سوشل میڈیا پر ماورہ حسین کی سالگرہ کی تقریب کے چرچے

پاکستان ڈرامہ و فلم انڈسٹری کی شوخ وچنچل اداکارہ ماورہ حسین نے 28 ستمبر کو اپنی 29 ویں سالگرہ منائی۔ ان کی سالگرہ کی تصاویر سوشل میڈیا پر وائرل ہو رہی ہیں۔

ماورہ حسین کی جانب سے سالگرہ کی خوبصورت تصاویر فوٹو، ویڈیو شیئرنگ ایپلیکیشن انسٹا گرام پر شیئر کی گئی ہیں جو دیکھتے ہی دیکھتے وائرل ہوگئی ہیں۔ ماورہ حسین اپنی سالگرہ منانے کے لیے ہمیشہ سے ہی بہت پُرجوش رہی ہیں اور ہر سال کی طرح اس سال بھی انہیں اپنی سالگرہ منانے کا بہت بے چینی سے انتظار تھا اور ستمبر کا آغاز ہوتے ہی اداکارہ نے اپنے انسٹاگرام اکاؤنٹ پر اپنا برتھ ڈے کاؤنٹ ڈاؤن شروع کر دیا تھا۔

سالگرہ سے ایک دن قبل بھی اداکارہ نے کیک کے ساتھ اپنی ایک تصویر شیئر کی تھی اور پوسٹ کے کیپشن میں لکھا تھا کہ ان کی سالگرہ کا دن آنے میں اب صرف ایک دن باقی ہے۔

اداکارہ نے انسٹاگرام اکاؤنٹ سے اپنی سالگرہ کی تصویریں شیئر کیں ، جس میں سے ایک تصویر میں وہ پھولوں کا گلدستہ ہاتھوں میں لئے نظر آرہی ہیں جبکہ دیگر تصویوں میں دیکھا جاسکتا ہے کہ اپنی سالگرہ کے موقع پر انہوں نے نہایت سادہ لباس پہنا ہوا ہے جس میں وہ بہت خوبصورت نظر آرہی ہیں۔ سالگرہ کی اس مختصر سی تقریب میں ان کے قریبی دوست بھی شامل ہیں۔

ڈرامہ سیریل ‘ ثبات’ میں ان کے مدِمقابل اداکاری کے جوہر دیکھانے والے امیر گیلانی نے بھی ان کی سالگرہ کی تقریب میں شرکت کی۔ اداکار نے انسٹاگرام پر بھی ماورہ حسین کی برتھ ڈے پر خصوصی پوسٹ شئیر کی اور سالگرہ کی مبارکباد دی۔

ماورہ حسین کی والدہ نے بھی انسٹاگرام پر ان کے بچپن کی ایک تصویر شیئر کی اور سالگرہ پر نیک خواہشات کا اظہار کرتے ہوئے ان کو مبارکباد دی۔

اداکارہ کی سالگرہ کی تصاویر کو مداحوں نے بھی بے حد پسند کیا اور انہیں مبارکباد دی۔ اس کے علاوہ پاکستان شوبز انڈسٹری کے نامور ستاروں کی جانب سے بھی ماورہ حسین کے لیے نیک تمناؤں کا اظہار کرتے ہوئے انہیں سالگرہ کی مبارک باد دیئے جانے کا سلسلہ جاری ہے۔

خیال رہے کہ ماورہ حسین نے حال ہی میں اپنے بہن بھائیوں اور والدہ کے ہمراہ اپنی ایک تصویر شیئر کی تھی جس میں بتایا کہ کورونا کی وبا کی وجہ سے انہیں اپنے خاندان سے الگ رہنا پڑ رہا ہے۔ پوسٹ میں لکھا کہ میں نے اپنی ماں کو تقریباً دو سال سے نہیں دیکھا، میری ماں اور بھائی آسٹریلیا میں سخت لاک ڈاؤن میں ہیں اور میں نہیں جانتی کہ میں کب ان سے مل پاؤں گی۔

مزید پڑھیں: ماروا حسین نے لاہوری لڑکوں کی چھیڑ چھاڑ کو فن قرار دے دیا

گزشتہ دنوں ماورہ حسین نے یہ بھی انکشاف کیا تھا کہ کس طرح سوشل میڈیا پر منفی ردعمل کی وجہ سے وہ اداکاری چھوڑ کر پاکستان سے جانا چاہتی تھیں کیونکہ لوگوں کی منفی باتوں سے ان کی ذہنی صحت شدید متاثر ہوئی تھی۔