پاکستان کے معروف گلوکار، موسیقار، ڈرمر، ریکارڈ پروڈیوسراور ویڈیو آرٹسٹ فرہاد ہمایوں انتقال کرگئے۔اس افسوس ناک خبر کا اعلان بینڈ کے آفیشل پیج پر کیا گیا، بینڈ کے آفیشل فیس بک پیج پر پوسٹ میں لکھا گیا کہ عظیم فرہاد ہمایوں آج صبح ہمیں چھوڑ کر ستاروں کی دنیا میں چلے گئے ہیں۔
سوشل میڈیا پوسٹ میں مزید کہا گیا ہے کہ فرہاد ہمایوں وقت سے بہت آگے تھے اور اپنی زندگی بھرپور انداز میں جینا چاہتے تھے۔ ان کی خواہش کے احترام میں تمام احباب اور مداحوں سے دعا کی درخواست کی جاتی ہے۔ پوسٹ میں مزید کہا گیا کہ ہم انہیں ڈیوڈ بووی کے یہ الفاظ کہتے ہوئے تقریباً سن سکتے ہیں ” مجھے نہیں معلوم کہ میں یہاں سے کہاں جا رہا ہوں، لیکن میں وعدہ کرتا ہوں کہ یہ بورنگ نہیں ہوگا۔”
پوسٹ میں گلوکار کی موت کی وجوہات سے متعلق آگاہ نہیں کیا گیا تاہم خاندانی ذرائع کے مطابق وہ کینسر میں مبتلا تھے۔
واضح رہے کہ فرہاد ہمایوں نے2018 میں ایک پوسٹ کے ذریعے مداحوں کو خود آگاہ کیا تھا کہ وہ برین ٹیومر میں مبتلا ہیں اور اپنا مناسب علاج کروا رہے ہیں تاہم موسیقی کی دنیا کے اس ستارے کی چمک محض تین سال میں مانند پڑگئی اور وہ دنیا سے کوچ کرگئے۔
برین ٹیومر کا آپریشن ہوجانے کے بعد فرہاد ہمایوں فیس بک پر اپنی مصروفیات سے متعلق پوسٹس کرتے رہتے تھے، تاہم انہوں نے کبھی بھی صحت کے حوالے سے مداحوں کو کوئی خبر نہیں دی تھی۔ عام طور پر وہ اپنے گانے اور انٹرویوز سمیت دیگر شوبز مصروفیات سے متعلق پوسٹس کرتے دکھائی دیتے تھے۔
فرہاد ہمایوں نے 2003 میں ’’اوور لوڈ‘‘ نامی میوزک گروپ تشکیل دیا تھا، جس کا شمار ملک کے مشہور میوزک بینڈز میں ہوتا ہے۔ اگرچہ گلوکار فرہاد ہمایوں میوزک بینڈ ’’اوور لوڈ‘‘ کی وجہ سے مشہور ہیں لیکن انہوں نے اپنے فنی سفر کا آغاز بطور انڈر گراؤنڈ موسیقار کی حیثیت سے شروع کیا تھا اور دو بینڈز تشکیل دئیے تھے ’’کووین‘‘ اور ’’منڈروئٹ‘‘ جس میں وہ ڈرم بجاتے تھے۔میوزک انڈسٹری کے نامور موسیقار اور کوک اسٹوڈیو میں ڈرمر کے فرائض سرانجام بھی دئیے۔
تیرالیس سالہ ہمایوں فرہاد نے اپنے آڈیواور ویڈیوز کاموں کے لئے متعدد ایوارڈز بھی جیتے اور وہ لاہور کے مشہور ریکارڈنگ اسٹوڈیو ریاوٹ اور گیگ وینیو اسٹوڈیوز کے مالک بھی تھے۔ مرحوم کے والد شہزاد ہمایوں کمنٹیٹر تھے جبکہ والدہ نوید شہزاد اداکاری کے شعبے سے وابستہ ہیں۔
دوسری جانب ، نوجوان موسیقار کی اچانک موت نے فنکار برادری کو بھی گہرے دُکھ میں مبتلا کر دیا۔ ان کی وفات پر گلوکارو موسیقاروں کے علاوہ سماجی وسیاسی شخصیات بھی غمزدہ ہیں اور سوشل میڈیا پر اپنے پیغامات کے ذریعے فرہاد ہمایوں کو خراج عقیدت پیش کررہے ہیں۔
فرہاد ہمایوں کی انتقال کی خبر سامنے آنے کے بعد ان کے مداحوں نے بھی سوشل میڈیا پلیٹ فارمز پر ان کی موت پر افسوس کا اظہار کیا اور اپنے تبصروں میں ان کی موسیقی سے جڑی یادیں تازہ کیں۔
خیال رہے کہ اس سال کی شروعات میں ،بھارت کے مشہور پنجابی گلوکار دل جان سنگھ ایک روڈ ایکسیڈنٹ میں اپنی جان سے ہاتھ دھو بیٹھے۔ دلجان 2012 میں بھارتی اور پاکستانی گلوکاروں کے مقابلے “سرکشیترا” کے رنر اپ تھے۔ اس پروگرام میں عاطف اسلم پاکستان کی جانب سے میزبانی کے فرائض سر انجام دئیے تھے۔
علاوہ ازیں ، پچھلے سال بالی وڈ کی کئی ہٹ فلموں کی موسیقی ترتیب دینے والی کامیاب جوڑی “ساجد واجد” کے واجد خان کا 42 سال کی عمر میں انتقال کرگئے۔واجد خان کو متعدد بیماریاں لاحق تھیں، کڈنی انفیکشن اور پھر کرونا وائرس سے متاثر ہونے کے بعد ان کی حالت بگڑ گئی تھی اور چار دن وینٹی لیٹر پر رہنے کے بعد وہ اپنے خالق حقیقی سے جاملے۔
0 Comments