پانچویں جماعت کے طالب علم نے اپنے ہم جماعت کو قتل کر دیا

کراچی میں ایک اندوہناک واقعے میں  پانچویں جماعت کے طالب علم نے اپنے ساتھیوں کی مدد سے اپنے ہم جماعت کو ایک معمولی خدشے کے پیش نظر قتل کر دیا۔ تفصیلات کے مطابق، بارہ سالہ ارباز جمعے کو اپنے موبائل فون میں گیمز ڈاون لوڈ کرانے کی غرض سے اپنے دوست ارحم کے گھرگیا تھا جس کے بعد سےوہ  گھرواپس نہیں آیا۔ اس سلسلے میں ارباز کے گمشدہ ہونے کی رپورٹ ارباز کے گھر والوں نے تھانے میں درج کرائی۔

ہفتے کے روز ارباز کی لاش اورنگی ٹاون سیکٹر الیون الطاف نگر کے ایک خالی پلاٹ سے ملی۔ ارباز کو تشدد کر کے قتل کیا گیا۔ ارباز کی لاش کو قانونی کاروائی کے لیے عباسی شہید اسپتال منتقل کر دیا گیا۔

ارباز کی لاش ملتے ہی پولیس نےارباز کے دوست ارحم ( جس کے گھر ارباز گیمز ڈاون لوڈ کرانے گیا تھا) کواپنی حراست میں لے لیا۔ دوران تفتیش ارحم نے اعتراف جرم کرتے ہوئے پولیس کو بتایا  کہ اس نے اپنے دو ساتھیوں کی مدد سے ارباز کو قتل کیا اور اس کی لاش ٹھکانے لگائی۔

 ارباز کے مبینہ قاتل ارحم نے دوران تفتیش پولیس کو بتایا کہ امتحان سے قبل اس کو اہم سوالات پتہ چل گئے تھے جس کا اس نے اپنے مقتول دوست اربازسے بھی ذکر کیا تھا۔ تاہم اس کو خدشہ تھا کہ کہیں ارباز امتحانی سوالات سے متعلق اس کا راز کسی کو فاش نہ کردے۔ لہذا اس نے اپنے دوستوں کی مدد سے ارباز کو قتل کرنے کا منصوبہ بنایا۔

پولیس کے مطابق، ارباز کے سر پر  بھاری آلے سے ضرب لگائی گئی جس سے وہ قتل ہوا۔ قتل کے بعد ارحم نے اپنے دوست ارسلان کی مدد سے مقتول ارباز کی لاش اورنگی ٹاون  کےعلاقے میں ایک خالی پلاٹ میں پھینکی ۔ پولیس نے ارحم اور اس کے دو ساتھیوں کو حراست میں لے لیا اور ان کےقبضے سے آلہ قتل اور خون آلود کپڑے بھی برآمد کر لیے۔

تازہ ترین اطلاعات کے مطابق، پولیس نے ارحم کے والدین کو بھی حراست میں لے لیا ہے اور ان سے تفتیش جاری ہے ۔ یہ بات قابل غور ہے کہ کس طرح کم عمر نوجوان قتل کی ان گھناونی واردتوں میں ملوث ہیں۔ وہ کیا عوامل ہیں جس کے باعث نوجوانوں میں جنونی کیفیت طاری ہو رہی ہے ۔

واضح رہے کہ ماضی قریب میں بھی اس طرح کے واقعات رونما ہوئے ہیں۔ تین سال قبل تین نوجوانوں نے ایک منصوبے کے تحت اپنے ایک ہم جماعت کو قتل کیا تھا۔ اس سے قبل قانون کی طالبہ کو اس کے ہم جماعت نے تیز دھار آلے کے 23 وار کرکے زخمی کیا تھا۔

Courtesy: Express News