قومی کرکٹ ٹیم کے کپتان بابر اعظم دنیا کے نمبر ون بلے باز بن گئے

کھیل کے میدان سے بڑی خبر، قومی کرکٹ ٹیم کے کپتان بابر اعظم ون ڈے کرکٹ کے نمبر ون بیٹسمین بن گئے، بھارتی کپتان ویرات کوہلی ایک درجہ تنزلی کے بعد اب دوسرے نمبر پر آگئے ہیں۔

تفصیلات کے مطابق انٹرنیشنل کرکٹ کونسل (آئی سی سی) کی جانب سے جاری کردہ حالیہ رینکنگ کے مطابق قومی کرکٹ ٹیم کے کپتان بابر اعظم 865 پوائنٹس کے ساتھ سرفہرست ہیں، جبکہ بھارتی کپتان ویرات کوہلی 857 پوائنٹس کے ساتھ دوسرے نمبر پر آگئے ہیں۔ اگر فہرست میں دیگر کھلاڑیوں کی بات کی جائے، تو تیسرے نمبر پر بھارتی اوپنر روہت شرما، چوتھے نمبر پر نیوزی لینڈ ٹیم کے سابق کپتان روس ٹیلر اور پانچویں پوزیشن آسٹریلوی کپتان ایرون فنچ کی ہے۔

آئی سی سی کی جانب سے جاری کردہ نئی ون ڈے رینکنگ میں پاکستانی اوپنر فخر زمان بھی ٹاپ 10 کھلاڑیوں کی فہرست میں شامل ہوگئے ہیں، ان کا اس وقت 778 پوائنٹس کے ساتھ فہرست میں ساتواں نمبر ہے۔ اس قبل وہ اس فہرست میں انیسویں نمبر براجمان تھے۔

پاکستانی کپتان بابر اعظم سابق پاکستانی ٹیسٹ کرکٹر محمد یوسف ، ظہیر عباس اور جاوید میاں داد کے بعد دنیا کے نمبر ون بیٹسمین بننے والے چوتھے پاکستانی کھلاڑی ہیں، جبکہ بابر اعظم کی جانب سے نمبر ون بلے باز بن کر بھارتی کپتان ویرات کوہلی کی 5 سال سے قائم بادشاہت کا بھی خاتمہ کیا ہے، ویرات کوہلی سال 2017 سے ون ڈے بیٹنگ میں نمبر ون بیٹسمین کی پوزیشن پر قابض تھے۔

پاکستان کرکٹ ٹیم ان دنوں دورہ جنوبی افریقہ پر موجود ہے، جہاں قومی ٹیم نے 3 ون ڈے میچز کی سریز کو ناصرف 2-1 سے اپنے نام کیا بلکہ اس سریز میں 228 رنز بنانے والے قومی کرکٹ ٹیم کے کپتان بابر اعظم نے دنیائے کرکٹ میں نمبر ون بلےباز ہونے کا اعزاز حاصل کرتے ہوئے کرکٹ کی دنیا میں اپنی حکمرانی کا بھی آغاز کیا۔

واضح رہے سریز سے قبل قومی کپتان بابر اعظم اس سریز سے قبل عالمی بیٹسمین کی درجہ بندی میں دوسرے نمبر پر تھے، ان کے اور بھارتی کپتان ویرات کوہلی کے درمیان 20 پوائنٹس کا فرق تھا۔ تاہم جنوبی افریقہ کے خلاف پہلےایک روزہ میچ میں 103 رنز کی عمدہ اننگز کھیلنے پر بابراعظم آئی سی سی ون ڈے انٹرنیشنل پلیئرز رینکنگ میں پہلے نمبر پر پہنچ گئے تھے البتہ سیریز کے دوسرے میچ میں 31 رنز بناکر آؤٹ ہونے کے باعث وہ پانچ پوائنٹس گنوانے کی وجہ سے دوبارہ دوسری پوزیشن پر چلے گئے تھے۔

لیکن سیریز کے تیسرے اور فیصلہ کن میچ میں قومی کپتان بابر اعظم نے ایک بار پھر زبردست اننگز کھیلی اور 94 رنز بناکر مین آف دی میچ قرار پائے۔ جس کے بعد وہ ایک بار پھر ون ڈے انٹرنیشنل پلیئرز رینکنگ میں پہلی پوزیشن پر پہنچ گئے ہیں۔

یاد رہے قومی کرکٹ ٹیم کے کپتان بابر اعظم نے سال 2015 میں اپنے ون ڈے کیرئیر کا آغاز زمبابوے کے خلاف لاہور کے قذافی اسٹیڈیم سے کیا تھا۔ بابر اعظم نے 80 ون ڈے میچز میں قومی کرکٹ ٹیم کی نمائندگی ہے، جس میں انہوں نے 56.8 کے اوسط سے 3 ہزار 8 سو 8 رنز بنائے ہیں۔ اگرچہ دیگر فارمیٹ کی بات کی جائے تو بابر اعظم ٹیسٹ کی عالمی درجہ بندی میں چھٹے اور ٹی ٹوئنٹی کی فہرست میں تیسرے نمبر پر موجود ہیں۔