کھیل کے میدان میں بھارت کو پاکستان سے ایک اور شکست

سنگاپور میں جاری مکس مارشل آرٹس مقابلوں میں گزشتہ روز پاک بھارت مقابلہ ہوا، جس میں پاکستانی فائٹر احمد “ولورین” مجتبی نے بھارتی فائٹر راہول “کیریلا کرشر” راجو کو ایک یکطرفہ فائٹ کے بعد مقابلہ اپنے نام کرلیا۔

پاکستان بمقابلہ بھارت یہ محض ایک جملہ نہیں ہے بلکہ یہ دونوں ملکوں کی عوام کے جذبات سے جڑا ایک اہم پہلو ہے، مقابلہ کھیل کا ہو، یا پھر جنگ کا عوام کے جذبات کبھی تبدیل نہیں ہوتے، دونوں ممالک کو اپنے سے چھوٹے حریف سے ہار پر اتنا افسوس نہیں ہوتا جتنا اس میچ کی ہار پر ہوتا، کیونکہ یہ شکست برسوں یاد رکھی جاتی ہے اور فلحال شکست کا کڑوا گھونٹ ایک بار پھر بھارت کے نصیب میں آیا ہے۔

تفصیلات کے مطابق جہاں کل دنیا بھر میں بھارت کی جانب سے ڈھائے جانے والے مظالم پر مظلوم کشمیریوں کے ساتھ اظہار یکجہتی کا دن منایا گیا وہیں سنگاپور میں جاری “ون چیمپیئن شپ” مکسڈ مارشل آرٹس میں پاک بھارت ٹاکرا ہوا، پاکستان کی نمائندگی احمد مجتبیٰ نے کی جبکہ بھارت نمائندگی راہول راجو نے کی۔

یوں تو دونوں ہی ممالک میں اس میچ لیکر کافی جوش وخروش دیکھا جارہا تھا، دونوں ہی ملکوں کی عوام اپنے اپنے فائٹر کے لئے دعا گو تھیں تاہم ابھی مقابلہ شروع ہی ہوا تھا کہ بھارتی کھلاڑی کے چہرے پر خوف اور پریشانی کے تاثرات واضح نظر آرہے تھے، پاکستانی کھلاڑی فائٹر احمد مجتبیٰ شروع سے بھارتی کھلاڑی پر حاوی رہے، ابھی فائٹ شروع ہوئے چند ہی سیکنڈ گزرے تھے کہ احمد مجتبیٰ نے بھارت کے فائٹر راہول راجو کو ایک زور دار پنچ لگایا، جس پر بھارتی کھلاڑی کے اوسان خطا ہوگئے اور وہ زمین پر جاگرا، جس کے بعد پھر وہ دوبارہ اٹھ ہی نہیں سکا۔ جس پر ریفری نے میچ ختم کرکے پاکستانی کھلاڑی احمد مجتبیٰ کو فاتح قرار دے۔ یوں پاکستانی فائٹر احمد “ولورین” مجتبی نے یہ مقابلہ محض 56 سیکنڈ میں جیتا ہے۔ جوکہ مکس مارشل کی چند چھوٹی فائٹس میں سے ایک ہے۔

اس سلسلے میں جیت کے بعد پاکستانی فائٹر احمد مجتبیٰ نے پیغام جاری کرتے ہوئے کہا کہ انہوں نے اپنا وعدہ پورا کردیا ہے، انہوں نے پہلے مرحلے میں بھارتی کھلاڑی کو ناک آؤٹ کردیا ہے، میں نے سب سے یہ وعدہ کیا تھا کہ فائٹ میں ضرور جیتوں گا۔

پاکستانی فائٹر احمد “ولورین” مجتبی نے اپنی یی جیت تمام کشمیری بھائیوں اور پاک آرمی کے جوانوں، تمام پاکستانیوں اور پاکستان اور دنیا بھر میں موجود اپنے مداحوں کے نام کرنے کا اعلان کیا۔

واضح رہے پاکستان کرکٹ ٹیم کے سابق ٹیسٹ کرکٹر اور اسپیڈ اسٹار شعیب اختر نے میچ سے قبل پاکستانی فائٹر احمد “ولورین” مجتبی کے لئے نیک خواہشات کا اظہار کیا تھا، جبکہ انہوں نے احمد ولورین مجتبیٰ کو چیلنج کیا تھا کہ اگر وہ بھارتی فائٹر راہول راجو کو پہلے راؤنڈ میں شکست دیں گے، وہ خود ائیرپورٹ ان کے استقبال کے لئے جائیں گے۔

یاد رہے رواں ہفتے یہ بھارت کی پاکستان کے ہاتھوں دوسری بڑی شکست ہے، اس سے قبل انٹرنیشنل کرکٹ کونسل (آئی سی سی) کی جانب سے سماجی رابطے کی ویب سائٹ ٹوئیٹر پر ایک پول کیا گیا تھا، جس میں تمام کرکٹ مداحوں سے پوچھا تھا کہ دنیا میں کونسا کھلاڑی سب سے بہترین کوور ڈرائیو کھیلتا ہے، جس پر قومی کرکٹ ٹیم کپتان بابر اعظم نے ویرات کوہلی کو شکست دے دی تھی۔ اس پول میں تقریباً 2 لاکھ 80 ہزار ٹوئیٹر صارفین نے اپنی رائے کا اظہار کیا تھا۔