کراچی میں پہلی بار رولر اسکٹس پولیس فورس کی تعیناتی

کراچی ميں اسٹريٹ کرائم کو قابو کرنے کیلئے نئی فورس تیار کر لی گئی ہے یہ پولیس فورس رولر اسکٹس پہن کے تنگ گلیوں میں گشت کرے گی۔

محکمہ پولیس نے کراچی کے مختلف علاقوں میں بڑھتی ہوئی جرائم پیشہ سرگرمیوں کے سدباب کے لئے تنگ گلیوں میں گشت کرنے کے لئے پولیس کی یہ “اسکیٹنگ فورس” تشکیل دی ہے۔

یہ نئی پولیس فورس ان تنگ گلیوں اور راستوں کے لئے بنائی گئی ہے جہاں پولیس موبائل کی رسائی ممکن نہیں ہو پاتی۔

تفصیلات کے مطابق اسپیشل انویسٹی گیشن یونٹ کے کمانڈنٹ ڈاکٹر فرخ علی لنجار نے امید ظاہر کی ہے کہ اس نئی پولیس فورس کے ذریعے شہر میں اسٹریٹ کرائم کی ورداتوں کا ممکنہ حد تک خاتمہ ہوسکے گا۔میڈیا سے بات کرتے ہوئے انہوں نے کہا کہ تنگ جگہوں پر مجرموں کا تعاقب کرنا مشکل ہوجاتا ہے لیکن رولر اسکیٹس کے ذریعے مشتبہ افرادکا تعاقب کرنے اور ان کو پکڑنے میں پولیس کو مدد ملے گی۔

انہوں نے بتایا کہ اس ٹیم میں تربیت یافتہ 20 مردو خواتین مسلح اہلکار شامل ہیں اور ان اہلکاروں کی تعیناتی کے بارے میں تمام متعلقہ عہدیداروں کو مطلع کردیا گیا ہے۔ امید کی جاتی ہے کہ رولر اسکیٹس پولیس فورس جلد ہی شہر میں جرائم پیشہ افراد کو پکڑنے کے لئے آلہ کار بن جائے گی۔

اس حوالے انہوں نے مزید بتایا کہ شہر کے مختلف حصوں میں متعلقہ عہدیداروں کو ہدایت کی گئی ہے کہ وہ تنگ گزرگاہوں اور جگہوں کی نگرانی کے لئے یہ طریقہ اختیار کریں۔

بظاہر رولر اسکیٹس پولیس فورس ایک اچھا اقدام ہے لیکن اس حوالے سے محکمہ پولیس کو سڑکوں کی حالت زار کو بھی مدنظر رکھنا چاہئیے کیونکہ شہر کراچی میں سڑکوں کی بدحالی ایک خاص مسئلہ جس پر حکام شاذو نادر ہی توجہ دیتے ہیں۔ یہاں یہ بات قابل ذکر ہے کہ کراچی اور پاکستان کے بہت سے دوسرے شہروں کی تقریباً 75 فیصد سڑکیں ناقص اور ٹوٹی پھوٹ کا شکار ہیں۔ درحقیقت کئی علاقوں میں تو صورتحال اس سے بھی بدتر ہوگئی ہےاور تباہ حال سڑکوں کی تعداد روز بہ روز بڑھتی جارہی ہے۔

بلخصوص شہر قائد میں رواں سال مون سون کی بارشوں نےسڑکوں کو مزید خراب کردیا ہے۔ ان تمام حقائق کو دیکھتے ہوئے سوال یہ پیدا ہوتا ہے کہ کیا کراچی کی سڑکیں اس نئی پولیس فورس کی اسکیٹنگ کے لئے موزوں رہیں گی۔

بلاشبہ عالمی وباء کورونا وائرس نے پورے ملک میں انتشار اور خوف وہراس کی کیفیت پیدا کردی ہے۔ خاص طور پر کراچی کے رہائشیوں کے لئے، دیکھا جائے تو اس وجہ سے شہر میں جرائم کی شرح میں بھی اضافہ ہوا ہے۔ اس ضمن میں یہ امید کی جاسکتی ہے کہ یہ نئی اسکیٹنگ پولیس فورس تنگ راستوں اور گلی گلی گشت کرسکے گی جس سے شہر میں اسٹریٹ کرائم کی روک تھام ممکن ہوپائے گی۔