غنا علی کی شوہر کے ہمراہ تصویر پر خاتون صارف کا ہتک آمیز تبصرہ

پاکستانی کی مقبول اداکارہ غنا علی شادی کے بعد سے سوشل میڈیا ٹرولنگ کی زد میں ہیں ۔جب بھی وہ سوشل میڈیا پر اپنے شوہر کے ساتھ کوئی تصویر پوسٹ کرتی ہیں تو مثبت کے بجائے منفی تبصرے کرنے والے زیادہ نظر آتے ہیں لیکن اس کے باوجود وہ اہنے شوہر کے ساتھ اپنی تصاویر شیئر کرتی رہتی ہیں اور اکثر ٹرولنگ کرنے والوں کو ’شٹ اپ کال‘ بھی دیتی نظر آتی ہیں۔

حال ہی میں غنا علی نے اپنے انسٹا گرام اکاؤنٹ پر شوہر کے ساتھ کچھ نئی تصویریں شیئر کیں تو روایت کو برقرار رکھتے ہوئے صارفین نے جوڑے کو تنقید کا نشانہ بنایا۔ اداکارہ نے اپنی پوسٹ کے کیپشن میں لکھا ‘مائی ہسبینڈ ، آئی لو یو ‘۔ ان تصویروں میں اداکارہ کے شوہر ان کے گال پر بوسہ دے رہے ہیں جبکہ دونوں نہایت خوشگوار موڈ میں ہیں۔

سوشل میڈیا صارفین ان تصویروں پر کہاں چپ بیٹھنے والے تھے، ایک خاتون نے لکھا کہ ‘تمہارا شوہر یہ جو زبردستی ہنستا ہے نا زہر لگتا ہے زہر’، غنا علی نے خاتون کو آڑے ہاتھوں لیتے ہوئے جواب دیا کہ ‘ایسے کمنٹ تو ہمیں بھی زہر لگتے ہیں پر کیا کریں ہر انسان اپنی زندگی کا مالک ہے۔’

یہ کوئی پہلا موقع نہیں ، شادی کے بعد سے جب بھی غنا علی شوہر کے ہمراہ کوئی تصویر شئیر کرتی ہیں تو زیادہ ترصارفین اُن کے شوہر کی ظاہری شخصیت کو ٹارگٹ کرتے ہیں اور تنقید کرنے سے باز نہیں آتے۔ ایک بار تو ایک صارف نے لکھا کہ ’کیا پیٹ ہے بھائی۔‘ جب کہ ایک خاتون صارف نے لکھا کہ ’یہ تو موٹو اور پتلو کی جوڑی ہے۔’

گزشتہ دنوں بھی سوشل میڈیا پر غنا علی ایک پوسٹ وائرل ہوئی تھی جس میں اداکارہ کی شوہر کے ساتھ رومانوی تصویروں پر مختلف ویب پیجز پر خوب کمنٹس کیے گئے۔ مداحوں کا خیال تھا کہ جوڑے کو اپنی ذاتی تصویریں آن لائن پوسٹ نہیں کرنا چاہئے ، جب کہ کچھ کا کہنا تھا کہ وہ ایسی تصویر کا مذاق نہ بنائیں تو اور کیا کریں؟ نیز اس تصویر کا مضحکہ خیز کیپشن بھی صارفین میں زیر بحث رہا تھا۔

واضح رہے کہ غنا علی رواں سال ہی کراچی کے رہائشی عمیر گلزار کے ساتھ رشتۂ ازدواج میں منسلک ہوئیں جو پہلے سے شادی شدہ اور ایک بچے کے باپ تھے۔ اداکارہ کے مطابق وہ اور ان کے شوہر کافی لمبے عرصے سے دوست تھے اور انہوں نے گھر والوں کو شامل کرکے شادی کی ہے۔

خیال رہے کہ غنا علی اب تک پاکستان کے کئی ڈراموں میں اپنی اداکاری کے جوہر دکھا چکی ہیں جن میں سُن یارا، کس دن میرا ویاہ ہووے گا سیزن 4، سایہ دیوار بھی نہیں، ہانیہ، چھوٹی چھوٹی باتیں اور سراب سمیت دیگر ڈرامے شامل ہیں۔ اس کے علاوہ وہ پاکستان کی کچھ مشہور فلموں میں بھی کام کرچکی ہیں جن میں رنگریزہ، مان جاؤ نا، اور کاف کنگنا شامل ہیں۔ جب کہ ان کی فلم ’’گواہ رہنا‘‘ ریلیز کے لیے تیار ہے جس کی کامیابی کے لیے وہ بہت پُرامید ہیں۔