پُش اَپس کا عالمی ریکارڈ ہولڈر چائے کا ہوٹل چلانے پر مجبور

ہمارے ملک کا یہ المیہ ہے کہ اپنے اصل سرمائے اور اثاثوں کی قدر کرنے کے بجائے انہیں گمنامی کی زندگی گزارنے پر مجبور کر دیتے ہیں ، یہ لوگ اپنی محنت سے ملک کا نام عالمی سطح پر بلند کرتے ہیں کئی میڈلز ، سرٹیفیکٹس جیتے ہیں لیکن قومی سطح پر انہیں کوئی پزیرائی نہیں ملتی۔

شہر قائد کے تاج محمد کا شمار بھی ایسے ہی لوگوں میں ہوتا ہے جو ملک کا سرمایہ ہیں اور پش اپس میں ورلڈ ریکارڈ بنانے کے باوجود اہلخانہ کی کفالت کے لئے چائے کا ہوٹل چلا رہے ہیں۔

وہ کراچی کے علاقے ملیر شمسی سوسائٹی کے قریب تاج ہوٹل کے نام سے گننز ریکارڈ ہولڈ تاج محمد چائے کا ہوٹل چلاتے ہیں اور شاہ فیصل کالونی میں واقع ایک فٹنس کلب میں سات سال سے ممبر ہیں جہاں سے انہوں نے مارشل آرٹس سیکھ رکھا ہے اور اس کے مطابق فٹنس سے متعلق مختلف ورلڈ ریکارڈز کے لیے وہاں کوششیں جاری رہتی ہیں۔

تاج محمد کے ورلڈ ریکارڈز کی بات کریں تو انہوں نے ایک گھنٹے میں سب سے زیادہ پش اپس کا ریکارڈ 20مارچ 2016 کو بنایا جسے بعد میں گنیز ورلڈ ریکارڈ کی ویب سائٹ پر شامل کیا گیا ہے۔ اس کے علاوہ انہوں نے مکوں پر ایک گھنٹے میں سب سے زیادہ پش اپس 2175 ، مکوں پر 40 پاونڈ وزن کے ساتھ ایک منٹ میں 64 پش اپس، ایک ٹانگ سے ایک منٹ میں 80 پاونڈ کے ساتھ سب سے زیادہ پش اپس 41، ایک منٹ میں سب سے زیادہ پس اپش ایک ٹانگ اٹھا کر 63 اور ایک منٹ میں مکوں پر ایک ٹانگ اٹھا کر سب سے زیادہ پش اپس بنانے کا ورلڈ ریکارڈ قائم کیا تھا۔

چائے کا کام تاج محمد کا خاندانی پیشہ ہے، جبکہ جسمانی فٹنس اس کا شوق ہے۔ ورلڈ ریکارڈ بنانے میں اسے 7 سال محنت کرنا پڑی اور اس کامیابی کو حاصل کرنے میں اس کے استاد نے اس کا بھرپور ساتھ دیا جو خود بھی کئی ریکارڈز کے مالک ہیں۔

مزید پڑھیں: کوئٹہ کی سڑکوں پر لڑکےکے بھیس میں موٹر سائیکل چلاتی  لڑکی

تاہم، 2017 میں تاج محمد کراچی میں ٹریفک حادثہ کا شکارہوگیا اور اس کی ٹانگ ٹوٹ گئی اور ٹانگ کے آپریشن کے لئے ان کے پاس پیسے نہیں تھے جس پر انہوں نے وزیر اعظم نواز شریف، وزیر اعلیٰ سندھ مراد علی شاہ اور صوبائی کھیل سردار محمد بخش مہر سے علاج کی اپیل بھی کی تھی۔ اس حادثے کے بعد تاج محمد کے حوصلے بھی ٹوٹ گئے اور عالمی ریکارڈ بنانے والا یہ کھلاڑی اب بس چائے کا ہوٹل چلا رہا ہے۔

گزشتہ دنوں سوشل میڈیا پر پاکستان میں کک باکسنگ کے چیمپئن نثاراحمد خان کی ویڈیو کافی وائرل ہوئی جو روس میں کک باکسنگ کے عالمی مقابلے میں شرکت کرنے کیلئے لوگوں سے امداد مانگ رہے تھے۔ نیشنل لیول پر کئی میڈلز اپنے نام کرنے والے نثار احمد اس عالمی مقابلے میں قومی پرچم سربلند کرنے کے خواہشمند ہیں مگر اس بین الاقوامی مقابلے میں شمولیت کے لیے انہیں دو لاکھ روپے کی رقم درکار ہے جو وہ اپنے محدود مالی وسائل کی وجہ سے ادا نہیں کرسکتے۔ اس رقم کو اکٹھا کرنے کے لئے انہوں نے عوام سے مدد طلب کرلی ہے۔

Story Courtesy: HASSAN BAIG