڑا زیب تن کیا تھا۔ جب کہ ان کے شوہر اداکار منیب بٹ سفید لباس میں نظر آئے۔

منال خان کے نکاح کے موقع پر ان کی بہن اداکارہ ایمن خان جذباتی ہوگئیں اور روپڑیں۔ ان کے رونے کی ویڈیو سوشل میڈیا پر وائرل ہو رہی ہے جس میں ان کی آنکھیں اشک بار لیکن چہرے پر خوشی نمایاں ہے۔ ایمن خان اور منیب بٹ کی بیٹی امل منیب بھی تقریب میں والدہ جیسا لباس پہنے نظر آئیں۔

شادی کی تقریب میں دلہن کی آمد پر ایلوس پریسلے کا گانا ‘کانٹ ہیلپ فالنگ ان لو’ پلے کیا گیا۔ البتہ دولہا روایتی انداز میں بھارتی گانے پر انجوائے کرتے ہوئے بارات لے کر آئے۔ نکاح کے وقت چھواروں کی جگہ منال اور احسن محسن کے ناموں کے پہلے حروف پر مبنی کوکیز تقسیم کی گئیں۔

شادی کی تقریب کو چار چاند لگانے کے لئے اداکارہ کی قریبی سہیلیوں کنزیٰ ہاشمی، صبور علی، آمنہ الیاس، اریبہ حبیب کے علاوہ شگفتہ اعجاز، مارننگ شو میزبان ندا یاسر اور ان کے شوہر یاسر نواز، اقراء عزیز ،یاسر حسین اور علی انصاری بھی ان کی خوشیوں میں شریک ہوئے۔

سوشل میڈیا پر منال خان کی رخصتی کی تصاویر بھی وائرل ہو رہی ہیں جس میں وہ بے حد خوش اور اور ان کی بہن ایمن خان انہیں الوداع کرتی نظر آرہی ہیں۔

شادی کے بندھن میں بندھنے پر اس جوڑے کو ساتھی فنکاروں کے علاوہ ان کے مداح اور چاہنے والے بھی سوشل میڈیا پر نئی زندگی کی شروعات کرنے پر مبارکباد دے رہے ہیں اور دونوں کے لیے نیک تمناؤں کا اظہار کر رہے ہیں۔

خیال رہے کہ منال خان اور احسن محسن اکرام نے گزشتہ ماہ اگست میں ہی 10 ستمبر کو شادی کرنے کی تصدیق کی تھی اور ان کی شادی کا کارڈ بھی سوشل میڈیا پر وائرل ہوا تھا جبکہ ان کے ولیمے کی تقریب 12 ستمبر کو منعقد ہوگی۔

اس جوڑے نے ایک ساتھ ڈرامہ سیریل “پرچھائیں” میں کام کیا جو کہ 2017 میں ایک نجی ٹی وی چینل سے نشر کیا گیا تھا۔ احسن محسن اکرام سے قبل منال خان کے منظور خان نامی شخص سے قریبی تعلقات تھے لیکن دونوں کی دوستی ختم ہوگئی تھی جس کے بعد منظور خان نے اپنے انسٹاگرام اکاؤنٹ سے منال خان کی تمام تصویریں ڈیلیٹ کردی تھیں۔ بعد ازاں ، منال خان اور احسن محسن کی دوستی بڑھی جو محبت میں تبدیل ہوگئی۔ نومبر 2020 میں منال خان کی سالگرہ کے موقع پر ان دونوں نے سوشل میڈیا پر رومانوی انداز میں تصویر شیئر کرتے ہوئے باضابطہ طور پر اپنے تعلقات کی تصدیق کی تھی۔