زارا نور عباس کا جلد شادی سے متعلق بیان سوشل میڈیا پر وائرل ہوگیا

فلم ‘چھلاوہ’ اور ‘پرے ہٹ لو’ کی اداکارہ زارا عباس نور نے ڈرامے ‘دھڑکن’ سے ٹیلی وژن پر ڈیبیو کیا تھا۔ شوبز انڈسٹری میں زارا نور عباس کا شمار ان اداکاروؤں میں ہوتا ہے جنہوں نے اپنی ایکٹینگ سے بہت کم وقت میں نام کمالیا ہے۔اگرچہ ابھی انہیں کام کرتے ہوئے زیادہ عرصہ نہیں ہوا تاہم ان کے کردار شبّو، حیا اور رانی بہت مقبول ہیں۔

حال ہی میں وہ نجی ٹی وی چینل کے شو میں شریک ہوئیں، جہاں انہوں نے شوبز سمیت نجی زندگی پر بات چیت کی اور ساتھ ہی جلد شادی کرنے کا راز بھی بتایا۔ انہوں نے جلد شادی کرنے کی حمایت کرتے ہوئے کہا ہے کہ رشتہ ازدواج میں منسلک ہونے کے کئی فوائد ہوتے ہیں اور رشتے میں بندھ جانے کے بعد اِدھر اُدھر سے بریک اپ نہیں کرنے پڑتے، بندہ کام پر فوکس کرتا ہے۔

زارا نور عباس نے ایک سوال کے جواب میں یہ انکشاف کیا کہ شوبز انڈسٹری میں جب بھی کوئی اداکارہ شادی کرتی ہیں تو برانڈز اور لوگ ان کے ساتھ کام کرنا کم کردیتے ہیں لیکن جیسی ہی کوئی اداکارہ حاملہ بن جاتی ہیں تو سب برانڈز ان کے ساتھ کام کرنا چاہتے ہیں۔ اداکارہ نے بتایا کہ انہیں ’بیگم بادشاہ‘ کے کردار کے لیے کوئی خاص محنت نہیں کرنی پڑی، وہ پہلے ہی اس طرح کے کرداروں کو اسکرین پر دیکھتی رہی تھیں۔

اس موقع پر ایک سوال کے جواب میں انہوں نے مذاقاً بتایا کہ ’زیبائش‘ ڈرامے میں وہ، ان کی والدہ، خالہ بشریٰ انصاری اور شوہر اسد قریشی اس لیے ایک ساتھ کام کر رہے ہیں، کیوں کہ انہوں نے پہلے یہی ڈراما گھر کے کچن میں ایک ساتھ کیا، پھر اسے اسکرین پر لانے کا منصوبہ بنایا۔

شو میں انہوں نے بتایا کہ وہ اور ان کے شوہر ایک دوسرے کی اداکاری پر خوب تنقید کرتے ہیں، تاہم ایک دوسرے کو سپورٹ بھی کرتے ہیں۔اداکارہ نے کہا کہ ان کے اور اسد قریشی کے درمیان بہت ہی کم تنازع ہوتا ہے، حال ہی میں انہوں نے شوہر کے ساتھ اس بات پر جھگڑا کیا تھا کہ وہ صبا قمر کے ساتھ کام کیوں کررہے ہیں؟ زارا نور عباس نے اسی حوالے سے مزید وضاحت کی کہ وہ صبا قمر کے ساتھ خود کام کرنا چاہتی ہیں، اس لیے انہوں نے شوہر سے جھگڑا کیا کہ وہ ان کے ساتھ کام کیوں کررہے ہیں؟انہوں نے اس عزم کا اعادہ بھی کیا کہ اگر انہیں صبا قمر کے ساتھ کام کرنے کے لیے اسکرین پر مرد بننا پڑے تو بھی وہ یہ کر گزریں گی۔

زارا نور عباس نے اسد قریشی سے دوسری شادی کی تھی، اس سے قبل انہوں نے پہلی شادی 2014 میں کم عمری میں بیرون ملک رہائش پذیر شخص سے کی تھی مگر 2017 کے آغاز میں ہی ان کی طلاق ہوگئی تھی۔پہلی شادی کی ناکامی پر زارا نور عباس ماضی میں کھل کر بات کرچکی ہیں اور بتاچکی ہیں کہ شوہر کی جانب سے اداکاری کی اجازت نہ دئیے جانے کی وجہ سے ہی ان کے درمیان اختلافات پیدا ہوئے اور ان کی طلاق ہوئی۔

خیال رہے کہ گزشتہ دنوں انسٹاگرام پر عالیہ بھٹ کی اسٹوری کو ری پوسٹ کرتے ہوئے زارا نور عباس کا کہنا تھا کہ ‘میں سمجھی کہ صرف پاکستانی ہی ایسا سوچتے ہیں، خاص طور پر جب برینڈ نے مجھے اس وجہ سے کام دینا ختم کردیا جب انہیں پتا چلا کہ میرے ہاں بچے کی پیدائش متوقع ہے، جب اداکارہ حاملہ ہو تو معاشرے کو یہ لگتا ہے یہ اب کسی کام کے قابل نہیں رہی‘۔