بائیڈن کا پاکستان کے ساتھ دو طرفہ فوجی تعلقات استوار کرنے کا عندیہ

امریکہ کے نامزد دفاعی سربراہ جنرل لائیڈ جے  آسٹن کا کہنا ہے کہ بائیڈن اتنظامیہ افغانستان میں قیام امن کے لیے پاکستان کو ایک اہم ساتھی کے طور پر دیکھتا ہے۔ انھوں نے توقع ظاہر کی کہ پاکستانی فوج کے ساتھ تعلقات میں جاری تسلسل سے پاکستان اور امریکہ کے مابین اہم امور پر تعاون بڑھانےکا موقع ملے گا۔

جنرل آسٹن نے ان خیالات کا اطہار یونائٹید اسٹیٹس سینیٹ آرمڈ سروسز کمیٹی کے سامنے دفاعی سیکریٹری کے عہدے پر تعیناتی کی سماعت کے دوران کیا۔

یو ایس سینٹرل کمانڈ کے سابق سربراہ جنرل لائیڈ جے  آسٹن نے کمیٹی کو بتایا کہ پاکستان، افغانستان میں قیام امن کی کوششوں کے عمل میں ایک لازمی پارٹنر ہے۔ ان کا کہنا تھا کہ اگر انھیں اس عہدے پر فائز کیا گیا تو وہ خطے میں ہمسایہ ممالک بشمول پاکستان  کے تعاون سے ایسی فضا کے قیام کی حوصلہ افزائی کریں گے جس سے امن قائم ہو جبکہ وہ ان عناصر کو روکیں گے جو افغانستان میں قیام امن کے عمل کو نقصان پہنچانے کی کوشش کریں گے۔

پاکستان امریکہ کے ساتھ اچھے تعلقات قائم کرنے کا خواہاں ہے۔

پاکستان کا کہنا ہے کہ اس کی خواہش ہے کہ وہ نئی امریکی انتظامیہ کے ساتھ دو طرفہ تعلقات بہتر بنائے۔ وزیر خارجہ شاہ محمود قریشی کا کہنا ہے کہ نو منتخب امریکی صدر جو بائیڈن جنوبی ایشیا سے متعلق واضح نقطہ نظر رکھتے ہیں۔ ان نے کہا کہ افغانستان کے حوالے سے دونوں ممالک کے خیالات میں ہم آہنگی پائی جاتی ہے۔ اس کے ساتھ ہی کرونا وائرس اور موسمیاتی تبدیلی کے حوالے سے دونوں ممالک کی ترجیحات یکساں ہیں۔

پاکستانی وزیر خارجہ کا کہناہے کہ یہ خوش آئند بات ہے کہ نئی امریکی انتظامیہ کا انسانی حقوق کے تحفظ کے بارے میں واضح موقف ہے ۔ انھوں نے کہا کہ دنیا مقبوضہ کشمیر میں بھارتی ظلم و ستم اور انسانی حقوق کی خلاف ورزیوں کی جانب اشارہ کر رہی ہے۔ انھوں نے امید ظاہر کی کہ بائیڈن انتظامیہ اسی لاکھ نہتے کشمیریوں پر بھارتی جبرکو روکنے کے لیے اپنا کردار ادا کرے گی۔