مریم نواز کے برانڈڈ جوتے ایک بار پھربن گئے سب کی توجہ کا مرکز

پاکستان مسلم لیگ (ن) کی نائب صدر و سابق وزیر اعظم نواز شریف کی صاحبزادی مریم نواز کو جہاں اکثر مختلف سیاسی بنیادوں پر تنقید کا سامنا کرنا پڑتا ہے وہیں ان کے قیمتی برانڈڈ ہینڈ بیگز اور جوتوں کی پسند بھی زیر بحث رہتی ہے۔ یہی وجہ ہے کہ حال ہی میں ہونیوالی آل پارٹیز کانفرنس (اے پی سی) میں مسلم لیگ(ن)کی نائب صدر مریم نواز کے خوبصورت “سبز جوتے” اپنی قیمت کی وجہ سے سوشل میڈیا پر موضوع بحث بن گئے ہیں۔

آل پارٹیز کانفرنس میں سابق وزیر اعظم نواز شریف کی تقریر کے علاوہ ان کی صاحبزادی اور مسلم لیگ(ن)کی نائب صدر مریم نوازکی ڈریسنگ اور ان کے بیش قیمت “سبز رنگ “ کے قیمتی جوتے عوام کی توجہ کا مرکز بن گئے کیونکہ اس بار بھی انہوں نے کسی معمولی جوتے کا انتخاب نہیں کیا بلکہ موقع کی مناسبت سے مشہور انٹرنیشنل برانڈ ”منولو بلہینک “کے قیمتی جوتے منتخب کئے جس نے سوشل میڈیا پر دھوم مچادی اور مسلم لیگ (ن) کی نائب صدر مریم نواز کے سبز جوتے کی مقبولیت اتنی بڑھ گئی ان کے مداحوں اور ناقدین کے درمیان اس کانفرنس میں مریم نواز کے سیاسی بیانات سے زیادہ ان کے قیمتی برانڈڈ سبز جوتے زیربحث بن گئے۔

پاکستان مسلم لیگ (ن) کی سرگرم نائب صدر مریم نواز نے آل پارٹیز کانفرنس کے موقعے پر اپنے سبز جوڑے کے ساتھ انٹرنیشنل برانڈ منولو بلہینک کے مشہور قیمتی جوتے“ گرین ساٹن جیول بکلے مولز” کا چناؤ کیا۔ منولو بلہینک کی ویب سائٹ پر ان جوتوں کی مالیت 1،315 $ہے ، جس کا مطلب 217،701 (دولاکھ ستتر ہزار ) پاکستانی روپے بنتی ہے۔ یہاں آپ کو یہ بتاتے چلیں کہ منولو بلہینک ایک اعلی درجے کی انٹرنیشنل کمپنی ہے جو دنیا کے بہترین جوتوں کے ڈیزائنرز میں سے ایک ہیں۔

یہ انٹرنیشنل برانڈ اپنی پر تعیش جوتوں اور ان کے منفرد ڈیزائن کے لئے دنیا بھر میں مشہور و مقبول ہے اور اس کمپنی کے مالک منولو بلہینک کو دنیا کے بہترین جوتی ڈیزائنرز میں سے ایک مانا جاتا ہے۔

بات یہی ختم نہیں ہوجاتی برانڈڈ جوتوں کی شوقین گزشتہ دنوں مسلم لیگ(ن) کی نائب صدر مریم نواز سوشل میڈیا پر اپنی ایک تصویر پوسٹ کر چکی ہیں ، جس میں انہوں نے انٹرنیشنل برانڈ “ڈیور”کی چپل پہنی ہوئی ہے۔ اس پوسٹ پر مریم نواز کے مداحوں نے جہاں ان کی ڈریسنگ اور چپل کی تعریف کی وہیں مخالفین نے چپل کی قیمت پر انہیں تنقید کا نشانہ بنایا کیونکہ انٹرنیشنل برانڈ “ڈیور” کی ویب سائٹ پر اس چپل کی قیمت 621 ڈالر بتائی گئی ہے جو پاکستانی کرنسی میں تقریبا ًایک لاکھ روپے کے لگ بھگ بنتی ہے۔ 

اسی حوالے سے سوشل میڈیا پر مسلم لیگ(ن)کی نائب صدر مریم نواز کی لندن سے روانگی سے قبل اہلخانہ سے ملاقات کی تصاویر اور ابوظہبی ایئرپورٹ پر سامنے آنے والی تصویروں میں بھی انہوں نے انٹرنیشنل برانڈ “گوشی “ کی چپل پہنی ہوئی ہے ۔ خیال رہے کہ تصاویر میں انہوں نے انٹرنیشنل برانڈ “گوشی “ کی جو چپل پہنی ہوئی ہے اس کی قیمت 450 پونڈ ہے جو تقریبا ً71,929 پاکستانی روپے بنتی ہے۔