نریندر مودی حکومت کا ابھینندن کو فوجی اعزاز

نریندر مودی حکومت نے اپنی خفت چھپانے کے لئے پاکستان میں گرفتار ہونے والے بھارتی پائلٹ ابھینندن کو بھارت کے تیسرے بڑے ایوارڈ ‘ویر چکرا‘ سے نوازا ہے، یہ ایوارڈ جنگ کے دوران دشمن کے سامنے فوجی کی بہادری کو دیکھتے ہوئے اُسے دیا جاتا ہے لیکن ونگ کمانڈر ابھینندن کو یہ ملنے پر سوشل میڈیا پر ابھینندن اور مودی سرکار کی درگت بن گئی ہے۔

دو برس قبل 26 فروری کو پاکستانی فضائیہ نے اپنی حدود میں ایک بھارتی طیارہ مار گرایا تھا۔ بھارتی پائلٹ نے پیرا شوٹ کے ذریعے طیارے سے چھلانگ لگا کر اپنی جان بچائی تھی تاہم ابھینندن پاکستانی علاقے میں گرا اور شہریوں نے خوب درگت بنائی تھی۔

اس موقع پر پاک فوج نے اعلیٰ ظرفی کا مظاہرہ کرتے ہوئے بھارتی پائلٹ کو مشتعل ہجوم سے بچایا اور یکم مارچ کو بھارت کے حوالے کردیا تھا۔ پاک فوج نے ابھینندن کو شہریوں کے چنگل سے نکال کر ایک بار پھر اس کی جان بچائی تھی اور چائے پلا کر بھارت کے حوالے کر دیا تھا۔ جس پر بھارتی پائلٹ نے ’’ ٹی از فنٹا سٹک‘‘ کا تعریفی جملہ کہا تھا جو سوشل میڈیا پر اب تک میم بنتا آ رہا ہے۔

واضح رہے کہ مودی سرکاری نے دعویٰ کیا تھا کہ ابھینندن نے ایک پاکستانی ایف 16 طیارے کو مار گرایا تھا تاہم بین الاقوامی میڈیا نے پاکستانی طیارہ گرانے کے دعوے کو مسترد کر دیا تھا جبکہ بعد ازاں خود بھارتی فوج نے بھی پاکستانی طیاروں کی گنتی کو پورا قرار دیا تھا۔ لہٰذا بھارت نے اپنے اس سفید جھوٹ پر عالمی سطح پر بدنامی اور بھارتی عوام کی خفگی کو مٹانے کے لیے ابھینندن کو ملک کا تیسرا بڑا ایوارڈ ’ویر چکرا‘ دیا ہے۔ بھارتی حکومت چاہے کیسے بھی اپنی خفت چھپائے لیکن اس ساری صورتحال میں سوشل میڈیا صارفین کافی محظوظ ہو رہے اور مائیکرو بلاگنگ سائٹ ٹوئٹر پر مزاحیہ ٹویٹس کا سلسلہ چل پڑاہے۔

ایک صارف نے لکھا کہ کیا یہ حقیقیت ہے؟ پاکستانی حراست میں چائے پینے پر انعام؟ تو کوئی صارف ’’ایوارڈ از آل سو فنٹاسٹک‘‘ لکھ کر طعنہ دے رہا ہے تو کسی نے ناکام مشن پر ایوارڈ دینے کا مذاق بنایا۔ ایک صارف نے طنزاً لکھا کہ ’میں بہادر ابھینندن کو ایف 16 گرانے اور پھر اپنی جیت کا جشن منانے کے لیے اپنے جہاز سے ایجیکٹ ہوکر پاکستان چائے پینے کے لیے اترنے پر مبارکباد دیتا ہوں۔ بالی ووڈ نے اکیلے پوری انڈین ملٹری اسٹیبلشمنٹ کو کرپٹ کر دیا ہے۔

مزید پڑھیں: بھارتی طیارہ گرانے والے ونگ کمانڈر نعمان اور حسن کیلئے ستارہ جرات

تاہم ان تمام مضحکہ خیز ٹوئٹس میں ایک ٹوئٹر صارف کی ٹوئٹ ٹاپ پوزیشن پر رہی ،جنہوں نے لکھا کہ ابھی نندن جو اپنے مشن میں ناکام رہے پکڑے گئے اور پاکستان نے واپس بھیج دئیے گئے۔ بھارتی حکومت: تم ہمارا ہیرو ہے! تیرے کو نہیں پتہ پر تو ہے!

یاد رہے کہ ابھینندن کو ویر چکر ایوارڈ کا اعلان اگست 2019 میں کیا گیا تھا اور اب انہیں بھارتی وزیر اعظم نریندر مودی اور ملک کے وزیر دفاع راج ناتھ سنگھ کی موجودگی میں یہ ایوارڈ دیا گیا ہے۔