پانچ جاپانی پھل كے فائدے آپ کی جِلد كے لیے

نارنجی رنگ کا، وٹامنز سے بھرپور پھل املوک ‘جاپانی پھل’ کے نام سے بھی جانا جاتا ہے۔ اس پھل کو جاپان میں کاشت ہونے کی بنا پر جاپانی پھل کا نام دیا گیا ہے۔ اسے انگریزی میں پرسیمون بھی کہا جاتا ہے۔ اس کا ذائقہ ترش اور مزیدار ہوتا ہے۔ اس کا گودا نہایت نرم ہوتا ہے، اس لئے چاہیں صرف اس کا گودا کھائیں یا اسے چھلکے سمیت کھائیں دونوں ہی صورتوں میں جاپانی پھل کے فائدے ہی فائدے ہیں۔

Japani Phal Ke Fayde :جاپانی پھل کے فائدے

غذائی لحاظ سے جاپانی پھل پوٹاشیم، فاسفورس اور وٹامن سی کے حصول کا اچھا ذریعہ ہے۔ ایک 100 گرام پھل میں 70 کیلوریز، 18.59 گرام کاربوہائیڈریٹس، 0.58 گرام پروٹین، 0.19 گرام چکنائی، 3.6 گرام فائبر، 81 مائیکرو گرام وٹامن اے، 7.5 ملی گرام وٹامن سی، 253 مائیکرو گرام بیٹا کیروٹین،  161 ملی گرام پوٹاشیم، 17 ملی گرام فاسفورس، 8 ملی گرام کیلشیئم، ایک ملی گرام سوڈیم اور 150 مائیکرو گرام آئرن موجود ہوتے ہیں۔ان بیشمار وٹامنز اور منرلز کی وجہ سے جاپانی پھل کے فائدے ہماری صحت کے ساتھ ساتھ ہماری جِلد پر بھی مثبت اثرات مرتب کرتے ہیں، کیسے؟ آئیے جانتے ہیں۔

:جِلد چمکدار بناتا ہے

جاپانی پھل کا فیس ماسک جلد کو چمک دار بنانے کے لیے بہترین ہے کیونکہ اس میں وٹامن اے، ای اور کیروٹین کی موجودگی جِلد کو قدرتی چمک فراہم کرکے اسے دلکش اور خوبصورت بناتی ہے۔اپنے چہرے پر قدرتی چمک بڑھانے کے لئے اس کا گودا چہرے پر لگائیں اور تیس منٹ کے بعد چہرہ پانی سے دھولیں۔

:بڑھتی عمر کے اثرات کم کرتا ہے

جاپانی پھل کے چھلکے میں موجود فائٹو کیمیکل جلد پر نمودار ہونیوالے بڑھتی عمر کے اثرات اور جھریوں سے بچاتا ہے۔ان اینٹی ایجنگ خصوصیات سے جلد جوان اور صحت مند رہتی ہے۔یہ پھل جِلد میں فری ریڈیکل کی افزائش کو روکتا ہے اور جِلد پر بڑی عمر کے اثرات کو ظاہر نہیں ہونے دیتا۔

:جِلد کی زائد چکنائی کو روکتا ہے

جِلد میں پائی جانیوالی زیادہ چکنائی جلد کے مساموں کو بند کرتی ہے جس سے مہاسے پھوٹ پڑتے ہیں۔جاپانی پھل کا گودا،کھیرے کے جوس کے ساتھ چہرے پر لگانے سے مساموں کو صاف کرنے اور زائد چکنائی کو روکنے میں مدد ملتی ہے۔

:جِلد کو جھریوں سے بچاتا ہے

جاپانی پھل میں موجود آکسی ڈنٹ لائیکو پین قدرتی سن اسکرین کا کام دیتا ہے اور الٹراوائلٹ شعاعوں سے بچاتا ہے، لائیکو پین کا روزانہ استعمال جلد کو دھوپ سے ہونے والے نقصان سے بچا کر جلد پر جھریاں اور لکیریں نہیں پڑنے دیتا۔

مزید پڑھیں: جاپانی پھل املوک کھانے میں مزیدار اور فائدے بےشمار

یوں تو جاپانی پھل کے کئی فائدے ہیں لیکن یہاں آپ کو یہ بتاتے چلیں کہ جاپانی پھل ایک اینٹی آکسیڈنٹ پھل بھی ہے جس کے باعث اس سے بہت سی بیماریوں سے تحفظ میں مدد ملتی ہے، یہ جسم سے فاضل مادوں کو زائل کرنے سمیت دل کی بیماریوں، کینسر، شوگر، ذہنی تناؤ سے بھی بچاتا ہے۔یہ ایک گرم مزاج پھل ہے اس لئے اگر آپ اسے جِلد پر لگانے کے ساتھ کھانا بھی چاہتے ہیں تو ذرا اعتدال میں کھائیے گا۔اس کا ذائقہ تھوڑا ترش ہوتا ہے اسی وجہ سے بہت سے لوگ اسے کھانا پسند نہیں کرتے ہیں لیکن قدرت کے اس خاص پھل کو ضائع نہ کریں، بلکہ اپنی غذا میں شامل کریں اور اس سے فائدہ اٹھائیں۔