ایک جیسے کپڑے پہننے والے میاں بیوی کے جوڑے نے محبت کی مثال قائم کردی

میاں بیوی کی محبت کے چرچے تو آپ نے بہت سنے ہوں گے مگر ازدواجی زندگی کی انوکھی محبت کی مثال قائم کی ہے فیصل آباد سے تعلق رکھنے والے ”کپل آف فیصل آباد “ یعنی مسٹر اینڈ مسز ناصر کے جوڑے نے۔

فیصل آباد سے تعلق رکھنے والے اس شادی شدہ جوڑے کی شہرت کی سب سے بڑی وجہ یہ ہے کہ یہ دونوں میاں بیوی گزشتہ 38 برسوں سے ایک جیسے رنگ اور ڈیزائن کے کپڑے پہن رہے ہیں جنہیں دیکھ کر لوگ خوشگوار حیرت کا اظہار کرتے ہیں۔

بے شک میاں بیوی دکھ سکھ میں ایک دوسرے کے ساتھی ہوتے ہیں لیکن 38 برس سے کھانے میں ایک جیسی پسند سے لے کر ایک جیسے کپڑے پہننے والے مسٹر اینڈ مسز ناصر کے جوڑے نے سب کو تعجب میں ڈال کر توجہ حاصل کر لی ہے۔

حال ہی میں اس جوڑے نے نجی نیوز چینل کے ایک پروگرام میں شرکت کی، جس میں انہوں نے اپنی ذاتی زندگی سمیت اپنے کپڑوں کے منفرد انداز کے حوالے سے گفتگو بھی کی۔

اس شادی شدہ جوڑے نے نجی نیوز چینل کو اپنے انٹرویو میں بتایا کہ شادی کے بعد ہم دونوں میاں بیوی نے سوچا کہ کچھ ایسا کیا جائے جو مختلف ہو اور سوچ بیچار کے بعد طے یہ پایا کہ ہم ہمیشہ ایک جیسے کپڑے زیب تن کریں گے ۔ چنانچہ شادی کے ایک سال کے بعد ہی سے ہم میاں بیوی نے ایک جیسے کپڑے پہننے شروع کر دئیے۔

اس حوالے سے مزید جانئے: محبوبہ سے ملنے کی خاطر برقع پہن کر جانے والا نوجوان پولیس حراست میں

ایک ہی رنگ اور ایک ہی ڈیزائن کے کپڑے پہننے والا یہ انوکھا جوڑا ہے۔ یہ دونوں آپس میں مل کر رنگ اور کپڑے کا انتخاب کرتے ہیں اور پھر کپڑوں پر کڑھائی یا کندن کا کام کرنے کے لئے آرڈر دیتے ہیں جن کے ڈیزائن کا انتخاب کبھی مسز ناصر اور کبھی مسٹر ناصر کرتے ہیں۔

اپنےانٹرویو میں مسٹر اینڈ مسز ناصر نے مزید بتایا کہ ان کی ازدواجی زندگی شروع ہی سے پیار ومحبت بھری ہے۔ دونوں ایک دوسرے کو ہر بات بتاتے ہیں۔ انہوں نے بتایا کہ ان کی شادی کو 38 سال کا عرصہ گزر چکا ہے اور ان کے تین بیٹے ہیں اور وہ اپنے بچوں کے ساتھ خوشگوار ازدواجی زندگی گزار رہے ہیں۔ وہ کہتے ہیں کہ ہمارا مقصد محبت کو فروغ دینا ہے۔

آج کل سوشل میڈیا کے ذریعے ان دونوں میاں بیوی کی جوڑی کو بے حد سراہا جا رہا ہے بلکہ ایک جیسے لباس زیب تن کر نے پر کپل آف فیصل آباد کےخوب چرچے ہیں۔