ابرارالحق کا نیا گانا بیگم شک کرتی ہے ،شوہروں کی دل کی آواز

گلوکار ابرار الحق اپنے گانوں میں نئے اور اچھوتے موضوعات کی وجہ سے کافی مشہور ہیں ۔اس بار ابرار الحق نے شوہروں کا دکھ سمجھتے ہوئے نیا گانا ریلیز کیا ہے جس کا عنوان ‘بیگم شک کرتی ہے‘ گانے میں پاکستانی بیگمات کے رویے کو مزاحیہ انداز میں دیکھایا گیا ہے۔

یہ گانا سپر ماڈل و اداکارہ صبا قمر اور ماڈل امان پر فلمایا گیا ہے، گانے میں صبا قمر ایک ایسی بیوی کا کردار ادا کر رہی ہیں جو اپنے شوہر پر شک کرتی ہے اور اس کی جاسوسی کے لئے جدید دور کے تمام دستیاب ذرائع استعمال کرتی ہے حتیٰ کے ڈرون کا استعمال بھی کرتی ہے۔ تاہم، اس گانے کو ریلیز کرتے ہوئے ابرار الحق نے اپنے یوٹیوب چینل پر کیپشن لکھا کہ یہ گانا ان تمام افراد کی نذر کرتا ہوں جو کہ کچھ زیادہ ہی شادی شدہ ہیں، یعنی “رن مرید” ہیں۔

‘بیگم شک کرتی ہے’، مزاحیہ گانا ہے جو بیوی کی جانب سے شوہر پر شک کیے جانے کی کہانی کے گرد گھومتا ہے جس میں شکی بیگم یعنی صبا قمر اپنے شوہر کی جاسوسی کے لئے تمام تر تقاضے پورے کرتے ہوئے اپنا کردار باخوبی نبھا رہی ہیں مگر ان کے اتنا شک اور جاسوسی کرنےکے باوجود آخر میں بیچارے شوہر معصوم نکلتا ہے اور واقعی اس کا کسی اور کے ساتھ کوئی چکر نہیں ہوتا بلکہ وہ تو صرف اپنی بیوی سے محبت کرتا ہے۔ البتہ اس گانے کو گنگنانے کا انداز ہو بہو مقبول ترین کورین گانے ‘بے بی شارک ڈوڈو’ جیسا ہے۔

ابرار الحق کا یہ نیا گانا 25 اکتوبر کو ریلیز ہوا ہے اور ریلیز ہونے کے بعد سے لوگوں میں کافی مقبول ہو رہا ہے اور اس کی ویڈیو بھی سوشل میڈیا پر خوب شیئر ہو رہی ہے۔

خیال رہے کہ گزشتہ سال گلوکار ابرار الحق کے گانے ‘چمکیلی‘ کو جہاں بے حد پذیرائی ملی وہیں یہ گانا تنازعے کے زد میں آگیا تھا اور گلوکار کو روایات کی خلاف ورزی کرنے پر شدید تنقید کا نشانہ بنایا گیا تھا۔

مزید پڑھیں: ابرار الحق کا بے بی شارک سے متعلق بیان، شوبز شخصیات کا ردعمل

اس گانے میں مہوش حیات کو اپنی بارات لے جاتے ہوئے دکھایا گیا تھا جبکہ مہوش حیات کے مدِمقابل شاہ ویر جعفری تھے جن کو رخصت کرکے لے جانے کے لیے وہ بارات لے کر جاتی ہیں۔ اس گانے کے غیر روایتی مرکزی خیال اور ویڈیو پر کافی تنقید ہوئی تھی جس پر ابرار الحق کا کہنا تھا کہ ناقدین گانے کو انجوائے کریں ،وہ گانوں کے ذریعے صنفی امتیاز ختم کرنے کی کوشش کر رہے ہیں اور اس کاوش کو سراہا جانا چاہیے۔