سوشل میڈیا پر عامر لیاقت کا طوبیٰ کی تصویر پر طنزیہ وار

رکن قومی اسمبلی، ٹی وی میزبان اور مذہبی اسکالر عامر لیاقت حسین ایک بار پھر خبروں کی زینت بنے ہوئے ہیں ، اس بار معاملہ عمران خان کی حکومت پر تنقید کا نہیں بلکہ سابق اہلیہ طوبیٰ انور کے لیے نامناسب الفاظ استعمال کرنے کا ہے جس پر صارفین کیجانب سے سخت ردعمل کا اظہار کیا جا رہا ہے۔

حال ہی میں عامر لیاقت حسین نے طوبیٰ انور کی مِیمِ کو اپنے انسٹاگرام پر شیئر کرتے ہوئے ان کے لیے نامناسب الفاظ کا استعمال کیا جس پر سوشل میڈیا صارفین نے  انہیں ٹرول کرنا شروع کردیا۔ عامر لیاقت نے جو مِیمِ شیئر کی تھی، اس میں ایک تصویر طوبیٰ انور کو افطار کرتے دیکھا جاسکتا تھا، ساتھ میں کیپشن میں لکھا گیا تھا کہ سیدہ طوبیٰ شیطان کے بغیر پہلی افطاری کرتے ہوئے۔

طوبیٰ انور پر بنی اس مِیمِ کو شیئر کرتے ہوئے عامر لیاقت نے انسٹاگرام پر پوسٹ کی کہ ’ارے یہ تو وہی ہے ہاں وہی، ارے شیطان تو ویسے بھی نظر نہیں آتا پھر یہ کسے ڈھونڈ رہی ہے‘؟

انہوں نے مزید لکھا کہ ’ ممکن ہے کہ یہ شیطان کو نظر نہ آتی ہو اور شیطان اسے نہ دیکھ پاتا ہو؟‘

معروف میزبان نے طوبیٰ انور کو آڑے ہاتھوں لیتے ہوئے طنزیہ پوسٹ تو کی مگر اس پر کمنٹس کا آپشن بند کردیا ، تاہم ان کی اس پوسٹ کو دیگر سوشل میڈیا پیجز پر بھی شیئر کیا گیا، جہاں لوگوں نے انہیں سخت تنقید کا نشانہ بنایا۔

عامر لیاقت کے سابق اہلیہ پر بنی مِیمِ پر شیطان سے متعلق جملے لکھنے پر لوگوں نے ان کے لیے بھی سخت الفاظ کا استعمال کیا اور عامر لیاقت کے الفاظ پر توبہ استغفار کی اور لکھا کہ انہیں سابق اہلیہ کے لیے کچھ تو اچھے الفاظ استعمال کرنے چاہیے۔جبکہ کچھ صارفین نے دعویٰ کیا کہ عامر لیاقت کا دماغ مکمل طور پر خراب ہوچکا ہے، کچھ نے لکھا کہ یہ شخص رمضان میں بھی بعض نہیں آیا اور کسی نے انہیں ’جاہل‘ قرار دیا۔

واضح رہے کہ عامر لیاقت نے طوبیٰ انور سے جولائی 2018 میں شاد کی تھی اور رواں برس دونوں کے درمیان خلع ہوگئی تھی، تاہم خلع ہونے کے فوری بعد عامر لیاقت نے خود سے 31 برس کم عمر سیدہ دانیہ شاہ سے شادی کرلی تھی۔تاہم حالیہ دنوں میں عامر لیاقت حسین نے اپنی سابق پہلی بیوی سیدہ بشریٰ اقبال کو رمضان ٹرانسمیشن کی مبارکباد دی تھی جس کا ایک اسکرین شاٹ سوشل میڈیا پر کافی وائرل بھی ہوا۔ اس پوسٹ میں عامر لیاقت اور ان کی پہلی اہلیہ کی ایک پرانی تصویر لگی ہوئی تھی جس کے ساتھ عامر لیاقت کا پیغام بھی درج تھا۔

خیال رہے کہ ہرسال ماہ رمضان میں عامر لیاقت حسین کسی نہ کسی چینل سے رمضان ٹرانسمیشن کی میزبانی کے فرائض سر انجام دیتے ہیں مگر کچھ ماہ قبل دئیے گئے ان کے بیان کے مطابق وہ ایک بین الاقوامی پراجیکٹ میں مصروف ہیں جس کی وجہ سے انہوں نے اس سال رمضان ٹرانسمیشن کی میزبانی نہ کرنے کا فیصلہ کیا ہے۔