موجودہ پاکستان کے حالات کی صورت حال

کسی بھی معاشرے میں مسائل کا پیدا ہونا کوئی نئی بات نہیں دنیا میں ہر قوم کو مسائل کا سامنا رہاہے،اور پریشانیوں کا سامنا کرتے ہیں لیکن وہی قوم اپنے مسائل حل کرنے میں کامیاب ہوئی ہے،جو ایک مربوط واضح اور دو ٹوک نظریہ رکھتی ہو۔ موجودہ پاکستان کے حالات بھی کچھ انہی مسائل کا شکار ہیں

لیکن ہمارے معاشرے کا سب سے بڑا المیہ یہ ہےکہ بیک وقت کئی مسائل نے ہمیں اپنی گرفت میں لے لیا ہے بلکہ ہر طرف مسائل کا انبار ہے۔معیشت تباہی کے دہانے پر ہے، جمہوریت کے نام پر فرسودہ سرمایہ داری نظام نافذ ہے۔ملک میں معاشی بحران اتنی شدت اختیار کرچکا ہے کہ تقریباً آدھی آبادی غریت کی لکیر سے نیچے زندگی بسر کرنے پر مجبور ہے، بے روزگاری کی شرح میں دن بہ دن اضافہ ہورہا ہے، کارخانے اور مل بند ہورہے ہیں، برآمدات میں مسلسل کمی اور درآمدات میں روز بروز اضافہ واقع ہورہا ہے، تو دوسری طرف بیرونی قرضوں کا حجم بلین ڈالر سے بھی تجاوز کرچکا ہے جس کی وجہ سے ہم قرضے واپس کرنے کے لئے قرضے لے رہے ہیں۔ ملکی حالات سدھرنے کے بجائے روز بروز بڑھتے جارہے ہیں اور ملک معاشی اور سیاسی مسائل کی دلدل میں دھنستا چلا جارہا ہے۔

(Pakistan k Halaat) :پاکستان کے حالات

اگر آج ہم ملک کے خالی خزانے اور عوام کے افلاس پر نظر دوڑائیں تو یہ بخوبی سمجھ میں آجاتا ہے کہ ملک پر کیسے کیسے لوگوں نے حکمرانی کی ہے، جنہوں نے مل کر ایسا نظام بنادیا ہے کہ کسی طاقتور شخص کا احتساب نہیں ہوسکتا، اس نظام نے سماجی زندگی کو بھی تباہ کردیا ہے، ایسا محسوس ہوتا ہے کہ یہ مجرموں کی قوم ہے۔بالائی سطح پر مختلف مافیاؤں کی حکمرانی ہے بس اس بات کا مقابلہ ہے کہ کون سی مافیا زیادہ طاقتور ہے۔ توانائی مافیا، لینڈ مافیا، شوگر مافیا، سیمنٹ مافیا، سرمایہ دار، جاگیردار، افسر شاہی کون زیادہ ذمے دار ہے، اس کا نہ فیصلہ ہوسکتا ہے اور نا ہی کوئی یہ بتانے والا ہے کہ اصلاح کا نقطہ آغاز کہاں سے ہوگا۔

حقیقت یہ ہے کہ جب تک قومی سیاسی قیادت، فوجی اسٹیبلشمنٹ، عدلیہ اور سول بیوروکریسی سیاسی اور اقتصادی اعتبار سے ملکی نظام کوبہتر بنانے سے متعلق کسی سنجیدہ فیصلہ پرمتفق نہیں ہوتے، تب تک ملک میں سیاسی، معاشی استحکام کی توقع دیوانے کا خواب ہی رہے گا۔ موجودہ صورتحال میں عام آدمی کے حالات بدلنے کا دور دور تک کوئی امکان نظرنہیں آتا،کوئی انقلاب ہی عوامی جذبات واحساسات کی ترجمانی کا سبب بنے تو بنےاور حالات سدھریں تو سدھریں، کیونکہ تاریخ کا سبق یہی ہے کہ حالات تب تک بدلتے ہیں اور نہ سدھرتے ہیں جب تک عوام خود حالات بدلنے اور سدھارنے کے لئے تیار نہ ہوں۔

مزید پڑھیں: پاکستانی نوجوان اپنا ملک کیوں چھوڑ رہے ہیں؟

الغرض، اگر ہمیں سیاسی، معاشی، معاشرتی، مذہبی، تعلیمی اور اسی طرح کے سینکڑوں اور مسائل سے نکلنا ہے اور ترقی کی راہ پر گامزن ہونا ہے تو ہم سب کو بحیثیت ایک قوم مل کر اپنی اپنی ذمہ داریوں کو نہ صرف قبول کرنا ہوگا بلکہ پوری ایمانداری سے ان کو سرانجام بھی دینا ہوں گا کیونکہ یہی ایک واحد حل ہے۔اس کے ساتھ ساتھ ہمیں اپنے اداروں سے کرپشن، ناانصافی، جھوٹ، افسر شاہی کا خاتمے بھی کرنا ہوگا، اور اس مقصد پر عملدرآمد کے لئے ہر فرد اور ہر ادارے کو اپنے ذاتی اور تجارتی مفاد کے ساتھ قومی مفاد کو بھی اہمیت دینی ہوگی اسی طرح ہم سب مل کر اپنے ملک کو ایک فلاحی اور مثالی ریاست بناسکیں گے، اور پھر ہماری یہی ریاست بہتری کی طرف تیزی سے آگے بڑھے گی اور ترقی کی راہ پر گامزن ہوگی۔