ایک اور بھارتی اداکارہ نے فواد خان کیلئے پسندیدگی کا اظہار کردیا

پاکستانی عالمی شہرت یافتہ سپر اسٹار فواد خان کی پُرکشش شخصیت سے کون متاثر نہیں، اس پر ان کی بہترین اداکاری نے تو لوگوں کو ان کا گرویدہ بنادیا ہے یہی وجہ ہے کہ پاکستان سمیت دنیا بھر میں لاکھوں کی تعداد میں ان کے فین موجود ہیں۔ بھارتی پنجابی فلم انڈسٹری کی ماڈل و اداکارہ سونم باجوہ نے بھی ان کے لئے پسندیدگی کا اظہار کیا ہے۔

سوشل میڈیا پر سونم باجوہ کے انٹرویو کا ایک ویڈیو کلپ لوگوں کی توجہ کا مرکز بنا ہوا ہے جس میں وہ فواد خان سے اپنی محبت کا اعتراف کررہی ہیں۔ ویڈیو پورٹل ‘کنیکٹ ایف ایم کینیڈا’ میں گفتگو کرتے ہوئے سونم سے ان کی پسند سے متعلق سوال کیا گیا جس پر انہوں نے جواب دیا کہ یہ ایک راز ہے جسے میں افشا نہیں کرسکتی، اتنا ضرور بتا سکتی ہوں کہ جس شخص سے میں تعلقات بڑھاتی وہ شادی شدہ ہے۔

اس موقع پر سونم باجوہ نے بات جاری رکھتے ہوئے کہا کہ وہ شخص فواد خان ہیں، اگر وہ شادی شدہ نہیں ہوتے تو میں ان کے ساتھ مزید تعلقات بڑھاتی، مجھے وہ پسند ہیں۔انہوں نے مزید کہا یوں تو میں شادی شدہ مردوں پر نظر نہیں رکھتی ، یہ فواد خان ہیں اس لیے اگر ان کی شادی نہ ہوئی ہوتی تو میں ان سے اپنے تعلقات مضبوط کرتی۔

خیال رہے کہ اس سے قبل برطانوی نشریاتی ادارے کو دئیےگئے انٹرویو میں سونم باجوہ پاکستانی اداکارہ سجل علی کی بھی دل کھول کر تعریف کرچکی ہیں۔

ڈرامہ سیریل ہم سفر، داستان، زندگی گلزار ہے، سے کامیابیوں کی بلندیوں کو چھونے والے فواد خان نے اپنی اداکاری کے جوہر بکھیرتے ہوئے نہ صرف پاکستانیوں سے داد حاصل کی بلکہ بالی ووڈ میں بھی بھر پور انٹری دیتے ہوئے تہلکہ مچادیا۔فواد خان اپنی شاندار شخصیت کی بدولت گزشتہ دنوں دنیا کے سب سے خوبصورت ترین چہروں کی فہرست میں بھی شامل ہوئے۔غیر ملکی میڈیا رپورٹ کے مطابق دنیا کے خوبصورت ترین افراد کا تعین کرنے والی ویب سائٹ ٹی سی کینڈلر نے 2022 کے خوبصورت ترین چہروں کی فہرست جاری کردی ہے۔مذکورہ ادارہ 1990 سے لے کر ہر سال دنیا کے خوبصورت اور پُرکشش شخصیات کی فہرست جاری کرتا آرہا ہے۔اس فہرست میں ہالی ووڈ، بالی ووڈ اور لالی ووڈ کے بڑے نام شامل ہیں اور امیدواروں کو ان کی عالمی مقبولیت کی بنیاد پر نامزد کیا جاتا ہے۔فواد خان کے علاوہ اس مرتبہ فہرست میں عمران عباس، نیلم منیر، سجل علی اور عائزہ خان کا نام بھی شامل کیا گیا۔

علاوہ ازیں، سپر اسٹار فواد خان آجکل اپنی نئی ریلیز ہونیوالی فلم ‘دی لیجنڈ آف مولا جٹ’ کی کامیابی پر دنیا بھر سے تعریفیں سمیٹ رہے ہیں۔اس فلم نے صرف ایک ہفتے میں سات بڑی پاکستانی فلموں کو مات دیدی۔ وار، جوانی پھر نہیں آنی ٹو، لندن نہیں جاؤں گا، پنجاب نہیں جاؤں گی، بن روئے، طیفا ان ٹربل اور پرواز ہے جنون کی پوری آمدنی کے برابر اس فلم نے صرف ایک ہفتے میں کما کر دکھائے۔ یاد رہے کہ فواد نے اپنے فنی کریئر کا آغاز احمد بٹ کے کامیڈی ڈرامہ جٹ اینڈ بونڈ سے 2000 میں کیا، اس سے قبل وہ تھیٹر ڈراموں میں بھی کام کرچکے تھے۔