اسلام آباد میٹرو اسٹیشن کے واش روم سے کم عمر لڑکی کی لاش برآمد

پیر کے روز اسلام آباد کے علاقے جی- 11 میں واقع ایک غیر فعال میٹرو بس اسٹیشن کے واش روم سے ایک نوجوان لڑکی کی لاش برآمد ہوئی۔ پولیس کو شبہ ہے کہ لڑکی کو جنسی زیادتی کا نشانہ بنایا گیا اور پھر گلا دبا کر قتل کیا گیا ہے، کیونکہ متاثرہ لڑکی کے جسم پر کچھ نشانات بھی پائے گئے ہیں۔

پولیس کو پوسٹ مارٹم رپورٹ آنے کا انتظار ہے، جس کے بعد ہی موت کی اصل وجہ معلوم ہو سکے گی۔ دریں اثنا، ذرائع کا دعویٰ ہے کہ ایک راہگیر نے میٹرو بس اسٹیشن کے واش روم میں کم عمر لڑکی کی لاش دیکھی اور جس پر اس نے فوراً پولیس کو آگاہ کیا۔

پولیس نے موقع پر پہنچ کر لاش کو فوری طور پر اسپتال منتقل کیا۔ البتہ ابھی تک، لڑکی کی شناخت نہیں ہو سکی ہے جبکہ اس کی عمر بظاہر 11 سے 12 سال کے درمیان معلوم ہوتی ہے، پولیس کے مطابق واقعے کی تفصیلات پنجاب اور کے پی کے پولیس کے ساتھ وائرلیس پر شیئر کی گئی ہیں لیکن ابھی تک متاثرہ کی شناخت کے حوالے سے کوئی پیش رفت نہیں ہو سکی ہے۔

اس سلسلے میں پولیس نے وفاقی دارالحکومت کے تمام تھانوں کا ریکارڈ بھی چیک کیا ہے، اگر لڑکی کی گمشدگی کے بارے میں کوئی رپورٹ درج کرائی گئی ہو۔

اس کے علاوہ، پولیس نے میٹرو اسٹیشن کی تلاشی بھی لی تاکہ متاثرہ لڑکی کی شناخت ہو سکے اور قاتلوں کا کوئی سراغ مل سکے۔ تاہم، تلاشی کچھ نہیں مل سکا۔ پولیس کو بظاہر ایسا لگتا ہے کہ لڑکی کے ساتھ جنسی زیادتی کی گئی تھی اور اسے کہیں اور قتل کیا گیا تھا اور اس کی لاش کو بعد میں میٹرو اسٹیشن کے واش روم میں پھینکا گیا ہے۔

پولیس کے مطابق واقعہ اتوار کی رات پیش آیا اور لاش کو پیر کی صبح میٹرو بس اسٹیشن میں پھینکا گیا ہے۔

دوسری جانب پاکستان انسٹی ٹیوٹ آف میڈیکل سائنسز (پمز) کے ایک نمائندے نے بتایا کہ تین خواتین ڈاکٹروں پر مشتمل ایک میڈیکل بورڈ نے لاش کا پوسٹ مارٹم کیا۔ انہوں نے لاش سے نمونے لے کر کیمیکل جانچ کے لیے پولیس کے حوالے کر دیے ہیں۔

اس دوران حکام نے انکشاف کیا کہ لاہور سے کیمیکل ایگزامینر کی رپورٹ آنے کے بعد حتمی رائے اور رپورٹ دی جائے گی۔

ساتھ ہی پولیس نے بس اسٹیشن کے قریب اور اس کی طرف جانے والی سڑکوں پر نصب سی سی ٹی وی کیمروں کی فوٹیج کی بھی جانچ شروع کردی ہے۔ کچھ گاڑیوں کو مشتبہ کے طور پر نشان زد کیا گیا ہے۔ علاوہ ازیں ملزمان کی تلاش کے لیے علاقے کی جیو فینسنگ بھی شروع کی جا رہی ہے۔

پولیس نے میٹرو بس سٹیشن کے دو سکیورٹی گارڈز کو پوچھ گچھ کے لیے حراست میں لے لیا ہے۔ لڑکی کی موت کی تحقیقات کے لیے ایس ایس پی انویسٹی گیشن کی سربراہی میں ایک ٹیم تشکیل دی گئی ہے۔

ملک میں زیادتی کے واقعات میں غیرمعمولی اضافہ دیکھا گیا ہے، گزشتہ ماہ ایک ہولناک واقعہ سامنے آیا تھا جہاں گوجرہ میں M-4 موٹروے پر ایک 18 سالہ لڑکی کو نوکری کا جھانسہ دے کر اجتماعی زیادتی کا نشانہ بنایا گیا۔ جبکہ اس سے ایک ماہ قبل لاہور سے ایک خاتون کو نوکری کے انٹرویو کے لیے اسلام آباد بلایا گیا اور پھر انہیں مبینہ طور پر زیادتی کا نشانہ بنایا گیا تھا، جب کہ متاثرہ خاتون کے بچے اور شوہر باہر انتظار کر رہے تھے۔