انوکھی شادی، دلہن ٹریکٹر پر بارات لیکر دولہا کو لینے پہنچ گئی

دنیا بھر میں شادیوں کے رواج مختلف ہوتے ہیں تاہم ایک رسم ہمیشہ نبھائی جاتی ہے جس میں شادی والے دن بارات پر دولہا اپنی دلہن لینے کے لیے جاتا ہے، تاہم بھارت سے ایک حیران کن خبر سامنے آئی ہے جس میں ایک دلہن ٹریکٹر پر بارات لیکر خود اپنے دولہا کو لینے پہنچ گئی۔

یہ بات مشاہدے میں آئی ہے کہ بھارت کی دلہنیں ماضی کی روایتوں کو توڑتے ہوئے شادی کے مقام پر مختلف انداز میں انٹری دینے لگی ہیں بلکہ اب تو بھارتی دلہنیں نت نئے انداز میں اپنی بارات بھی لے جانے لگی ہیں. سوشل میڈیا پر وائرل ویڈیو میں بھارتی ریاست مدھیہ پردیش کے ضلع بیتل میں ہونے والی شادی میں ایک دلہن کو اپنے بھائیوں کے ہمراہ ٹریکٹر پر شادی کے لیے پہنچتے ہوئے دیکھا جاسکتا ہے۔

مذکورہ ویڈیو میں دیکھاجاسکتا ہے کہ عروسی لباس پہنے پوری سج دھج کے ساتھ دلہن اپنی شادی کے لیے ٹریکٹر خود چلا کر شادی کے مقام پر پہنچ رہی ہے اور لڑکی کے دونوں بھائی بھی اس کے ساتھ ٹریکٹر پر موجود ہیں جبکہ ٹریکٹر برقی قمقموں اور پھولوں سے سجا ہوا ہے۔

یہ انوکھی بارات جب شادی کے مقام پر جاکر رکتی ہے وہاں اس کا پُرتپاک استقبال کیا جاتا ہے، مہمانوں کی خاطر داری کی جاتی ہے اور مختصر سی تقریب کے بعد دلہا دلہن اپنے نئے گھر کو روانہ ہوجاتے ہیں۔

اس وائرل ویڈیو پر صارفین کے تبصروں کا سلسلہ جاری ہے۔ کسی نے دلہن کو بہادر کہا تو کسی نے اس خواہش کا اظہار کیا کہ وہ بھی اس طرح شادی کرنا چاہتے ہیں۔بعض نے دلہن کیجانب سے شادی میں روایات کی تبدیلی کو ناپسند کرتے ہوئے انہیں تنقید کا نشانہ بنایا۔

خیال رہے کہ اس سے قبل بھی بھارت میں ایک شادی کی تقریب میں دلچسپ سین ہوا تھا اور دو سگی بہنوں کی غلط دولہوں سے شادی ہوگئی۔انڈیا ٹوڈے کے مطابق مدھیا پردیش کے ایک گاؤں میں دو سگی بہنوں کی شادی کی رسومات کے دوران اچانک بجلی بند ہوگئی، جس کے باعث دونوں بہنوں کی غلط دلہوں کے ہمراہ شادی ہوگئی۔ تاہم بعد میں دونوں خاندانوں کی باہمی رضامندی کے بعد دلہنوں کی صحیح دلہوں سے شادی کروائی گئی۔

علاوہ ازیں، گزشتہ دنوں بھی ایک امریکی دولہا دلہن نے شادی کے لیے عجیب وغریب فوٹو شوٹ کا انتخاب کیا اور خود ہی اپنی عروسی لباس میں آگ لگالی۔ دولہا جس کا نام گیب جیسپ اور دلہن ایمبری بیمبر بطور مووی اسٹنٹ ڈبل کام کرتے ہیں جہاں دونوں کی ملاقات ہوئی اور دونوں نے شادی کا فیصلہ کیا۔ اس جوڑے نے اپنی پیشہ ورانہ تربیت سے فائدہ اٹھاتے ہوئے شادی کو ہمیشہ کے لیے یادگار بنادیا۔ مذکورہ ویڈیو میں دلہن کو عروسی لباس پہنے ایک ہاتھ میں گلدستہ لے کر شوہر کا ہاتھ تھامے بھاگتے دیکھا جاسکتا ہے کہ جب کہ دولہا بھی تھری پیس سوٹ میں ہے اور دونوں کے کپڑوں میں پیچھے آگ لگی ہوئی ہے۔ جوڑے کی شادی کی یہ ویڈیو سوشل میڈیا پر وائرل ہے جسے اب تک لوگوں کی بڑی تعداد دیکھ چکی ہے۔