عالمی ریکارڈ ہولڈر پاکستانی اپنی شرٹس فروخت کرنے پر مجبور

گینز بک کے 21 عالمی ریکارڈز پاکستان کے نام کرنے والا نوجوان فرحان ایوب غربت اور تنگدستی سے پریشان ہوکر اپنی قومی شرٹس 300 روپے میں سڑکوں پر بیچنے پر مجبور ہے۔ غربت کا یہ عالم ہے کہ ان کے پاس اتنے پیسے نہیں کہ وہ بس میں سفر کرسکیں اس لئے وہ دس ، دس کلوميٹر کا سفر بھی پیدل طے کرتے ہیں۔

پنجاب کے دارالحکومت لاہور سے تعلق رکھنے والے فرحان ایوب کا کہنا ہے کہ انہوں نے 21 ایسے ورلڈ ریکارڈ توڑ ڈالے ہیں جو گنیز بک آف ورلڈ ریکارڈز میں درج تھے۔

ڈیلی پاکستان سے گفتگو میں انہوں نے بتایا کہ وہ اب تک بھارت، امریکہ اور جاپان سمیت سات ممالک کے 21 ریکارڈز توڑ چکے ہیں جن میں مارشل آرٹس اور بریک ڈانس کے سٹیپس کے ریکارڈ شامل ہیں۔ انہوں نے اس کے ساتھ ساتھ چینلجنگ کیٹیگری کے ورلڈ ریکارڈ بھی بریک کیے ہیں۔

فرحان ایوب سینٹرل پنجاب یونیورسٹی میں بی ایس میڈیا سٹڈیز کے ساتویں سمیسٹر کے طالب علم ہیں اور ان کا فزیکل ٹریننگ میں بیس سال کا تجربہ ہے۔ جب انہوں نے مارشل آرٹس کی ٹریننگ شروع کی تو وہ سات سال کے تھے۔

انہوں نے بچپن سے نہایت مشکل زندگی گزاری جب وہ صرف دو ماہ کا تھا اور اس کا بڑا بھائی تین سال کا تھا ، جب ان کے والد اس دنیا فانی سے رخصت ہوگئے تو ان کی والدہ نے گھر کی کفالت کے لیے سلائی کی ، بعض اوقات ان کے پاس کھانا کھانے کے پیسے نہیں ہوتے تھے لیکن ان کی والدہ نے ہمت نہ ہاری اور اپنے بچوں کو پالنے کے لئے سخت محنت کرتی رہیں۔

فرحان ایوب نے بتایا کہ 7 سال کی عمر سے انہوں نے اپنی مدد آپ کے تحت روزانہ مارشل آرٹس پر ایک سے دو گھنٹے گزارنا شروع کر دیئے جب یہ 50 ڈگری کی گرمی میں سڑکوں پر اپنی مشق کرتے تو لوگ انہیں بیوقوف کہتے اور ان کا مذاق اڑاتے  لیکن فرحان نے لوگوں کی باتوں کی پرواہ نہیں کی اور وہ مسلسل محنت کرتے رہے اور 13 سال کی محنت کا پھل ان کو 2014 میں ملا جب انہوں نے ایک منٹ میں 34 کک آپ مار کر گنیز ورلڈ ریکارڈ کا ٹائٹل جیتا، پہلی کامیابی کے بعد تین سال تک حکومت نے انہیں مزید ریکارڈ توڑنے کے زیادہ مواقع نہیں دئیے لیکن انہوں نے ہمت نہ ہاری۔ایک سال کی محنت کے بعد عمران خان فاؤنڈیشن نے ان کا ساتھ دیا اور انہوں نے مزید تین عالمی ریکارڈ توڑ دئیے۔

مزید پڑھیں: ایئرو ناٹیکل انجینئر بےروزگاری کے باعث جوس کا ٹھیلا لگانے پر مجبور

فرحان ایوب نے بتایا کہ سال 2014 میں نے پنجاب یوتھ فیسٹیول میں ایک منٹ میں 34 کپ اپس انجام دے کر ریکارڈ توڑا۔ اس سے قبل یہ اعزاز ایک برطانوی کھلاڑی کے پاس تھا جس کا اسکور ایک منٹ میں 22 کپ اپس تھا۔ انہوں نے بتایا کہ پھر مزید تین سال تک کوششیں جاری رہیں اور پھر 2017 میں ایک اور ورلڈ ریکارڈ بریک کیا۔ وہ موسٹ نو ہینڈڈ کیپ اپ کا ریکارڈ تھا جو سب سے مشکل ریکارڈ تھا، اس ریکارڈ میں سر کے بل بغیر ہاتھوں کی مدد سے اٹھنا تھا، یہ ریکارڈ توڑنے پر وزیر اعظم عمران خان نے بنی گالہ میں انہیں شیلڈ بھی دی تھی۔ فرحان ایوب نے مزید بتایا کہ وہ موٹیویشنل اسپیچز بھی کرتے ہیں اور ملک کے کئی بڑے تعلیمی اداروں میں طلبہ سے خطاب بھی کرچکے ہیں۔

مزید پڑھیں: شوبز انڈسٹری سے منسلک مشہور نام آج انڈہ پراٹھہ بیچنے پر مجبور

افسوس کہ عالمی سطح پر پاکستان کا نام روشن کرنے والا یہ ٹیلینٹڈ نوجوان اپنی غربت سے مجبور ہوکر صرف 300 روپے میں اپنی قومی شرٹس بیچ رہا ہے کیونکہ میرٹ پر ہونے کے باوجود اس کے پاس کوئی روزگار نہیں۔ فرحان کئی بار حکومتی شخصیات سے مل چکے ہیں لیکن کسی نے بھی ان کی داد رسی نہ کی۔ انہوں نے حکومت سے درخواست کی کہ ان کی مالی معاونت کی جائے۔

Story Courtesy: Daily Pakistan