پاکستان کی پہلی خاتون ہندو ڈی ایس پی، منیشا کماری

کوئی بھی انسانی معاشرہ اس وقت تک کامیاب اور مثالی نہیں بن سکتا، جب تک اس معاشرے میں موجود اقلیت اپنے آپ کو محفوظ اور آزاد تصور نہ کرتی ہے۔ اور بحیثیت پاکستانی آج ہم اس بات پر فخر محسوس کرتے ہیں کہ ہمارا معاشرہ ناصرف اقلیتوں کے لئے محفوظ ہے بلکہ انہیں مثالی آزادی میسر ہے، ہمارے ملک میں چیف جسٹس آف پاکستان سے لیکر بڑے بڑے عہدوں پر اقلیتی برادری سے تعلق رکھنے والی شخصیات نے اپنی ذمہ داریاں خلوص دل سے نبھائیں ہیں۔ انہیں شخیصات کی فہرست میں اب اور نام کا اضافہ منیشا کماری کا ہونے جا رہا ہے، جنہیں یہ پاکستان کی پہلی ہندو خاتون ڈپٹی سپرنٹنڈنٹ پولیس (ڈی ایس پی) کے منصب پر فائز ہونے کا اعزاز حاصل ہوا ہے۔

سوشل میڈیا رپورٹس کے مطابق منیشا کماری بالو مال روپیتا کی بیٹی ہیں، جن کا تعلق صوبہ سندھ کے شہر جیکب آباد سے ہے۔ منیشا کماری نے رواں برس سندھ پبلک سروس کمیشن کے امتحان سی سی ای 19 میں کامیابی حاصل کی ہے اور وہ اب پاکستان کی تاریخ کی پہلی ہندو خاتون ڈی ایس پی سندھ پولیس تعینات ہوئی ہیں۔

اس بات کو سب سے پہلے سماجی کارکن کپل دیو کی جانب سے بتایا گیا کہ منیشا کماری ڈی ایس پی عہدے پر تعینات ہوگئیں۔ سماجی رابطے کی ویب سائٹ ٹوئیٹر پر جاری پیغام میں کیپل دیو کا کہنا تھا کہ تمام منفی خبروں کے بیچ ایک بڑی مثبت خبر، منیشا ولد بالو مال سندھ سروس پبلک کمیشن کا سی سی ای امتحان پاس کرنے کے بعد پہلی ہندو خاتون ڈی ایس پی بن گئی ہیں۔

جوں ہی سوشل میڈیا پر یہ خبر وائرل ہوئی، ملک بھر سے عوام کی جانب سے بڑی تعداد میں منیشا کماری کو ناصرف مبارکباد کے پیغامات بھیجے جارہے ہیں بلکہ ان کی آنے والی زندگی کے لئے بھی نیک تمناؤں کا بھی اظہار کیا جا رہا ہے۔

منیشا کماری کی زندگی اور ان کی کامیابی جہاں ملک کی ہندو برادری کے لئے ایک مثال اور حوصلے کا باعث ہے، وہیں وہ ملک کی دیگر خواتین کے لئے بھی عزم ، ہمت اور حوصلے کا ذریعہ ہے۔ بحیثیت پاکستانی ہمیں فخر ہے کہ پاکستانی خواتین ملکی اور بین الاقوامی سطح پر ہر شعبے میں اپنی زبردست صلاحیتوں کے ذریعے ملک کا نام روشن کر رہی ہیں۔

واضح رہے اس سے قبل بھی پاکستان میں بڑی تعداد میں مذہبی اقلیتوں سے تعلق رکھنے والے افراد نے بیوروکریسی، عدلیہ اور افواج پاکستان میں اپنی زبردست خدمات پیش کی اور ملک کی ترقی میں اپنا بھرپور کردار ادا کیا۔ اگر میڈیکل شعبے کی بات کرلی جائے، تو ہندو برادری کی پاکستان میں خدمات ناقابل فراموش ہیں۔

یاد رہے کچھ عرصہ قبل ہندو برادری سے تعلق رکھنے والے راہول دیو کو پاکستان ائیرفورس میں جنرل ڈیوٹی (جی ڈی) پائلٹ بنے کا اعزاز حاصل ہوا تھا، وہ ہندو برادری سے تعلق رکھنے والے پہلے پاکستانی تھے، جنہیں جی ڈی پائلٹ بننے کا اعزاز ملا تھا۔