پی آئی اے والے محض سیاست کررہے ہیں، والد جاں بحق پائلٹ سجاد گل

گزشتہ جمعہ میں کراچی میں پیش آنے والے فضائی حادثے میں اپنی جان کی بازی ہار جانے والے پائلٹ سجاد گل کے والد گل محمد بھٹی نے پی آئی اے کی تحقیقات پر عدم اعتماد کا اظہار کردیا۔

جاں بحق پائلٹ سجاد گل کے والد گل محمد بھٹی نے گورنر پنجاب چودھری سرور سے ملاقات میں پی آئی اے انتظامیہ پر برس پڑے کہا کہ پی آئی اے کے اعلی حکام جو انکوائری کرکے ٹوئٹر پر لیک کر رہے ہیں، وہ لوگ طیارے حادثے کی کیا انکوائری کریں گے۔ میرا بیٹا ایک پروفیشنل پائلٹ تھا، دوران پرواز سب کچھ بتارہا تھا کہ ایک انجن میں کچھ مسئلہ کررہا ہے ۔ موت اس کو بلکل اپنے سامنے نظر آرہی تھی لیکن پھر بھی وہ گھبرایا نہیں، ذمہ داری کا مظاہرہ کیا۔ وزیراعظم عمران خان سے انصاف کی امید ہے۔ وہ اس معاملے میں انصاف دلوائیں۔

اس حوالے سے جاں بحق پائلٹ سجاد گل کے والد نے پی آئی اے کے دوہرے معیار پر سوال اٹھاتے ہوئے کہا کہ قومی ائیرلائن پی آئی آے ایک دن سجاد گل کو قومی ہیرو کر درجہ دیتی ہے اور پھر دوسرے روز ان کو میرے بیٹے کی غلطیاں یاد آجاتی ہیں۔ اس نے اپنی جان دے دی اور آبادی کو بچالیا جبکہ انکوائری کرنے والے پائلٹ کو ذمہ دار ٹھرانے کی کوشش کررہے ہیں۔ البتہ دوسری جانب یہ بھی شکوہ کیا کہ سجاد گل سے پی آئی اے کی انتظامیہ روزانہ 17 گھنٹے سے زائد کام کروا رہی تھی۔ میرے بیٹے نے پچھلے سال ایک ہزار گھنٹہ پرواز کی ہے۔

میڈیا سے بات کرتے ہوئے انہوں نے مزید کہا ان کا بیٹا سجاد گل ایک انتہائی محنتی اور ایماندار انسان تھا، وہ بیٹے کے ساتھ میرا دوست بھی تھا۔ ڈیوٹی پر جانے سے قبل مجھے پیسے دے کرگیا کہ میں بیوی، بچوں کو عیدی دے دوں۔

یاد رہے رہے 22 مئی بروز جمعہ قومی ائیر لائن پی آئی اے کا مسافر طیارہ پی کے 8303 جو کریو سمیت99 مسافروں کو لاہور سے کراچی لے کر آرہا تھا۔ کراچی ائیرپورٹ پہنچے پر اس کو فنی خرابی پیش آئی جس کے نتیجے میں جہاز گر کر تباہ ہوگیا تھا۔ اس حادثے میں عورتوں اور بچوں سمیت 97 افراد جاں بحق ہوگئے تھے جبکہ دو افراد خوش قسمتی سے محفوظ رہے۔