وزن میں غیر معمولی کمی سے، احمد علی بٹ نے سب کو حیران کردیا

شوبز انڈسٹری کی شخصیات ہمیشہ ہی خبروں میں اِن رہتی ہیں کبھی کسی ڈرامہ سیریل یا فلم میں اپنے کردار کی وجہ سے اور کبھی اپنے فیشن یا پھر سوشل میڈیا پر پوسٹ کی وجہ سے۔ اس بار ایسا ہی کچھ پاکستان کے معروف میزبان اداکار احمد علی بٹ نے بھی کیا ہے اور سوشل میڈیا پر اپنی پوسٹ سے سبھی کو حیران ہونے پر مجبور کردیا ہے۔

پاکستانی ہٹ فلم “جوانی پھر نہیں آنی”میں اپنی مزاحیہ اداکاری سے شہرت پانے والے احمد علی بٹ کی جانب سے حال ہی میں سوشل میڈیا پر انئی تصویریں شیئر کی گئی جنہیں دیکھ کر مداحوں کے منہ کھُلے کے کھُلے رہ گئے ہیں۔ دراصل احمد علی بٹ نے اپنے وزن میں نمایاں کمی کرلی ہے اور وزن میں اس غیر معمولی کمی کی وجہ سے وہ چہرے سے لے کر جسامت تک میں بالکل تبدیل ہوگئے ہیں اور اپنے اس نئے لک میں وہ اپنی عمر سے کافی چھوٹے اور اچھے بھی لگ رہے ہیں۔

گزشتہ دنوں احمد علی بٹ نے اپنے انسٹاگرام اکاؤنٹ سے ایک ویڈیو شیئر کی تھی جس میں انہوں نے اپنے مداحوں کو بتایا تھا کہ وہ “کیٹو ڈائیٹ” کررہے ہیں۔ پھر ان کی طرف سے سوشل میڈیا پر تصویر بھی شیئر کی گئی جو ان کی آنے والی فلم “پھٹے دیندے چک پنجابی” کے سیٹ کی ہے۔ احمد علی بٹ کی یہ فلم برطانوی اور بھارتی پروڈکشن ہاؤسز کی مشترکہ فلم ہے اور مذکورہ فلم احمد علی بٹ کی پہلی غیر ملکی فلم ہے۔ کامیڈین اداکار کی وائرل ہونے والی تصویروں کو دیکھ کر ایسا محسوس ہوتا کہ جیسے اپنے اس اہم پروجیکٹ کے لئے ہی انہوں نے کیٹو ڈائیٹ سے وزن کم کیا ہے۔

سوشل میڈیا پر ان کی وزن میں غیر معمولی کمی کی تصویروں پرعوام کی جانب سے بھی ملاجلا ردعمل دیکھنے میں آرہا ہے، کوئی ان کی اس باڈی ٹرانسفورمیشن پر حیران ہے اور اسے پسندیدگی کی نگاہ سے دیکھ رہا ہے تو کسی کو پرانے والے احمد علی بٹ یاد آرہے ہیں۔ مداحوں کی پسند ناپسند کی وجہ کوئی بھی ہو ان کی یہ تصاویر سوشل میڈیا پر خوب وائرل ہورہی ہیں۔

واضح رہے کہ ملکہ ترنم نور جہاں کے نواسے اور معروف کامیڈین اداکار احمد علی بٹ بھارتی پنجابی فلم “پھٹے دیندے چک پنجابی”سے بالی ووڈ میں انٹری دینے جارہے ہیں۔ اس فلم کی شوٹنگ برطانیہ اور کینیڈا میں کی جارہی ہے جبکہ فلم عید الاضحی پر سنیما گھروں کی زینت بنے گی۔ اس فلم کی دیگر کاسٹ میں معروف بھارتی اداکار گپی گریوال، نیرو باجوہ بھی شامل ہیں۔

احمد علی بٹ اس فلم میں کیسا کردار ادا کر رہے ہیں اس بارے میں حتمی طور پر کچھ کہا نہیں جا سکتا تاہم خبریں ہیں کہ فلم میں برصغیر کے پنجابیوں کے کردار دکھائے جائیں گے اور احمد علی بٹ پاکستانی کردار ہی ادا کریں گے۔